អ្នកនាំពាក្យការពារជាតិកម្ពុជា ប្រាប់ទៅចោរឈ្លានពានសៀមថា កម្ពុជាអត់រាថយចំពោះការឈ្លានពានឡើយ ដោយបាញ់តបគ្រប់ពេលវេលា
ភ្នំពេញ៖ លោកជំទាវឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិកម្ពុជា បានផ្តាំទៅទាហានឈ្លានពានថៃថា កម្ពុជាអត់មានការរាថយ និងចុះញ៉មចំពោះទង្វើឈ្លានពានរបស់ខ្លួននោះឡើយ ផ្ទុយទៅវិញមានតែវាយបកគ្រប់ពេលទាំងអស់ទោះក្នុងទម្រង់ណាក៏ដោយនោះ។
ក្នុងសន្និសីទស្តីពីការវិវត្តន៍សភាពការណ៍នៃការឈ្លានពានរបស់ថៃមកលើកម្ពុជា នារសៀលថ្ងៃទី២៥ ខែកក្កដា ឆ្នាំ២០២៥នេះ លោកជំទាវអ្នកនាំពាក្យក្រសួងការពារជាតិកម្ពុជាបានសង្កត់ធ្ងន់ថា “កងទ័ពកម្ពុជាមានភាពអង់អាចក្លាហាន ក្នុងកិច្ចការពារបូរណភាពទឹកដី អធិបតេយ្យភាពរបស់ខ្លួន និងធ្វើការបាញ់តបគ្រប់ពេលវេលាចំពោះទាហានឈ្លានពានថៃ ដែលបានបាញ់សន្ធុបមកលើទាហាន និងប្រជាជនកម្ពុជា ដែលការបាញ់នេះថៃបានប្រើប្រាស់អាវុធខុសច្បាប់អន្តរជាតិ ដូចជាគ្រាប់បែកចង្កោម និងអាវុធធនធ្ងន់ជាច្រើនទៀត ដែលមានលក្ខណៈឃោឃៅបំផុតពីសំណាក់ទាហានឈ្លានពានថៃ”។
លោកជំទាវម៉ាលី សុជាតា ក៏បានប្រកាសថ្កោលទោសយ៉ាងខ្លាំងក្លាចំពោះចោរឈ្លានពានសៀម ដែលបានទម្លាក់គ្រាប់បែកចង្កោមមកលើកម្ពុជា រហូតដល់បានធ្វើឲ្យជនស៊ីវិលកម្ពុជាមានរងរបួស និងបាត់បង់ទ្រព្យសម្បត្តិ និងរត់ភាសឹកជាច្រើនពាន់នាក់ទៅមណ្ឌលសុវត្ថិភាពផងដែរ៕
