ឯកឧត្តមបណ្ឌិត ស៊ូនី វង្សវិសិដ្ឋ ចូលរួមជាអធិបតីនិងជាហត្ថលេខី ក្នុងពិធីចុះហត្ថលេខាកិច្ចព្រមព្រៀងគម្រោង រវាងក្រសួងសង្គមកិច្ច ជាមួយសមាគមនិងអង្គការមិនមែនរដ្ឋាភិបាលចំនួន ១៦ ផ្តោតលើវិស័យកិច្ចការពារកុមារ វិស័យគាំពារជនរងគ្រោះ និងវិស័យសុខុមាលភាពជនពិការ
ភ្នំពេញ៖ ឯកឧត្តមបណ្ឌិត ស៊ូនី វង្សវិសិដ្ឋ រដ្ឋលេខាធិការក្រសួងសង្គមកិច្ច អតីតយុទ្ធជន និងយុបនីតិសម្បទា នាព្រឹកថ្ងៃសុក្រ ទី៨ ខែសីហា ឆ្នាំ២០២៥ តំណាងដ៏ខ្ពង់ខ្ពស់ ឯកឧត្តម ជា សុមេធី រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា បានចូលរួមជាអធិបតី និងជាហត្ថលេខី ក្នុងពិធីចុះហត្ថលេខាកិច្ចព្រមព្រៀងគម្រោង រវាងក្រសួងសង្គមកិច្ច អតីតយុទ្ធជន និងយុវនីតិសម្បទា ជាមួយសមាគម និងអង្គការមិនមែនរដ្ឋាភិបាលចំនួន ១៦ ដែលអនុវត្តគម្រោងផ្តោតលើវិស័យកិច្ចការពារកុមារ វិស័យគាំពារជនរងគ្រោះ និងវិស័យសុខុមាលភាពជនពិការ។
ក្នុងអង្គការមិនមែនរដ្ឋាភិបាលទាំងអស់ដែលបានចុះហត្ថលេខានាពេលនេះ មានអង្គការមិនមែនរដ្ឋាភិបាលបរទេសចំនួន១២ អង្គការមិនមែនរដ្ឋាភិបាលក្នុងស្រុកចំនួន ៤ ដោយភាគច្រើនអនុវត្តគម្រោង នៅរាជធានីភ្នំពេញ និងតាមបណ្ដាខេត្តមួយចំនួននៅក្នុងប្រទេសកម្ពុជា ក្នុងទំហំគម្រោង ថវិកា សរុបប្រមាណជាង ៩លានដុល្លារ ដោយសមីអង្គការជាអ្នកអនុវត្តគម្រោងដោយផ្ទាល់សម្រាប់ រយៈពេល៣ឆ្នាំ (២០២៥-២០២៨)។
ភាពជាដៃគូក្នុងកិច្ចសហប្រតិបត្តិការរវាងក្រសួងសង្គមកិច្ច អតីតយុទ្ធជន និងយុវនីតិសម្បទា និងសមាគម អង្គការមិនមែនរដ្ឋាភិបាល ត្រូវបានបន្តបង្កើតឡើង តាមរយៈការចុះកិច្ចព្រមព្រៀងគម្រោងជាបន្តបន្ទាប់។ រហូតមកដល់ពេលនេះ មានសមាគម អង្គការមិនមែនរដ្ឋាភិបាលក្នុងស្រុក និងបរទេសចំនួន ១៧៧ បានចុះកិច្ចព្រមព្រៀងគម្រោងជាមួយក្រសួងស.អ.យ.៕
