សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចូលរួមរំលែកទុក្ខយ៉ាងក្រៀមក្រំបំផុតចំពោះមរណភាព ឧត្តមសេនីយ៍ឯក យង់ សារិន ទីប្រឹក្សាក្រសួងការពារជាតិ
ភ្នំពេញ៖ នារសៀលថ្ងៃសៅរ៍ ទី៤ ខែតុលា ឆ្នាំ២០២៥នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់ឯកឧត្ដមវេជ្ជ. អ៊ុយ សំអាត និងសហការី ចូលរួមរំលែកទុក្ខយ៉ាងក្រៀមក្រំបំផុតជាមួយ លោកជំទាវ អូម សុភី និងក្រុមគ្រួសារទាំងអស់នៃសពចំពោះមរណភាព ឯកឧត្តម ឧត្តមសេនីយ៍ឯក យង់ សារិន ទីប្រឹក្សាក្រសួងការពារជាតិ កាលពីថ្ងៃសុក្រ ១១កើត ខែអស្សុជ ឆ្នាំម្សាញ់ សប្ដស័ក ព.ស.២៥៦៩ ត្រូវនឹងថ្ងៃទី៣ ខែតុលា ឆ្នាំ២០២៥ វេលាម៉ោង ៦:៣០នាទីព្រឹក ក្នុងជន្មាយុ ៦៦ឆ្នាំ ដោយរោគាពាធ។
ស្ថិតក្នុងសមានទុក្ខដ៏ក្រៀមក្រំនេះ ឯកឧត្ដមវេជ្ជ. អ៊ុយ សំអាត បានប្រគល់ជូនក្រុមគ្រួសារសពនូវសាររំលែកទុក្ខរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលមានខ្លឹមសារថា៖ “ក្នុងវេលាដ៏សែនក្តុកក្តួលនេះ ខ្ញុំ និងសហការីនៃកាកបាទក្រហមកម្ពុជា សូមសម្ដែងនូវក្តីសោកស្ដាយ និងស្រណោះអាឡោះអាល័យជាពន់ពេកជាមួយលោកជំទាវ ព្រមទាំងក្រុមគ្រួសារ ចំពោះការបាត់បង់ស្វាមី ឪពុក ជីតា និងញាតិសន្តានជាទីស្រឡាញ់ ប្រកបដោយព្រហ្មវិហារធម៌ គុណធម៌ដ៏ល្អប្រពៃនៅក្នុងគ្រួសារ។
ការលាចាកលោកនាពេលនេះ របស់ ឯកឧត្តម ឧត្តមសេនីយ៍ឯក យង់ សារិន ជាការបាត់បង់ថ្នាក់ដឹកនាំ មានសមត្ថភាព និងគុណតម្លៃខ្ពស់មួយរូប នៃកងយោធពលខេមរភូមិន្ទ ដែលបានធ្វើពលីកម្មគ្រប់បែបយ៉ាង ប្រកបដោយឆន្ទៈមោះមុត អង់អាចក្លាហាន និងចូលរួមធ្វើសកម្មភាពជាច្រើនក្នុងបុព្វហេតុបម្រើជាតិ មាតុភូមិ ការពារអធិបតេយ្យភាពជាតិ បូរណភាពទឹកដី ដើម្បីឧត្តមប្រយោជន៍ ជាតិ សាសនា ព្រះមហាក្សត្រ។
ខ្ញុំ និងសហការី សូមឧទ្ទិសបួងសួងដល់ដួងវិញ្ញាណក្ខន្ធ ឯកឧត្តម ឧត្តមសេនីយ៍ឯក យង់ សារិន បានទៅកាន់សុគតិភព កុំបីឃ្លៀងឃ្លាតឡើយ”៕
