ប្រធានាធិបតីអ៊ុយក្រែនព្រមានថា រុស្ស៉ីកំពុងតែឆ្លៀតឱកាសបង្កើនការវាយប្រហារលើអ៊ុយក្រែន ចំគ្រាដែលបញ្ហានៅតំបន់មជ្ឈិមបូព៌ា

កៀវ៖ កាលពីថ្ងៃអាទិត្យ ទី១២ ខែតុលា ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានព្រមានថា រុស្ស៉ីកំពុងតែឆ្លៀតឱកាសកេងយកផលចំណេញ ស្របពេលដែលការយកចិត្តទុកដាក់ ហាក់ត្រូវបានបង្វែរចេញពីសង្រ្គាមនៅអ៊ុយក្រែន។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

លោក ហ្សេលេនស្គី បាននិយាយថា រុស្ស៉ីនាពេលនេះ កំពុងតែឆ្លៀតឱកាសបង្កើនការវាយប្រហារលើប្រទេសរបស់លោក ចំគ្រាដែលបញ្ហានៅតំបន់មជ្ឈិមបូព៌ា ព្រមទាំង បញ្ហាក្នុងស្រុករបស់ប្រទេសនីមួយៗ កំពុងទទួលបានការយកចិត្តទុកដាក់ជាអតិបរមា។ ខណៈកិច្ចប្រឹងប្រែងការទូតដើម្បីបញ្ចប់សង្រ្គាមនៅអ៊ុយក្រែន បាននិងកំពុងជាប់គាំង ទីក្រុងមូស្គូត្រូវគេមើលឃើញថា បានចាប់ផ្តើម សាជាថ្មី នូវយុទ្ធនាការវាយប្រហារតាមផ្លូវអាកាសរបស់ខ្លួន ប្រឆាំងនឹងហេដ្ឋារចនាសម្ព័ន្ធថាមពលរបស់អ៊ុយក្រែន មុនរដូវរងាចូលមកដល់។ លោក ហ្សេលេនស្គី បានអះអាងថា ការវាយប្រហាររបស់រុស្ស៉ី គឺកាន់តែសាហាវទៅៗ។

កាលពីខែសីហា ប្រធានាធិបតីអាមេរិក លោក ដូណាល់ ត្រាំ បានជួបជាមួយប្រធានាធិបតីរុស្ស៉ី លោក វ៉្លាឌីមៀ ពូទីន នៅរដ្ឋ Alaska ដើម្បីជជែកគ្នាអំពីសង្រ្គាមអ៊ុយក្រែន ប៉ុន្តែជំនួបនោះ បរាជ័យក្នុងការសម្រេចឱ្យបាននូវកិច្ចព្រមព្រៀងណាមួយ ដើម្បីឆ្ពោះទៅរកសន្តិភាព។

គួរបញ្ជាក់ថា រុស្ស៉ីបានបើកការឈ្លានពានលើអ៊ុយក្រែន កាលពីខែកុម្ភៈ ឆ្នាំ២០២២ ហើយមកទល់ឥឡូវ កំពុងត្រួតត្រាលើទឹកដី ប្រហែល២០ភាគរយរបស់អ៊ុយក្រែន។ សង្រ្គាមបង្ហូរឈាមនេះ ត្រូវគេប៉ាន់ប្រមាណថា បានផ្តាច់ជីវិតកងទ័ពរួមជាមួយជនស៉ីវិល សរុបខ្ទង់សែននាក់៕