ហាណូយ៖ បក្សកុម្មុយនីស្ដវៀតណាម បានចាត់វិធានការវិន័យលើអតីតមេដឹកនាំជាន់ខ្ពស់ជាច្រើនរូប រួមទាំងអតីតប្រធានាធិបតី និងនាយករដ្ឋមន្ត្រីវៀតណាម លោក ង្វៀន សួនភុក ក៏ដូចជាអតីតប្រធានាធិបតី វូ វ៉ាន់ធឿង ផងដែរ។
អ្នកទាំងនេះ ត្រូវរងទណ្ឌកម្មក៏ព្រោះតែបំពានច្បាប់គណបក្ស ហើយពួកគេបានលាលែងពីតំណែងរួចហើយ។ ចំណាត់ការនេះត្រូវបានគេមើលឃើញថា ជាការប៉ុនប៉ងរបស់អគ្គលេខាធិកា លោក តូ ឡាំ ដើម្បីរឹតបន្តឹងវិន័យនៅមុនសមាជជាតិរបស់បក្សកុម្មុយនីស្ដ ដែលនឹងត្រូវធ្វើឡើងនៅខែមករា ឆ្នាំ២០២៦។
គណៈកម្មាធិការមជ្ឈិមបក្ស បានអនុម័តលើការដាក់ទណ្ឌកម្មដែលបានដកលោក ភុក, លោក ធឿង និងអតីតប្រធានរដ្ឋសភា លោក វឿង ឌិញ ហឿ (Vuong Dinh Hue) ចេញពីមុខតំណែងដែលជាការដាក់ទណ្ឌកម្មដ៏ធ្ងន់ធ្ងរបំផុតទីពីរ នៅក្នុងក្របខ័ណ្ឌវិន័យចំនួនបួនរបស់បក្ស។ ការដាក់ទណ្ឌកម្មធ្ងន់ធ្ងរបំផុតនោះ គឺការបណ្តេញចេញពីបក្ស។
នៅក្នុងរចនាសម្ព័ន្ធនយោបាយរបស់ប្រទេសវៀតណាម បុគ្គលដែលមានឋានៈខ្ពស់បំផុតចំនួនបួន ដូចជា អគ្គលេខាធិការ ប្រធានាធិបតី នាយករដ្ឋមន្ត្រី និងប្រធានរដ្ឋសភា ត្រូវបានហៅថាជា «សសរស្តម្ភទាំងបួន»។
លោក ភុក និងសសរស្តម្ភផ្សេងទៀត ត្រូវបានបង្ខំឱ្យលាលែងពីតំណែងនៅចន្លោះ ឆ្នាំ២០២២ និង២០២៣ ចំពេលមានការបោសសម្អាតប្រឆាំងអំពើពុករលួយ ដែលដឹកនាំដោយអតីតអគ្គលេខាបក្ស លោក ង្វៀន ភូជុង។
លោក ភុក បានបម្រើតួនាទីជានាយករដ្ឋមន្ត្រីពីឆ្នាំ២០១៦ ដល់២០២១ ហើយបានជួបជាមួយនាយករដ្ឋមន្ត្រីជប៉ុន ស៊ីនសូ អាបេ ព្រមទាំងមេដឹកនាំផ្សេងទៀតនៅក្នុងរង្វង់នយោបាយ និងពាណិជ្ជកម្មរបស់ប្រទេសជប៉ុន។
ចំណែក លោក ធឿង ដែលបានក្លាយជាមេដឹកនាំលេខ២របស់បក្សក្នុងនាមជាប្រធានាធិបតីវៀតណាមនៅឆ្នាំ២០២៣ បានជួបជាមួយអធិរាជជប៉ុននៅខែវិច្ឆិកា ឆ្នាំ២០២៣។ រីឯ លោក ហឿ ត្រូវបានចាត់ទុកថា ជាគូប្រជែងនឹងលោក ឡាំ ដែលជាមេដឹកនាំបច្ចុប្បន្ន។ លើសពីនេះ បក្សកុម្មុយនីស្ដវៀតណាម ក៏បានបណ្តេញអតីតរដ្ឋមន្ត្រីក្រសួងសុខាភិបាល លោក ង្វៀន ធីគីមទៀន (Nguyen Thi Kim Tien) និងដកអតីតឧបនាយករដ្ឋមន្ត្រី ឡេមិញ ខៃ (Le Minh Khai) ចេញពីគ្រប់មុខតំណែងរបស់បក្សផងដែរ៕
