ឡុងដ៍៖ បើតាមការចេញផ្សាយដោយទីភ្នាក់ងារសារព័ត៌មាន Reuters ចក្រភពអង់គ្លេស កាណាដា អូស្ត្រាលី និងព័រទុយហ្កាល់ បាននាំគ្នាទទួលស្គាល់រដ្ឋប៉ាឡេស្ទីនជាផ្លូវការ កាលពីថ្ងៃអាទិត្យ ទី២១ ខែកញ្ញា ជាការសកម្មភាពដែលពួកគេធ្វើឡើង ដោយសារតែខកចិត្តចំពោះអ៉ីស្រាអែលជុំវិញសង្រ្គាមនៅហ្កាហ្សា និងមានបំណងលើកកម្ពស់ដំណោះស្រាយរដ្ឋ២ ដោយជំរុញឱ្យមានការឆ្លើយតបទាំងកំហឹងពីសំណាក់អ៉ីស្រាអែល។
ការសម្រេចចិត្តរបស់ប្រទេសលោកខាងលិចទាំង៤ខាងលើ ដែលជាសម្ព័ន្ធមិត្តរបស់អ៉ីស្រាអែល បានផ្សារភ្ជាប់ពួកគេទៅនឹងប្រទេសច្រើនជាង១៤០ផ្សេងទៀតដែលបានគាំទ្រក្ដីប្រាថ្នារបស់ ប្រជាជនប៉ាឡេស្ទីនក្នុងការបង្កើតរដ្ឋឯករាជ្យមួយឡើង។ ការប្រកាសទទួលស្គាល់នេះដែរធ្វើឡើងខណៈអ៉ីស្រាអែលកំពុងបង្កើនការទម្លាក់គ្រាប់បែកឥតឈប់ឈរលើតំបន់ហ្កាហ្សាជាទីដែល ប្រជាជនប៉ាឡេស្ទីនកំពុងប្រឈមនឹងគ្រោះទុរភិក្ស និងរស់នៅក្នុងជីវិតយ៉ាងវេទនា។
នាយករដ្ឋមន្ត្រីអង់គ្លេស លោក Keir Starmer បានកត់សម្គាល់ថា «នៅថ្ងៃនេះ ដើម្បីស្ដារឡើងវិញនូវក្ដីសង្ឃឹមនៃសន្តិភាពសម្រាប់ប្រជាជនប៉ាឡេស្ទីន និងអ៉ីស្រាអែល រួមទាំងដំំណោះស្រាយរដ្ឋ២ ចក្រភពអង់គ្លេសសម្រេចទទួលស្គាល់រដ្ឋប៉ាឡេស្ទីនជាផ្លូវការ»។
ការទទួលស្គាល់របស់ចក្រភពអង់គ្លេសត្រូវបានគេមើលឃើញជានិមិត្តរូបមួយដ៏ពិសេស ដោយសារតែអង់គ្លេស បានចូលរួមចំណែកយ៉ាងធំក្នុងការជួយបង្កើតរដ្ឋអ៉ីស្រាអែល ក្រោយសង្រ្គាមលោកលើកទី២។ ក៏ប៉ុន្តែ នាយករដ្ឋមន្ត្រីអ៉ីស្រាអែល លោក Benjamin Netanyahu បានថ្កោលទោសការទទួលស្គាល់រដ្ឋប៉ាឡេស្ទីន ដោយចាត់ទុកថាជាការផ្ដល់រង្វាន់ឱ្យភេរវករ។
គួរបញ្ជាក់ថា ប្រទេសដទៃទៀត ក្នុងនោះរួមមានទាំងបារាំង ត្រូវបានរំពឹងថានឹងប្រកាសទទួលស្គាល់រដ្ឋប៉ាឡេស្ទីនជាផ្លូវការនៅឯមហាសន្និបាតអង្គការសហប្រជាជាតិក្នុងទីក្រុងញូវយ៉ក ក្នុងសប្ដាហ៍នេះ៕
