មូស្គូ៖ បើតាមការចេញផ្សាយដោយទីភ្នាក់ងារសារព័ត៌មាន Reuters ប្រធានាធិបតីរុស្ស៉ី លោក វ្ល៉ាឌីមៀ ពូទីន បាននិយាយកាលពីថ្ងៃព្រហស្បតិ៍ ទី២៣ ខែតុលាថាទីក្រុងមូស្គូនឹងមិនចុះញ៉មចំពោះសម្ពាធពីសហរដ្ឋអាមេរិក ឬមហាអំណាចបរទេសណាមួយឡើយ ជាមួយការព្រមានថានឹងធ្វើការសងសឹកយ៉ាងចាស់ដៃ ក្នុងករណីមានការវាយប្រហារណាមួយចូលជ្រៅក្នុងទឹកដីរុស្ស៉ី។
ប្រធានាធិបតីអាមេរិក លោក ដូណាល់ ត្រាំ កាលពីថ្ងៃពុធសប្ដាហ៍នេះបានប្រកាសដាក់ទណ្ឌកម្មលើក្រុមហ៊ុនប្រេងដ៏ធំ២របស់រុស្ស៉ី នៅក្នុងការផ្លាស់ប្ដូរគោលនយោបាយមួយចំពោះសង្រ្គាមរបស់ រុស្ស៉ីប្រឆាំងនឹងអ៊ុយក្រែន ដោយធ្វើឱ្យតម្លៃប្រេងនៅលើទីផ្សារសកលហក់ឡើងជិត ៥ភាគរយកាលពីថ្ងៃព្រហស្បតិ៍ ហើយឥណ្ឌាត្រូវបានរាយការណ៍ថានឹងពិចារណាលើការកាត់បន្ថយការនាំចូល ប្រេងពីរុស្ស៉ី។
ថ្លែងទៅកាន់ក្រុមអ្នកសារព័ត៌មាន លោក ពូទីន បាននិយាយថាទណ្ឌកម្មរបស់សហរដ្ឋអាមេរិក និងលោកខាងលិចជាទង្វើអរិភាព ហើយប្រាកដណាស់នឹងមានផលវិបាក តែទណ្ឌកម្មមិនអាចបង្ក ផលប៉ះពាល់ធ្ងន់ធ្ងរដល់សេដ្ឋកិច្ចរុស្ស៉ីឡើយ។ «ជាការពិតណាស់ នេះជាការប៉ុនប៉ងដាក់សម្ពាធ តែរុស្ស៉ីនឹងមិនចុះញ៉មនឹងសម្ពាធឡើយ»។ នេះជាការគូសបញ្ជាក់របស់លោក ពូទីន ដោយបាន រំឮកឡើងវិញផងដែរពីការដាក់ទណ្ឌកម្មរបស់សហរដ្ឋអាមេរិកលើរុស្ស៉ី កាលពីអាណត្តិទី១ របស់លោក ត្រាំ។
ដោយឡែក នៅពេលត្រូវបានសាកសួរអំពីសេចក្ដីរាយការណ៍របស់កាសែតអាមេរិក Wall Street Journal ដែលថារដ្ឋបាលលោក ត្រាំ បានលុបចោលការរឹតត្បិតដ៏សំខាន់មួយលើ ការប្រើប្រាស់មីស៊ីលរយៈចម្ងាយឆ្ងាយមួយចំនួនផ្ដល់ដោយសម្ព័ន្ធមិត្តលោកលិចរបស់អ៊ុយក្រែន និងការកត់សម្គាល់របស់លោក ហ្សេលេនស្គីអំពីមីស៊ីលផលិតក្នុងស្រុកមានរយៈចម្ងាយបាញ់ ៣០០០គីឡូម៉ែត្រ លោក ពូទីន បានឆ្លើយថា «នេះជាការប៉ុនប៉ងបង្កើនជម្លោះ។ ប៉ុន្តែប្រសិនបើអាវុធទាំងនោះត្រូវបានប្រើដើម្បីវាយប្រហារលើទឹកដីរុស្ស៉ី នោះការសងសឹកនឹងត្រូវធ្វើឡើងយ៉ាងចាស់ដៃ ដូច្នេះទុកឱ្យពួកគេជាអ្នកគិតដោយខ្លួនឯងទៅចុះ»៕
