តៃប៉ិ៖ របាយការណ៍ចេញផ្សាយនៅថ្ងៃទី៩តុលារបស់ក្រសួងការពារជាតិកោះតៃវ៉ាន់ បានបង្ហាញថា កោះតៃវ៉ាន់ កំពុងបណ្ដុះបណ្ដាលទាហានយ៉ាងសកម្ម ក្នុងការបាញ់ទម្លាក់យន្តហោះគ្មានមនុស្សបើក និងស្វែងរកការទិញប្រព័ន្ធអាវុធប្រឆាំងយន្តហោះគ្មានមនុស្សបើកថ្មី ដើម្បីឆ្លើយតបទៅនឹងកំណើននៃការលុកលុយយន្តហោះគ្មានមនុស្សបើករបស់នាគរាជចិន។
តៃវ៉ាន់បង្កើតយុទ្ធសាស្ត្រ ដើម្បីដោះស្រាយជាមួយការលុកលុយពីយន្តហោះគ្មានមនុស្សបើករបស់ចិន ដោយកំណត់អត្តសញ្ញាណ និងបាញ់ទម្លាក់ នៅពេលវាហោះទៅជិតដែនអធិបតេយ្យនៃកោះនេះ។ កោះតូចៗរបស់តៃវ៉ាន់នៅក្បែរចិន ជារឿយៗប្រឈមមុខនឹងយន្តហោះគ្មានមនុស្សបើកឈ្លបយកការណ៍។
អ្នកនាំពាក្យក្រសួងការពារជាតិ ឧត្តមសេនីយ៍ឯក ស៊ុន លីហ្វាង (Sun Li-fang) បានលើកឡើងថា តៃវ៉ាន់កំពុងបន្តកិច្ចខិតខំប្រឹងប្រែង ដើម្បីកំណត់ និងប្រើប្រាស់ប្រព័ន្ធប្រឆាំងយន្តហោះគ្មានមនុស្សបើកប្រកបដោយប្រសិទ្ធភាព ជាការឆ្លើយតបទៅនឹងប្រទេសចិន។
លោកថ្លែងយ៉ាងដូច្នេះថា៖«ជាមូលដ្ឋាន ការអភិវឌ្ឍយន្តហោះគ្មានមនុស្សបើក និងការអភិវឌ្ឍប្រឆាំងយន្តហោះគ្មានមនុស្សបើក គឺលឿនណាស់ ហើយផ្អែកលើស្ថានភាពនាពេលបច្ចុប្បន្ន មានការរីកចម្រើនខុសៗគ្នាជារៀងរាល់ថ្ងៃ។ នេះ ជា ចំណុច សំខាន់ មួយ របស់ យើង ក្នុង កិច្ច ខិត ខំ ប្រឹង ប្រែង ត្រៀម ខ្លួន ខាង ផ្នែកយោធា»។
កោះតៃវ៉ាន់ កំពុងផ្តល់អាទិភាពដល់កិច្ចខិតខំប្រឹងប្រែងប្រឆាំងយន្តហោះគ្មានមនុស្សបើក ដោយមានទាហានធ្វើការហ្វឹកហាត់ រួមទាំងការបាញ់ប្រហារពេលយប់ផងដែរ។
លើសពីនេះ តៃវ៉ាន់គ្រោងនឹងបង្កើនការចំណាយលើវិស័យការពារជាតិរបស់ខ្លួនពី៣ភាគរយទៅ៥ភាគរយ នៃផលិតផលក្នុងស្រុកសរុប (GDP) របស់ខ្លួន ហើយមានបំណងពង្រឹងកិច្ចសហប្រតិបត្តិការយោធាជាមួយសហរដ្ឋអាម៉េរិក បើទោះបីជាមានភាពតានតឹងការទូតនាពេលថ្មីៗនេះក៏ដោយ។ តៃវ៉ាន់ ក៏បានចុះហត្ថលេខាលើកិច្ចព្រមព្រៀង៧៦១លានដុល្លារជាមួយសហរដ្ឋអាម៉េរិក សម្រាប់ប្រព័ន្ធការពារដែនអាកាសប្រឆាំងនឹងយន្តហោះគ្មានមនុស្សបើកផងដែរ៕
