មូស្គូ៖ បើតាមការចេញផ្សាយដោយ ទីភ្នាក់ងារព័ត៌មាន AFP ក្រសួងការពារជាតិរុស្ស៉ី បានប្រកាសថា នាថ្ងៃសុក្រ ទី១២ ខែកញ្ញា កងទ័ពរុស្ស៉ីនិងបេឡារុស បានចាប់ផ្តើមការធ្វើសមយុទ្ធយោធាទ្រង់ទ្រាយធំរួមគ្នា ដែលប្រព្រឹត្តទៅក្នុងទឹកដីប្រទេសទាំងពីរ ព្រមទាំងនៅតំបន់សមុទ្រ Baltic និងសមុទ្រ Barent។
សមយុទ្ធ Zapad-2025 ដែលជាការដំឡើងសាច់ដុំរវាងរុស្ស៉ី ជាមួយបេឡារុសដែលជាសម្ព័ន្ធមិត្តដ៏ជិតស្និទ្ធរបស់ខ្លួន គឺប្រព្រឹត្តទៅ ចំពេលវេលាដ៏តានតឹនមួយ ក្នុងសង្រ្គាមរុស្ស៉ី-អ៊ុយក្រែន ពោលគឺ២ថ្ងៃបន្ទាប់ពីប៉ូឡូញ បានបាញ់ទម្លាក់ដ្រូនមួយចំនួន ដែលសង្ស័យថាជា របស់រុស្ស៉ី នៅលើដែនអាកាសរបស់ខ្លួន។
គួរបញ្ជាក់ថា សមយុទ្ធយោធាខាងលើ ត្រូវបានគ្រោងតាំងពីយូរមកហើយ មុនឧប្បត្តិហេតុដ្រូនកើតមានឡើងទៅទៀត ហើយកាលពី ថ្ងៃព្រហស្បតិ៍ អ្នកនាំពាក្យវិមានក្រឹមឡាំង លោក Dmitry Peskov បានអះអាងថា ការធ្វើសមយុទ្ធនេះ ដែលរួមមានទាំងនៅក្បែរ ព្រំប្រទល់ប៉ូឡូញ គឺគ្មានគោលដៅប្រឆាំងប្រទេសដទៃណាមួយឡើយ។
យ៉ាងណាមិញ សមាជិកចំនួន៣របស់ អង្គការ NATO រួមមានប៉ូឡូញ លីទុយអានី និងឡេតូនី ដែលមានព្រំប្រទល់ជាប់បេឡារុស បាននិងកំពុងស្ថិតក្នុងការប្រុងជើងការខ្ពស់ ហើយប្រទេសអឺរ៉ុបទាំង៣ បានបង្កើនសន្តិសុខយ៉ាងខ្លាំង នៅមុនសមយុទ្ធរុស្ស៉ី-បេឡារុស ខណៈប៉ូឡូញសម្រេចបិទព្រំប្រទល់ទាំងស្រុងតែម្តងជាមួយបេឡារុស សម្រាប់អំឡុងពេលសមយុទ្ធ៕
