ទេសរដ្ឋមន្រ្តី លី ធុជ៖ ក្រោយបញ្ចប់សង្រ្គាមរ៉ាំរ៉ៃនៅកម្ពុជា ម៉ាឡេស៊ីបានដើរតួនាទីមួយយ៉ាងសំខាន់ក្នុងការសម្រេចចិត្តមកធ្វើការវិនិយោគ និងការស្តារឡើងវិញនូវសេដ្ឋកិច្ចរបស់កម្ពុជា
ភ្នំពេញ៖ នៅថ្ងៃអាទិត្យ ទី៣១ ខែសីហា ឆ្នាំ២០២៥ នាឯនិវេសនដ្ឋានស្ថានទូតម៉ាឡេស៊ីប្រចាំកម្ពុជា ឯកឧត្ដមបណ្ឌិត លី ធុជ ទេសរដ្ឋមន្រ្តី អនុប្រធានទី១ អាជ្ញាធរមីន បានអញ្ជើញចូលរួមក្នុងពិធីអបអរសាទរខួបលេីកទី៦៨ នៃទិវាបុណ្យជាតិសហព័ន្ធម៉ាឡេស៊ី។
តាងនាមឱ្យរាជរដ្ឋាភិបាល និងប្រជាជនកម្ពុជា ឯកឧត្តមទេសរដ្ឋមន្រ្តី លី ធុជ បានសម្តែងនូវការអបអរសាទរជាមួយប្រទេស និងប្រជាជនម៉ាឡេស៊ី ក្នុងឱកាសប្រារព្ធខួបលេីកទី៦៨ នៃទិវាបុណ្យជាតិ និងសូមជូនពរអោយប្រទេស និងប្រជាជនម៉ាឡេស៊ី ទទួលបាននូវវឌ្ឍនភាព វិបុលភាព និងការអភិវឌ្ឍ។
ឯកឧត្ដមទេសរដ្ឋមន្រ្តី ក៏បានវាយតម្លៃខ្ពស់ចំពោះទំនាក់ទំនង និងមិត្តភាពជាប្រវត្តិសាស្ត្រ ជាបងប្អូនល្អ រវាងប្រទេស និងប្រជាជននៃកម្ពុជា-ម៉ាឡេស៊ី ជាពិសេសបានបន្តភាពជាដៃគូយ៉ាងរឹងមាំ និងកាន់តែជិតស្និទ្ធ បន្ទាប់ពីប្រទេសទាំងពីរបានកសាងនូវទំនាក់ទំនងការទូតជាផ្លូវការ អស់រយៈពេល ៦៨ឆ្នាំ ចាប់ថ្ងៃទី៣១ ខែសីហា ឆ្នាំ១៩៥៧។ ប្រទេសម៉ាឡេស៊ី គឺជាប្រទេសក្នុងចំណោមប្រទេសដទៃទៀត ដែលបានចូលរួមយ៉ាងសកម្មក្នុងដំណើរស្វែងរកសន្តិភាពនៅកម្ពុជាដើម្បីបញ្ចប់ការវិលត្រឡប់មកវិញរបស់របបខ្មែរក្រហម និងការបញ្ជូនកងកម្លាំងរបស់ខ្លួននៅឆ្នាំ១៩៩៣ ក្នុងការរួមចំណែកដល់បេសកម្មសម័យ UNTAC ផងដែរ។
ឯកឧត្តមបណ្ឌិត លី ធុជ បានគូសបញ្ជាក់ទៀតថា ក្រោយបញ្ចប់សង្រ្គាមរ៉ាំរ៉ៃនៅកម្ពុជា ប្រទេសម៉ាឡេស៊ី បានដើរតួនាទីមួយយ៉ាងសំខាន់ក្នុងការសម្រេចចិត្តមកធ្វើការវិនិយោគ និងការស្តារឡើងវិញនូវសេដ្ឋកិច្ចរបស់កម្ពុជា។
ឯកឧត្តមទេសរដ្ឋមន្រ្តី បានទទួលស្គាល់ការគាំទ្រ និងភាពជាដៃគូ ក្នុងការរួមចំណែកជំរុញកិច្ចខិតខំប្រឹងប្រែងដល់ការអភិវឌ្ឍសេដ្ឋកិច្ចសង្គមជូនដល់ប្រជាពលរដ្ឋកម្ពុជានៅតាមមូលដ្ឋាន តាមរយៈការឧបត្ថម្ភគាំទ្ររបស់ក្រុមហ៊ុន និងអង្គការសង្គមស៊ីវិលរបស់ប្រទេសម៉ាឡេស៊ី ។
ជាចុងបញ្ចប់ ឯកឧត្ដមទេសរដ្ឋមន្រ្តី លី ធុជ បានសម្តែងនូវការដឹងគុណ និងថ្លែងអំណរគុណយ៉ាងជ្រាលជ្រៅដល់ ឯកឧត្តម Dato’ Seri Anwar Ibrahim នាយករដ្ឋមន្ត្រីម៉ាឡេស៊ី និងថ្នាក់ដឹកនាំប្រទេសម៉ាឡេស៊ី ក្នុងនាមជាប្រធានអាស៊ានប្តូរវេន ដែលបានសម្របសម្រួលឱ្យមានបទឈប់បាញ់គ្នារវាងកម្ពុជា-ថៃ ដែលមានការចូលរួមពីសហរដ្ឋអាមេរិក និងប្រទេសចិន។
ឯកឧត្ដមទេសរដ្ឋមន្រ្តី លី ធុជ ក៏បានកោតសរសើរ និងថ្លែងអំណរគុណជូនចំពោះ ឯកឧត្តម Shaharuddin Onn ឯកអគ្គរាជទូតម៉ាឡេស៊ីប្រចាំកម្ពុជា ដែលបានសម្របសម្រួល និងចូលរួមដឹកនាំក្នុងការកសាងភ្ជាប់ទំនាក់ទំនងការទូត មិត្តភាព និងកិច្ចសហការប្រតិបត្តិការឱ្យកាន់តែស៊ីជម្រៅ ដេីម្បីផលប្រយោជន៍នៃប្រទេស និងប្រជាជនទាំងពីរ កម្ពុជា-ម៉ាឡេស៊ី។
ឯកឧត្ដម លី ធុជ ក៏បានថ្លែងអំណរគុណដល់អនុព័ន្ធយោធាម៉ាឡេស៊ី ប្រចាំកម្ពុជា ដែលបានដឹកនាំក្រុមអ្នកសង្កេតការណ៍អន្តរកាល (IOT) ចុះទីតាំងជាក់ស្តែងដើម្បីសង្កេត ផ្ទៀងផ្ទាត់ និងរាយការណ៍អំពីបទឈប់បាញ់រវាងកម្ពុជា-ថៃ៕
