ប៉ូលិសកុបកម្មថៃ ត្រៀមរថយន្តមានកាណុងបាញ់ទឹកចំនួន១០គ្រឿង ដើម្បីឆ្លើយតបនឹងការតវ៉ារបស់ពលរដ្ឋខ្មែរនៅភូមិព្រៃចាន់

បាងកក៖ បើតាមការចុះផ្សាយរបស់កាសែត The Nation នៅថ្ងៃទី១៨កញ្ញា ក្រោយប្រើឧស្ម័នបង្ហូរទឹកភ្នែក អាវុធសូរសព្ទ និងបាញ់គ្រាប់កាំភ្លើងកៅស៊ូឥតត្រាប្រណីមកលើប្រជាជនស្លូតត្រង់កម្ពុជា ប៉ូលិសកុបកម្មនៅ ប្រទេស ថៃបានត្រៀមរថយន្ត មានកាណុងបាញ់ទឹក ចំនួន១០គ្រឿងដើម្បីឆ្លើយតប នឹង ការតវ៉ារបស់ពលរដ្ឋខ្មែរ នៅភូមិព្រៃចាន់ ខេត្តបន្ទាយមានជ័យ ដោយរង់ចាំការបញ្ជា ពី ប៉ូលិសភូមិន្ទថៃ (RTP) សម្រាប់ការចល័ត។

នៅថ្ងៃទី១៧ ខែកញ្ញា កងទ័ពថៃចូលមកបំពានកម្ពុជាសាជាថ្មី នៅភូមិព្រៃចាន់ ដោយធ្វើសកម្មភាពយ៉ាងធ្ងន់ធ្ងរជាងលើកមុនៗ រហូតបណ្ដាលឱ្យកងទ័ព ព្រះសង្ឃ និងប្រជាជនខ្មែរមួយចំនួនរងរបួស។ ប៉ូលិសថៃបាន ប្រើឧស្ម័នបង្ហូរទឹកភ្នែកអាវុធសូរសព្ទ និង បាញ់គ្រាប់កៅស៊ូដើម្បីបំបែកការតវ៉ា។

លោក ឆៃគ្រីត ផូអា មេបញ្ជាការផ្នែកការពារ និងត្រួតពិនិត្យក្រុមមនុស្ស (PCCD) បានបញ្ជាក់ថា ប៉ូលិសភូមិន្ទថៃ បានណែនាំដល់ផ្នែករៀបចំសម្រាប់ប្រតិបត្តិការត្រួតពិនិត្យក្រុមមនុស្ស។ នេះរួមបញ្ចូលទាំងការ ចល័តរថយន្តដឹកទឹកចំនួន១០គ្រឿង ដែល ត្រៀមខ្លួនរួចរាល់សម្រាប់ចេញប្រតិបត្តិការ។

រថយន្ត មានកាណុងបាញ់ទឹកទាំងនេះ ពីមុនប្រើដើម្បីបំបែកក្រុមបាតុករគាំទ្រលទ្ធិប្រជាធិបតេយ្យក្នុងខែតុលា ឆ្នាំ២០២០ អាចផ្ទុកទឹកចំណុះ១២០០០លីត្រ និងអាចបាញ់ទឹកបានចម្ងាយរហូតដល់៦៥ម៉ែត្រ។ បន្ថែមពីលើកាណុងបាញ់ទឹក រថយន្តដឹកទឹកត្រូវបានបំពាក់ជាមួយអាវុធសូរសព្ទ ក៏ដូចជាឧបករណ៍បាញ់ឧស្ម័នបង្ហូរទឹកភ្នែក។

រថយន្តទាំងនោះ ត្រូវបានបំពាក់ដោយកង់ការពារគ្រាប់កាំភ្លើង និងទ្រុងដែកនៅខាងមុខ ដើម្បីជម្រះឧបសគ្គ។ វាក៏ត្រូវបានបំពាក់ដោយកាមេរ៉ាឃ្លាំមើលជុំវិញផងដែរ ដើម្បីកត់ត្រាព្រឹត្តិការណ៍នានាសម្រាប់ការប្រើប្រាស់ផ្លូវច្បាប់នាពេលអនាគត។

ទឹកដែលត្រូវបាញ់ចេញអាចជាទឹកពណ៌ ដែលត្រូវបានរចនាឡើងដើម្បីពិបាកក្នុងការលាងចេញ ធ្វើឱ្យវាក្លាយជាយុទ្ធសាស្ត្រដ៏មានប្រយោជន៍សម្រាប់សម្គាល់ក្រុមបាតុករដែលព្យាយាមចូលរួមជាមួយក្រុមមនុស្សឡើងវិញបន្ទាប់ពីការបែកខ្ញែក។ គួរបញ្ជាក់ថា យុទ្ធសាស្ត្រស្រដៀងគ្នានេះ ត្រូវបានគេប្រើនៅចុងឆ្នាំ២០១៣ ក្នុងអំឡុងពេលប៉ះទង្គិចគ្នាជាមួយក្រុមបាតុកររបស់គណៈកម្មាធិការកំណែទម្រង់ប្រជាធិបតេយ្យប្រជាជន (PDRC)៕