អ្នកនាំពាក្យរាជរដ្ឋាភិបាល៖ សម្តេចតេជោ និងសម្តេចធិបតី តែងតែផ្តល់តម្លៃខ្ពស់ណាស់ដល់សន្តិភាព
ភ្នំពេញ៖ ថ្លែងនៅក្នុងសន្និសីទសារព័ត៌មានស្តីពី «លទ្ធផលនៃការអនុវត្តបទឈប់បាញ់រវាងកម្ពុជា-ថៃ» នៅរសៀលថ្ងៃទី០៨ ខែសីហា ឆ្នាំ២០២៥ ឯកឧត្ដម ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល បានលើកឡើងថា សម្តេចតេជោ ហ៊ុន សែន ប្រធានព្រឹទ្ធសភា និងសម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា តែងតែផ្តល់តម្លៃខ្ពស់ណាស់ដល់សន្តិភាព ព្រោះសន្តិភាពជាមូលដ្ឋានគ្រឹះនៃការអភិវឌ្ឍប្រទេស និងជាប្រភពនៃភាពសុខសាន្តរបស់ប្រជាពលរដ្ឋ។
ឯកឧត្ដម ប៉ែន បូណា បញ្ជាក់ថា “សម្តេចតេជោ ហ៊ុន សែន ប្រធានព្រឹទ្ធសភា និងសម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា តែងតែផ្តល់តម្លៃខ្ពស់ណាស់ដល់សន្តិភាព ពីព្រោះសន្តិភាពជាមូលដ្ឋានគ្រឹះនៃការអភិវឌ្ឍប្រទេស និងជាប្រភពនៃភាពសុខសាន្តរបស់ប្រជាពលរដ្ឋ”។
ឯកឧត្ដម ប៉ែន បូណា បានបន្ថែម ដើម្បីចង់បានសន្តិភាពនេះ កម្ពុជាបានគាំទ្រ និងការពារយ៉ាងម៉ឺនម៉ាត់នូវកិច្ចព្រមព្រៀង ឈប់បាញ់រវាងកម្ពុជា និងថៃ ដែលសម្រេចបានក្នុងកិច្ចប្រជុំពិសេសកាលពីថ្ងៃទី២៨ ខែកក្កដា ឆ្នាំ២០២៥ នៅប្រទេសម៉ាឡេស៊ី, កម្ពុជាក៏បានអនុវត្តន៍យ៉ាងខ្ជាប់ខ្ជួននូវកិច្ចព្រមព្រៀងឈប់បាញ់ ហើយកំពុងតែជំរុញនិងអនុវត្តយ៉ាងសកម្មនូវលទ្ធផលនៃកិច្ចប្រជុំវិសាមញ្ញានៃគណកម្មាធិការព្រំដែនទូទៅ កម្ពុជា-ថៃ នៅទីក្រុងកូឡាឡាំពួ កាលពីថ្ងៃទី ០៧ ខែសីហា ឆ្នាំ២០២៥ផងដែរ៕
