រដ្ឋបាលខេត្តសៀមរាប ជំរុញឱ្យរដ្ឋបាលក្រុង ស្រុក បន្តពង្រឹងផ្សព្វផ្សាយពីវិធីបង្ការ និងការពារខ្លួនពីបាតុភូតរន្ទះបាញ់ ដល់ប្រជាពលរដ្ឋនៅមូលដ្ឋាន

សៀមរាប៖ លោក យុន លីនណេ អភិបាលរងខេត្ត តំណាង ឯកឧត្តម ប្រាក់ សោភ័ណ អភិបាល នៃគណៈអភិបាលខេត្ត នៅថ្ងៃទី៦ ខែតុលា ឆ្នាំ២០២៥ បានដឹកនាំកិច្ចប្រជុំពិភាក្សា និងស្ដាប់បទបង្ហាញពីប្រព័ន្ធប្រកាសអាសន្ន ស្ដីពីរន្ទះបាញ់របស់វិទ្យាស្ថានបច្ចេកវិទ្យាកម្ពុជា ដោយមានរួមពីអ្នកពាក់ព័ន្ធ។

លោក យុន លីនណេ មានប្រសាសន៍ថា បានជំរុញឱ្យអាជ្ញាធរមូលដ្ឋានបន្តពង្រឹងការងារផ្សព្វផ្សាយពីវិធីបង្ការ និងការពារខ្លួនពីបាតុភូតរន្ទះបាញ់ដល់ប្រជាពលរដ្ឋនៅមូលដ្ឋាន ខណៈគិតត្រឹមរយៈពេល ៩ខែ ឆ្នាំ២០២៥ ខេត្តសៀមរាប មានករណីរន្ទះបាញ់ ២៧ករណី បណ្ដាលឱ្យមនុស្ស ៦នាក់ស្លាប់, រងរបួស ៤៣នាក់ និងស្លាប់គោ ក្របី ១៨ក្បាល។

បច្ចុប្បន្ននៅក្នុងប្រទេសកម្ពុជា បាននឹងកំពុងទទួលរងនូវគ្រោះធម្មជាតិ ដែលបណ្ដាលមកពីការប្រែប្រួលអាកាសធាតុ ជាពិសេសបាតុភូត ឬគ្រោះមហន្តរាយដែលបណ្ដាលមកពីរន្ទះបាញ់ banកំពុងក្លាយជាគ្រោះថ្នាក់ដ៏សាហាវដែលកើតមានឡើងជារៀងរាល់ឆ្នាំ។ ជារៀងរាល់ឆ្នាំបាតុភូតនេះ បានបណ្ដាលឱ្យមានមនុស្ស សត្វស្លាប់ និងបណ្ដាលឱ្យទ្រព្យសម្បត្តិរបស់ប្រជាពលរដ្ឋជាច្រើនបានរងការខូចខាត និងបាត់បង់។ ជាមួយនឹងបញ្ហានេះ អាជ្ញាធរខេត្តសៀមរាប បាននឹងកំពុងយកចិត្តទុកដាក់ ក្នុងការដាក់ចេញនូវវិធានការការពារនានាពីផលប៉ះពាល់នៃគ្រោះមហន្តរាយ។

លោក អភិបាលរងខេត្ត សង្ឃឹមថា តាមរយៈបទបង្ហាញនាពេលនេះដែរ នឹងផ្ដល់នូវធាតុចូល និងបង្កើនចំណេះដឹងដល់អ្នកពាក់ព័ន្ធទូទាំងខេត្ត ដើម្បីយកចំណេះដឹងទាំងនេះទៅផ្សព្វផ្សាយបន្តដល់បងប្អូនប្រជាពលរដ្ឋនៅតាមមូលដ្ឋានរបស់ខ្លួន ពីវិធីបង្ការ និងការពារខ្លួនពីបាតុភូតគ្រោះធម្មជាតិផ្សេងៗ។

លោក ឆេង មុនីវឌ្ឍនា សាស្ត្រាចារ្យនៃសាកលវិទ្យាល័យបច្ចេកវិទ្យាកម្ពុជា បានឱ្យដឹងថា ដើម្បីការពារខ្លួនពីបាតុភូតរន្ទះបាញ់មានវិធីសាស្ត្រជាច្រើន ដូចជា នៅពេលមានភ្លៀងធ្លាក់ បើសិនជាយើងនៅទីវាល យើងមិនត្រូវជ្រកក្រោមដើមឈើ មិនត្រូវឈរលើដីទួល កុំនៅក្បែររបងដែក។ សម្រាប់នៅក្នុងផ្ទះពេលមានភ្លៀងធ្លាក់ យើងគួរមានឧបករណ៍ការពាររន្ទះ ត្រូវបិទគ្រឿងអេឡិចត្រូនិចដូចជា ទូរទស្សន៍ វិទ្យុ និងទូរស័ព្ទជាដើម៕