អ្នកនាំពាក្យក្រសួងការបរទេស៖ កម្ពុជាបង្ហាញការព្រួយបារម្ភទាំងផ្នែកច្បាប់ និងសីលធម៌ចំពោះយោធិនទាំង១៨នាក់ដែលថៃចាប់ទៅ
ភ្នំពេញ៖ ថ្លែងក្នុងសន្និសីទសារព័ត៌មានស្តីពីការអនុវត្តបទឈប់បាញ់នាថ្ងៃទី៨ ខែសីហា ឆ្នាំ២០២៥នេះ ឯកឧត្តម ជុំ សុន្ទរី អ្នកនាំពាក្យក្រសួងការបរទេសកម្ពុជា បានបង្ហាញ ការព្រួយបារម្ភទាំងផ្នែកច្បាប់ និងសីលធម៌ចំពោះយោធិនរបស់កម្ពុជា ដែលថៃចាប់ទៅខណៈកំពុងអនុវត្ត កិច្ចព្រមព្រៀងបទឈប់បាញ់ ហើយកម្ពុជាបន្តអំពាវនាវយ៉ាងទទួចឲ្យថៃធ្វើការដោះលែងពួកគេទាំង១៨នាក់នោះជាបន្ទាន់ដោយគ្មានលក្ខខណ្ឌ។
ឯកឧត្តម ជុំ សុន្ទរី បានលើកឡើងថា កម្ពុជាបានវាយតម្លៃខ្ពស់ចំពោះគណៈកម្មការកាកកបាទក្រហមអន្តរជាតិ ដែលបានអញ្ជើញចុះសួរសុខទុក្ខដល់យោធិនកម្ពុជា១៨នាក់ដែលត្រូវបានថៃធ្វើការឃុំឃាំង ខណៈដំណើរចុះសួរសុខទុក្ខនេះ គឺដើម្បីធានានូវសិទ្ធិជាមូលដ្ឋាន និងភាពថ្លៃថ្នូរបស់យោធិនខ្មែរទាំង១៨នាក់នោះត្រូវបានគោរពដោយអាជ្ញាធរថៃ ស្របទៅតាមអនុសញ្ញាទីក្រុងហ្សឺណែវឆ្នាំ១៩៤៩ និងច្បាប់មនុស្សធម៌អន្តរជាតិ។
ឯកឧត្តមអ្នកនាំពាក្យក្រសួងការបរទេសកម្ពុជាបានសង្កត់ធ្ងន់ថា«ការបន្តឃុំឃាំងយោធិនទាំង១៨រូបដែលត្រូវបានចាប់ខ្លួនក្នុងពេលកំពុងអនុវត្តបទឈប់បាញ់ គឺបានបង្កឡើងនូវការព្រួយបារម្ភទាំងផ្នែក ច្បាប់ទាំងផ្នែកសីលធម៌»។
យ៉ាងណាក៏ដោយរាជរដ្ឋាភិបាលកម្ពុជា សូមឲ្យមានការធ្វើមាតុភូមិនិវត្តន៍ជាបន្ទាន់ ដោយឥតលក្ខខណ្ឌចំពោះយោធិនកម្ពុជាទាំង១៨រូបនោះ និងទាមទារឲ្យថៃផ្តល់អាទិភាពចំពោះកិច្ចសន្ទនាដោយ សុច្ចចិត្ត និងការកាត់បន្ថយភាពតានតឹងក្នុងស្មារតីសន្តិភាព និងកិច្ចសហប្រតិបត្តិការ។
សូមបញ្ជាក់ថា ទាក់ទងនឹងវិរៈកងទ័ពកម្ពុជា ចំនួន១៨នាក់ដែលស្ថិននៅក្រោមការគ្រប់គ្រងរបស់ទាហានថៃនេះដែរ កម្ពុជាបានស្នើឲ្យម៉ាឡេស៊ីដែលជាប្រធានអាស៊ានប្តូរវេននោះឲ្យជួយអន្តរាគមន៍ ដើម្បីជំរុញឲ្យភាគីថៃឆាប់បញ្ជូនពួកគាត់ឲ្យមកកម្ពុជាវិញឲ្យបានឆាប់ៗនេះផងដែរ៕
