រដ្ឋបាលខេត្តកំពង់ស្ពឺ រៀបចំពិធីអបអរទិវាអន្តរជាតិប្រយុទ្ធប្រឆាំងគ្រឿងញៀន ជាមួយការដុតបំផ្លាញគ្រឿងញៀនជិត៥គីឡូក្រាម
ភ្នំពេញ៖ រដ្ឋបាលខេត្តកំពង់ស្ពឺ នៅព្រឹកថ្ងៃទី២១ ខែកក្កដា ឆ្នាំ២០២៥ បានរៀបចំពិធីអបអរទិវាអន្តរជាតិប្រយុទ្ធប្រឆាំងគ្រឿងញៀន ជាមួយការដុតបំផ្លាញគ្រឿងញៀនជិត៥គីឡូក្រាម ក្នុងសំណុំរឿងចំនួន១០៩សំណុំរឿង ដែលបានមកពីការសម្រេចរបស់ស្ថាប័នតុលាការដើម្បីឲ្យដុតបំផ្លាញចោល។
ពិធីនេះ ធ្វើឡើងក្រោមអធិបតីភាព ឯកឧត្ដម យឹម សុខុម ប្រធានក្រុមប្រឹក្សាខេត្ត, ឯកឧត្ដមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ, ឧត្តមសេនីយ៍ឯក ព្រុំ សន្ទរ អគ្គស្នងការរង តំណាងនាយឧត្តមសេនីយ៍ ស ថេត អគ្គស្នងការនគរបាលជាតិ និងលោកស្រីឧត្តមសេនីយ៍ឯក ឈឹម សិទ្ធិបុណ្យរិទ្ធ អគ្គលេខាធិការរង តំណាងនាយឧត្តមសេនីយ៍ មាស វិរិទ្ធ អគ្គលេខាធិការ នៃអគ្គអាជ្ញាធរជាតិប្រយុទ្ធប្រឆាំងគ្រឿងញៀន។
ឯកឧត្ដមបណ្ឌិត ជាម ច័ន្ទសោភ័ណ បានថ្លែងថា ការដុតបំផ្លាញគ្រឿងញៀនប្រម៉ាណជិត៥គីឡូក្រាមនាពេលនេះ បានបង្ហាញយ៉ាងច្បាស់ពីស្នាដៃបង្ក្រាបដ៏សស្រាក់ស្រាំរបស់កងកម្លាំងប្រដាប់អាវុធ ប្រយុទ្ធប្រឆាំងគ្រឿងញៀន ក្នុងមូលដ្ឋានខេត្តកំពង់ស្ពឺ។ គ្រឿងញៀននេះ គឺពួកក្រុមឧក្រិដ្ឋជនបានយកគ្រឿងញៀន រៀនធ្វើជាមុខរបរជំនួញរបស់ពួកគេ ហើយគ្រឿងញៀននេះ បានពង្វក់ស្មារតីអូសទាញដល់ជនស្លូតត្រង់ឲ្យក្លាយខ្លួនទៅជា៖ អំពើឃាតកម្ម ចាប់ជំរិត រំលោភសេពសន្ថវៈ បានប្រើប្រាស់ដោយខុសច្បាប់បណ្តាលឲ្យខូចសុខភាព និងហ៊ានប្រព្រឹត្តបទល្មើសផ្សេង បងធំ ប្រព្រឹត្តហិង្សាក្នុងគ្រួសារ លួច ឆក់ ប្លនទ្រព្យ សម្បត្តិ បង្កើតជាក្រុមបងតូច របៀបរៀបរយសាធារណៈក្នុងសង្គមជាតិ។
ឯកឧត្ដមបណ្ឌិត បានបន្តថា ចំណែកសមត្ថកិច្ចទាំងមន្ត្រីនគរបាល មន្ត្រីកងរាជអាវុធហត្ថ អាជ្ញាធរមូលដ្ឋានព្រមទាំងអយ្យការ និងតុលាការ បានខិតខំយកចិត្តទុកដាក់អនុវត្តវិធានការច្បាប់ ដោយមិនយោគយល់ ដោយមិនអត់ឱនឲ្យ ជនទាំងឡាយណា ដែលបានប្រព្រឹត្តបទល្មើសទាំងអស់នេះ តុលាការនឹងផ្តន្ទាទោសជនល្មើសយ៉ាងម៉ឺនម៉ាត់តាមបញ្ញាតិច្បាប់ជាធរមាន។
ឯកឧត្ដមបណ្ឌិត បានអំពាវនាវដល់ប្រជាពលរដ្ឋ អាណាព្យាបាលសិស្ស ត្រូវតាមដានគ្រប់សកម្មភាព នៃការប្រើប្រាស់ និងជួញដូរគ្រឿងញៀនក្នុងមូលដ្ឋាន រួចរាយការណ៍មកកាន់សមត្ថកិច្ច ដើម្បីជាមូលដ្ឋានឈានទៅបង្ក្រាបឲ្យទាន់ពេលវេលា។
ឯកឧត្ដម ស៊ិន វិរៈ ព្រះរាជអាជ្ញាអមសាលាដំបូងខេត្តកំពង់ស្ពឺ បានឲ្យដឹងថា គ្រឿងញៀនដែលត្រូវដុតកម្ទេចចោលពេលបន្តិចទៀតនេះ គណៈកម្មការបានរៀបចំតាមលក្ខណៈបច្ចេកទេស និងសុវត្ថិភាពនៅចំពោះមុខអង្គពិធី គឺសាលាដំបូងខេត្តកំពង់ស្ពឺ បានចេញសេចក្តីសម្រេចរឹបអូសបំផ្លាញចោលក្នុងសំណុំរឿងសរុបចំនួន១០៩សំណុំរឿង ដោយវត្ថុតាងជាសារធាតុញៀនថ្លឹងទាំងសំបកកញ្ចប់ មានទម្ងន់១៥,៩០០.៥៩ក្រាម រួមមាន៖ ប្រភេទកញ្ជាចំនួន ១១,០០០ក្រាម, ប្រភេទមេតំហ្វេតាមីន ចំនួន ៤,៨៤៤.១៣ក្រាម, ប្រភេទ WY ចំនួន៦០៦គ្រាប់ និងប្រភេទកេតាមីន (K) ចំនួន២.៦៥ក្រាម រួមទាំងឧបករណ៍ប្រើប្រាស់គ្រឿងញៀន និងសម្ភារៈផ្សេងៗទៀតដែលពាក់ព័ន្ធនឹងគ្រឿងញៀន។
ឯកឧត្ដមព្រះរាជអាជ្ញា បានបញ្ជាក់ថា ចំពោះសារធាតុញៀន និងសារធាតុគីមីទាំងអស់ខាងលើនេះ គឺគណៈកម្មការដុតបំផ្លាញគ្រឿងញៀន និងមន្ទីរពិសោធន៍ នៃគណៈកម្មការដុតបំផ្លាញគ្រឿងញៀន ធ្វើការត្រួតពិនិត្យតាមលក្ខណៈបច្ចេកទេស និងសុវត្ថិភាពក្នុងការបំផ្លាញចោល នៅចំពោះមុខនេះដោយវិធីសាស្ត្រដុតនូវសារធាតុញៀន និងសារធាតុគីមី៕
