ឯកឧត្តម សួស ប្រាថ្នា អញ្ជើញចូលរួមពិធីប្រកាសផ្សព្វផ្សាយនិងដាក់ឱ្យប្រើប្រាស់ជាផ្លូវការផែនការយុទ្ធសាស្ត្រអភិវឌ្ឍន៍ជាតិ របស់រាជរដ្ឋាភិបាលនីតិកាលទី៧ នៃរដ្ឋសភា
ភ្នំពេញ៖ នាព្រឹកថ្ងៃទី៩ ខែតុលា ឆ្នាំ២០២៥ ឯកឧត្តម សួស ប្រាថ្នា អគ្គនាយកនៃអគ្គនាយកដ្ឋានរដ្ឋបាល ក្រសួងមហាផ្ទៃ និងជាសមាជិកក្រុមការងារនៃគណៈកម្មការអន្តរក្រសួងសម្រាប់រៀបចំផែនការយុទ្ធសាស្រ្តអភិវឌ្ឍន៍ជាតិ បានអញ្ជើញចូលរួមពិធីប្រកាសផ្សព្វផ្សាយនិងដាក់ឱ្យប្រើប្រាស់ជាផ្លូវការផែនការយុទ្ធសាស្ត្រអភិវឌ្ឍន៍ជាតិ របស់រាជរដ្ឋាភិបាលនីតិកាលទី៧ នៃរដ្ឋសភា នៅសណ្ឋាគាររ៉េស៊ីដង់សុខា ភ្នំពេញ។
ពិធីនេះប្រព្រឹត្តទៅក្រោមអធិបតីភាពដ៏ខ្ពង់ខ្ពស់ឯកឧត្តម វង្សី វិស្សុត ឧបនាយករដ្ឋមន្រ្តីប្រចាំការ រដ្ឋមន្រ្តីទទួលបន្ទុកទីស្ដីការគណៈរដ្ឋមន្រ្តី តំណាងដ៏ខ្ពង់ខ្ពស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងមានការចូលរួមពីឯកឧត្តម លោកជំទាវ ទេសរដ្ឋមន្ត្រី រដ្ឋមន្ត្រី និងតំណាងក្រសួង-ស្ថាប័ន តំណាងសមាជិក សមាជិការដ្ឋសភា និងព្រឹទ្ធសភា ឯកអគ្គរាជទូត/ឯកអគ្គរដ្ឋទូត អភិបាលនៃគណៈអភិបាលរាជធានី ខេត្តតំណាងអាជ្ញាធរដែនដី ដៃគូអភិវឌ្ឍន៍ អង្គការសង្គមស៊ីវិលជាតិ-អន្តរជាតិ និងវិស័យឯកជន និងមន្រ្តីពាក់ព័ន្ធសរុបប្រមាណ ៨០០នាក់។
ឯកសារក្របខ័ណ្ឌគោលនយោបាយអភិវឌ្ឍន៍ជាតិ (ផ.យ.អ.ជ.) ស្ថិតនៅឋានានុក្រមទី៣, បន្ទាប់ពី កម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១, ដែលចែងអំពីចក្ខុវិស័យ គោលដៅ ចំណុចដៅ និងអាទិភាពចម្បងៗ នៃការអភិវឌ្ឍរបស់កម្ពុជា និងជាមូលដ្ឋានសម្រាប់ ការបន្ស៊ីគោលនយោបាយ ការកៀរគរ ធនធាន និងការអនុវត្តដែលផ្អែកលើលទ្ធផលនៅគ្រប់វិស័យ។
ផ.យ.អ.ជ. គឺជាក្របខ័ណ្ឌផែនការចង្អុលបង្ហាញ រយៈពេលមធ្យម នៅក្នុងបរិការណ៍សេដ្ឋកិច្ចទីផ្សារ និងជាឧបករណ៍គោលនយោបាយចម្បងក្នុងការអនុវត្តក្របខ័ណ្ឌយុទ្ធសាស្ត្ររួមរបស់រាជរដ្ឋាភិបាលសម្រាប់ការអភិវឌ្ឍសង្គមសេដ្ឋកិច្ច ដែលប្រែក្លាយការតម្រង់ទិសគោលនយោបាយធំៗ ដែលមានចែងក្នុងយុទ្ធសាស្ត្របញ្ចកោណដំណាក់ទី១ ឱ្យទៅជាកម្មវិធី គម្រោង និងសកម្មភាពជាក់ស្តែងដែលមានចរិតជាការកែទម្រង់ស៊ីជម្រៅ។ ផ.យ.អ.ជ. ក៏ជាការឆ្លុះបញ្ចាំងអំពីការប្តេជ្ញាចិត្តដ៏មោះមុតរបស់រាជរដ្ឋាភិបាល ក្នុងការធានានូវកំណើនប្រកបដោយបរិយាបន្ន ការអភិវឌ្ឍប្រកបដោយចីរភាព និងភាពធន់របស់កម្ពុជា និងជាផែនការប្រតិបត្តិថ្នាក់ជាតិ ដែលកសាងមូលដ្ឋាន គ្រឹះដ៏រឹងមាំសម្រាប់ឈានទៅសម្រេចចក្ខុវិស័យកម្ពុជា ឆ្នាំ២០៥០។
សូមជម្រាបជូនថា ផែនការយុទ្ធសាស្ត្រអភិវឌ្ឍន៍ជាតិ (ផ.យ.អ.ជ.) របស់រាជរដ្ឋាភិបាល នីតិកាលទី ៧ នៃរដ្ឋសភា ត្រូវទទួលបានការឯកភាពនាសម័យប្រជុំពេញអង្គគណៈរដ្ឋមន្ត្រី នៅថ្ងៃទី៤ ខែមេសា ឆ្នាំ២០២៥ ហើយបានទទួលការអនុម័តយល់ព្រមពីសម័យប្រជុំរដ្ឋសភាលើកទី៤ នីតិកាលទី៧ នៅថ្ងៃទី២២ ខែឧសភា ឆ្នាំ២០២៥ និងសម័យប្រជុំលើកទី៣ នៃព្រឹទ្ធសភានីតិកាលទី៥ នៅថ្ងៃទី២៩ ខែឧសភា ឆ្នាំ២០២៥ ព្រមទាំងត្រូវបានប្រកាសឱ្យប្រើប្រាស់ជាផ្លូវការដោយព្រះរាជក្រមលេខ នស/រកម/ ០៦២៥/០០៣ ចុះថ្ងៃទី១២ ខែមិថុនា ឆ្នាំ២០២៥៕
