អភិបាលខេត្តពោធិ៍សាត់ អញ្ជើញចូលរួមបិទវគ្គបណ្តុះបណ្តាលស្តីពី កិច្ចការលេខាធិការដ្ឋានក្រុមការងាររាជរដ្ឋាភិបាលចុះមូលដ្ឋាន

ពោធិ៍សាត់៖ ឯកឧត្តម ខូយ រីដា អភិបាល នៃគណៈអភិបាលខេត្តពោធិ៍សាត់ បានអញ្ជើញចូលរួមបិទវគ្គបណ្តុះបណ្តាលស្តីពី កិច្ចការលេខាធិការដ្ឋានក្រុមការងាររាជរដ្ឋាភិបាលចុះមូលដ្ឋាន ក្រោមអធិបតីភាព ឯកឧត្តម សក់ សេដ្ឋា ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានលេខាធិការដ្ឋាន ក.រ.ម នៅសាលប្រជុំធំថ្មីសាលាខេត្ត នារសៀលថ្ងៃអង្គារ ទី១៦ ខែកញ្ញា ឆ្នាំ២០២៥។

ឯកឧត្តម សក់ សេដ្ឋា បានមានប្រសាសន៍ថា ក្រុមការងាររាជរដ្ឋាភិបាលចុះមូលដ្ឋាន គឺជាយន្ដការដ៏សំខាន់មួយរបស់ រាជរដ្ឋាភិបាលក្នុងការចុះជួយតម្រង់ទិស គាំទ្រ លើកកម្ពស់ កែលម្អ និងជំរុញការផ្សារភ្ជាប់រវាងការអនុវត្ដយុទ្ធសាស្រ្ដ និងផែនការអភិវឌ្ឍន៍របស់ថ្នាក់ក្រោមជាតិតាមភូមិ ឃុំ និងស្រុក ទៅនឹងរបៀបវារៈនៃការអភិវឌ្ឍគោលនយោបាយ និងយុទ្ធសាស្រ្ដថ្នាក់ជាតិ ដើម្បីបន្ដលើកស្ទួយសុខុមាលភាពប្រជាពលរដ្ឋ ការធ្វើឱ្យប្រសើរឡើងនូវសេវាសាធារណៈ ការបន្ដពង្រីកហេដ្ឋារចនាសម្ព័ន្ធគន្លឹះ និងការធានាឱ្យបានសណ្ដាប់ធ្នាប់ សុខសន្ដិភាព និងសុវត្ថិភាព ព្រមទាំងការដោះស្រាយបញ្ហាប្រឈមផ្សេងៗ ដែលបានកើតឡើងនៅមូលដ្ឋានផ្ទាល់។

ក្នុងពិធីបិទវគ្គបណ្តុះបណ្តាលនេះក៏មានការចូលរួមពីគណៈប្រតិភូអមដំណើរ,លោកនាយករងរដ្ឋបាលសាលាខេត្ត,លោកនាយកទីចាត់ការហិរញ្ញវត្ថុសាលាខេត្ត,លោកអភិបាល អភិបាលរងក្រុង ស្រុកទាំង៦,លោក លោកស្រី នាយកទីចាត់ការ ប្រធានការិយាល័យ សមាជិកលេខាធិការដ្ឋានថ្នាក់ខេត្ត,លោក លោកស្រី ទទួលបន្ទុកបូករសរុបរបាយការណ៍ ក្រុង ស្រុក,លោក លោកស្រីមេឃុំ ចៅសង្កាត់ និងស្មៀនឃុំ សង្កាត់ និងលោក លោកស្រីជាមន្ត្រីពាក់ព័ន្ធមួយចំនួនទៀត។

សូមជម្រាបជូនថា ការរៀបចំឱ្យមានវគ្គបណ្តុះបណ្តាលនេះឡើង គឺដើម្បីពង្រឹងសមត្ថភាព ដល់មន្ត្រីលេខាធិការដ្ឋាន ក្រុមការងាររាជរដ្ឋាភិបាលចុះមូលដ្ឋាន ពាក់ព័ន្ធនឹងតួនាទី ភារកិច្ច របៀបរបបការងារ របស់លេខាធិការដ្ឋានក្រុមការងារ រាជរដ្ឋាភិបាលចុះមូលដ្ឋាន និងការរៀបចំរបាយការណ៍បូកសរុបលទ្ធផលការងារចុះ មូលដ្ឋានឱ្យបានត្រឹមត្រូវ និងមាន គុណភាពកាន់តែល្អប្រសើរជាងមុន៕