មន្ត្រីជាន់ខ្ពស់ក្រុមប្រឹក្សាអភិវឌ្ឍន៍កម្ពុជា វាយតម្លៃខ្ពស់ចំពោះក្រុមហ៊ុនជប៉ុនមួយចំនួន ដែលបានមកបណ្តាក់ទុនវិនិយោគ និងពង្រីកការវិនិយោគនៅកម្ពុជា

ភ្នំពេញ៖ ក្នុងជំនួបជួបពិភាក្សាការងារជាមួយគណៈប្រតិភូក្រុមហ៊ុន MIZUNO TECHNICS CORPORATION ដឹកនាំដោយលោក Yukio Hiramatsu ប្រធានផ្នែកអភិវឌ្ឍផលិតកម្ម និងវិស្វកម្មរបស់ក្រុមហ៊ុន និងក្រុមហ៊ុន GOMI RECYCLE ដឹកនាំដោយលោក Okumura Yusuke ប្រធានក្រុមហ៊ុន នៅទីស្តីការក្រុមប្រឹក្សាអភិវឌ្ឍន៍កម្ពុជា នាថ្ងៃទី២៨ ខែតុលា ឆ្នាំ២០២៥ ឯកឧត្ដម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានវាយតម្លៃខ្ពស់ចំពោះក្រុមហ៊ុនជប៉ុនមួយចំនួន ដែលបានមកបណ្តាក់ទុនវិនិយោគ និងពង្រីកការវិនិយោគនៅកម្ពុជា។

លោក Yukio Hiramatsu បានឱ្យដឹងថា ក្រោយពីបានសិក្សាពីបរិស្ថានវិនិយោគនៅកម្ពុជាមួយរយៈរួចមក ពេលនេះក្រុមហ៊ុនបានសម្រេចចិត្តបណ្តាក់ទុនវិនិយោគ បង្កើតរោងចក្រផលិតគ្រាប់បាល់ Baseball ដើម្បីនាំចេញទៅប្រទេសជប៉ុនក្នុងដំណាក់ដំបូង ហើយដំណាក់កាលបន្ទាប់ ក្រុមហ៊ុននឹងនាំចេញទៅបណ្តាប្រទេសផ្សេងទៀត។

ក្រុមហ៊ុននេះបានសម្រេចចិត្តបោះទីតាំងវិនិយោគនៅក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ ដោយគ្រោងនឹងចាប់ផ្តើមដំណើរការក្នុងខែឧសភា ឆ្នាំ២០២៦ ហើយអាចនឹងចូលរួមបង្កើតការងារបានប្រមាណ ២០០កន្លែង។

ឯកឧត្ដម ជា វុទ្ធី បានវាយតម្លៃខ្ពស់ចំពោះការសម្រេចចិត្តដ៏ត្រឹមត្រូវរបស់ក្រុមហ៊ុន ក្នុងការបណ្តាក់ទុនវិនិយោគនៅកម្ពុជា និងបានសម្តែងនូវការស្វាគមន៍គម្រោងវិនិយោគនេះ ព្រមទាំងបានស្នើដល់ក្រុមហ៊ុន មេត្តារួសរាន់រៀបចំដាក់ពាក្យស្នើសុំចុះបញ្ជីគម្រោងវិនិយោគតាមនីតិវិធីជាធរមាន។

សូមជម្រាបថា ក្រុមហ៊ុន MIZUNO TECHNICS CORPORATION គឺជាក្រុមហ៊ុនផលិតសម្ភារៈកីទ្បាដែលមានគុណភាពខ្ពស់មួយនៅទីក្រុង Gifu ប្រទេសជប៉ុន បង្កើតឡើងតាំងពីឆ្នាំ១៩៨៥។

នៅរសៀលថ្ងៃទី២៨ ខែតុលា ឆ្នាំ២០២៥ដដែល ឯកឧត្ដម ជា វុទ្ធី និងសហការី បានទទួលជួបពិភាក្សាការងារជាមួយគណៈប្រតិភូក្រុមហ៊ុន GOMI RECYCLE ផងដែរ។

លោក Okumura Yusuke ប្រធានគណៈប្រតិភូបានគូសបញ្ជាក់ថា បច្ចុប្បន្នក្រុមហ៊ុនបាននិងកំពុងដំណើរការគម្រោងវិនិយោគកែច្នៃសំរាម (ប្រមូលសំរាមប្លាស្ទិកដើម្បីកែច្នៃ) នៅក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ។

ដោយមានការជឿជាក់លើរាជរដ្ឋាភិបាលក្នុងការធានាបានូវបរិស្ថានវិនិយោគដ៏ល្អប្រសើរ នៅពេលនេះក្រុមហ៊ុនបានសម្រេចចិត្តពង្រីកការវិនិយោគ ដោយពង្រីកបន្ថែមលើការប្រមូលសំរាមប្លាស្ទិក គឺប្រមូលសំរាមទូទៅពីក្រុមហ៊ុន ដែលកំពុងមានផលិតកម្មនៅក្នុងតំបន់សេដ្ឋកិច្ចពិសេសនេះ ដើម្បីកែច្នៃ។ កន្លងមក ក្រុមហ៊ុនបានវិនិយោគកែច្នៃសំរាមប្លាស្ទិកដើម្បីផលិតជាវត្ថុអនុស្សាវរីយ៍ និងគ្រឿងសង្ហារិម។

ឯកឧត្ដមអគ្គលេខាធិការបានវាយតម្លៃខ្ពស់ចំពោះការសម្រេចចិត្តដ៏ត្រឹមត្រូវរបស់ក្រុមហ៊ុនក្នុងការពង្រីកការវិនិយោគនៅកម្ពុជា និងបានសម្តែងនូវការស្វាគមន៍គម្រោងពង្រីកការវិនិយោគនេះ ដែលនឹងអាចចូលរួមបង្កើតការងារបន្ថែមជូនដល់ប្រជាពលរដ្ឋកម្ពុជា និងចូលរួមសម្អាតបរិស្ថាន៕