លោក វ៉ាង យី អំពាវនាវឱ្យប៉ាគីស្ថាន និងអាហ្គានីស្ថាន ពង្រឹងការផ្លាស់ប្ដូរត្រីភាគីនៅគ្រប់កម្រិតទាំងអស់
ប៉េកាំង៖ កាលពីថ្ងៃពុធទី២០ ខែសីហា រដ្ឋមន្ត្រីការបរទេសចិន លោក វ៉ាង យី បានអំពាវនាវឱ្យប៉ាគីស្ថាន និងអាហ្គានីស្ថាន ពង្រឹងការផ្លាស់ប្ដូរត្រីភាគីនៅគ្រប់កម្រិតទាំងអស់ ខណៈរដ្ឋធានីប៉េកាំង ជំរុញឱ្យពង្រឹងសន្តិសុខជាមួយប្រទេសជិតខាង។ នេះបើយោងតាមសេចក្តីថ្លែងការណ៍របស់ក្រសួងការបរទេសចិន។
លោក វ៉ាង ដែលបានចូលរួមកិច្ចប្រជុំបីផ្លូវជាមួយសមភាគីប៉ាគីស្ថាន និងអាហ្គានីស្ថាន នៅទីក្រុងកាប៊ុល កាលពីថ្ងៃពុធទី២០សីហា បាននិយាយថា ប្រទេសទាំង៣ គួរតែបន្តកសាងទំនុកចិត្តទៅវិញទៅមកជាយុទ្ធសាស្ត្រ និងធ្វើឱ្យកិច្ចសហប្រតិបត្តិការសន្តិសុខកាន់តែស៊ីជម្រៅ។
អ្នកការទូតជើងចាស់រូបនេះ បាននិយាយនៅថ្ងៃព្រហស្បតិ៍ទី២១ ខែសីហានេះថា ប្រទេសចិន បានត្រៀមខ្លួនរួចជាស្រេចក្នុងការយល់ និងគាំទ្របញ្ហា ដែលពាក់ព័ន្ធនឹងផលប្រយោជន៍ស្នូលរបស់ប្រទេសនីមួយៗ និងប្រឆាំងយ៉ាងម៉ឺងម៉ាត់ នូវការជ្រៀតជ្រែកពីខាងក្រៅនៅក្នុងតំបន់ ក៏ដូចជាអង្គការ ឬបុគ្គលណាមួយដែលបំផ្លាញអធិបតេយ្យភាពជាតិរបស់គ្នាទៅវិញទៅមក។
លោក វ៉ាង លើកឡើងថា វាចាំបាច់ដើម្បីកែលម្អយន្តការសន្ទនាសន្តិសុខ ពង្រឹងការអនុវត្តច្បាប់ និងកិច្ចសហប្រតិបត្តិការសន្តិសុខឱ្យស៊ីជម្រៅ ពង្រឹងការប្រយុទ្ធប្រឆាំងនឹងសកម្មភាពភេរវករឆ្លងដែន និងលុបបំបាត់មូលដ្ឋាននៃអំពើភេរវកម្ម។
យ៉ាងណាមិញ សេចក្តីថ្លែងការណ៍មិនបានលើកឡើងអំពីក្រុមភេរវករណាមួយទេ ប៉ុន្តែរបាយការណ៍របស់ប្រព័ន្ធផ្សព្វផ្សាយរដ្ឋចិន ស៊ិនហួ ស្តីពីកិច្ចប្រជុំរបស់លោក វ៉ាង ជាមួយរដ្ឋមន្ត្រីការបរទេសស្តីទីអាហ្គានីស្ថាន លោក អាមៀ ខាន់ មូតាគី បានលើកឡើងអំពីចលនាអ៊ីស្លាមទួគីស្ថានខាងកើត។
របាយការណ៍ បាន ដក ស្រង់ សម្តី លោក វ៉ាង ដោយ និយាយ ថា ចិន សង្ឃឹម ថា អាហ្គានីស្ថាន នឹង បង្កើន កិច្ច ខិត ខំ ប្រឹង ប្រែង ដើម្បី ប្រយុទ្ធ ប្រឆាំង នឹង កម្លាំង ភេរវករ បែប នេះ។ មិនត្រឹមតែប៉ុណ្ណោះ លោក វ៉ាង ក៏បានប្រាប់សមភាគីរបស់លោកថា ប្រទេសទាំងបី គួរតែពង្រីកកិច្ចសហប្រតិបត្តិការអភិវឌ្ឍន៍ ការផ្លាស់ប្ដូរពាណិជ្ជកម្ម និងការវិនិយោគ និងការតភ្ជាប់បណ្តាញ។
គួរជម្រាបថា ចិនមានព្រំដែន៥៩៦គីឡូម៉ែត្រជាមួយប្រទេសប៉ាគីស្ថាន ដែលរត់កាត់ជួរភ្នំ Karakoram លាតសន្ធឹងពីចំណុចបីជាមួយអាហ្គានីស្ថាន ទៅតំបន់ជម្លោះជាមួយឥណ្ឌាក្បែរផ្ទាំងទឹកកក Siachen។ ជាមួយប្រទេសអាហ្គានីស្ថាន ប្រទេសចិន មានព្រំដែន៩២គីឡូម៉ែត្រ៕
