Reuters៖ បើយោងតាមការចេញផ្សាយដោយទីភ្នាក់ងារសារព័ត៌មាន Reuters ប្រធានាធិបតី ដូណាល់ ត្រាំ បាននិយាយនាថ្ងៃពុធ ទី២៩ ខែតុលាថា បទឈប់បាញ់ហ្កាហ្សាគាំទ្រដោយអាមេរិក មិនបាត់បង់ទៅណាទេ បន្ទាប់ពីអាជ្ញាធរក្នុងតំបន់រាយការណ៍ថា មានមនុស្សស្លាប់ដោយការវាយប្រហារថ្មីទៀត ខណៈអ៉ីស្រាអែល-ហាម៉ាស ចោទប្រកាន់គ្នាពីការបំពានទៅវិញទៅមក។
យន្តហោះអ៉ីស្រាអែល បានវាយប្រហារលើតំបន់ហ្កាហ្សា កាលពីថ្ងៃអង្គារ បន្ទាប់ពីអ៉ីស្រាអែលនិយាយថា ក្រុមហាម៉ាសបានបំពានបទឈប់បាញ់។ តាមអាជ្ញាធរសុខាភិបាលហ្កាហ្សា ការវាយប្រហារសម្លាប់មនុស្សយ៉ាងហោចណាស់ ២៦នាក់នៅភាគកណ្តាលតំបន់ហ្កាហ្សា នៅសង្កាត់ Sabra នៃទីក្រុងហ្កាហ្សា និងនៅទីក្រុង Khan Younis។ ការវាយប្រហារបន្តមកដល់ព្រឹកថ្ងៃពុធនេះ នៅទូទាំងតំបន់។
ថ្លែងនៅលើយន្តហោះ Air Force One លោក ត្រាំ បាននិយាយដូច្នេះថា «តាមខ្ញុំដឹង ពួកគេ (ហាម៉ាស) ធ្វើឱ្យបាត់បង់ទាហានអ៉ីស្រាអែលម្នាក់។ ដូច្នេះ អ៉ីស្រាអែល វាយ បក វិញ។ គ្មានអ្វីអន្តរាយដល់បទឈប់បាញ់ឡើយ។ បើហាម៉ាសល្អ ពួកគេនឹងសុខសប្បាយ ហើយបើពួកគេមិនល្អ ជីវិតពួកគេនឹងត្រូវអស់។ ខ្ញុំគិតថាអ៉ីស្រាអែលមានសិទ្ធិធ្វើដូច្នេះ»។
គួរបញ្ជាក់ថា កិច្ចព្រមព្រៀងឈប់បាញ់ ដែលគាំទ្រដោយសហរដ្ឋអាមេរិក បានចូលជាធរមាននៅថ្ងៃទី១០ ខែតុលា ដែលបានជួយបញ្ចប់សង្គ្រាមពីរឆ្នាំ រវាងអ៉ីស្រាអែល និងក្រុមហាម៉ាស៕
