ឧបនាយករដ្ឋមន្រ្តី សាយ សំអាល់៖ នៅក្នុងនីតិកាលទី៧ ប្រមុខរាជរដ្ឋាភិបាល បានផ្ដល់គោលការណ៍ណែនាំធ្វើយ៉ាងណាឱ្យបញ្ចប់នូវភាពចម្រូងចម្រាស់ ក្នុងសង្គមជាតិ ទាក់ទិននឹងវិស័យដីធ្លី

ភ្នំពេញ៖ នៅព្រឹកថ្ងៃទី២១ ខែកក្កដា ឆ្នាំ២០២៥ ឯកឧត្ដមឧបនាយករដ្ឋមន្រ្តី សាយ សំអាល់ រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ បានអញ្ជើញចែកវិញ្ញាបនបត្រសម្គាល់ម្ចាស់អចនវត្ថុជូនប្រជាពលរដ្ឋចំនួន២ឃុំ ក្នុងស្រុកបរកែវ និងសម្ពោធដាក់ឲ្យប្រើប្រាស់ជាផ្លូវការ អគារមន្ទីររៀបចំដែនដីនគរូបនីយកម្មខេត្តរតនគិរី។

ឯកឧត្ដម ញ៉ែម សំអឿន អភិបាលខេត្តរតនគិរី បានលើកឡើងថា ការចែកវិញ្ញាបនបត្រសម្គាល់ម្ចាស់អចលនវត្ថុជូននាឱកាសនេះ មានចំនួន៧ភូមិ គឺឃុំឡាម៉ិញ០១ភូមិ និងឃុំស៊ើង ០៦ភូមិ ស្មើនឹង១៦៥៧វិញ្ញាបនបត្រ។

ឯកឧត្ដមអភិបាលខេត្តបន្តថា ខេត្តរតនគិរី ដែលមានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត ជាសេនាធិការបានចេញវិញ្ញាបនបត្រសម្គាល់ម្ចាស់អចលនវត្ថុចំនួន ៣៦,៩៤៥វិញ្ញាបនបត្រ បូកទាំង ភូមិនៅស្រុកអូរជុំចំនួន០៣ភូមិ ដែលគ្រោងចែកនៅសប្តាហ៍ក្រោយ។បន្ទាប់ពីបញ្ចប់ការចុះបញ្ជីដីធ្លី នៅស្រុកបរកែវ និងស្រុកអូរយ៉ាដាវ ក្រុមការងារបានកំពុងបន្តអនុវត្តការងារចុះបញ្ជីដីធ្លីនៅស្រុកវើនសៃ ហើយក៏នឹងត្រូវបញ្ចប់ការចុះបញ្ជីនៅស្រុកអូរជុំនៅពាក់កណ្តាលខែសីហាខាងមុខ ដោយត្រូវបន្តទៅចុះ បញ្ជីនៅស្រុកវើនសៃបន្ថែមទៀត។

ថ្លែងក្នុងឱកាសនេះ ឯកឧត្ដមឧបនាយករដ្ឋមន្ត្រី សាយ សំអាល់ បានលើកឡើងថា នៅក្នុងនីតិកាលទី៧ ប្រមុខរាជរដ្ឋាភិបាលកម្ពុជាបានផ្ដល់គោលការណ៍ណែនាំធ្វើយ៉ាងណាឱ្យបញ្ចប់នូវភាពចម្រូងចម្រាស់ ក្នុងសង្គមជាតិ ទាក់ទិននឹងវិស័យដីធ្លី ដូច្នេះយើងក៏បានរៀបចំគោលនយោបាយចុះបញ្ជីដីធ្លីបង្ហើយ ដើម្បីបង្កើតបរិយាកាសគ្មានវិវាទនៅក្នុងសង្គមជាតិទាំងមូល និងរៀបចំប្រទេសឱ្យកាន់តែល្អប្រសើរជាងមុន។

ឧបនាយករដ្ឋមន្រ្តី បានថ្លែងអំណរគុណប្រជាពលរដ្ឋ ដែលបានចូលរួមជាមួយក្រុមការងារមន្ត្រីជំនាញ ក៏ដូចជាអាជ្ញាធរក្នុងការដោះស្រាយបញ្ហាដីធ្លី ដែលមានភាពចម្រូងចម្រាស់រហូតទទួលបានប័ណ្ណកម្មសិទ្ធិនាពេលនេះ និងជម្រះនូវភាពសៅហ្មងទាក់ទិននឹងបញ្ហាដីធ្លីនេះកុំឱ្យអូសបន្លាយពេលវេលាតទៅមុខទៀត។

ឧបនាយករដ្ឋមន្ត្រី សាយ សំអាល់ បានបញ្ជាក់ថា ក្រសួងបានដាក់ចេញនូវយុទ្ធសាស្ត្រ៦ចំណុច ដើម្បីបង្កើតបរិយាកាសគ្មានវិវាទសំរាប់ប្រជាពលរដ្ឋរួមមាន៖

ទី១៖ ត្រូវចុះបញ្ជីដីធ្លីបង្ហើយនៅទូទាំងប្រទេសឲ្យបានចប់សព្វគ្រប់បញ្ចប់វិវាទផ្ដល់នូវសុវត្ថិភាពផ្លូវច្បាប់ក្នុងការកាន់កាប់អចលនទ្រព្យ។, ទី២៖ បញ្ហាវិវាទដីធ្លីគឺជារឿងដែលបន្សល់ទុកឱ្យតជំនាន់ ប៉ុន្តែយើងត្រូវរួមគ្នាដោះស្រាយបញ្ចប់ឲ្យអស់ស្របតាមបច្ចេកទេសសុរិយោដី និងគោលការណ៍ច្បាប់។, ទី៣៖ ផ្ដល់សេវាគាប់ចិត្តដល់ប្រជាពលរដ្ឋមានភាពងាយស្រួលដែលអាចប្រើប្រាស់រាល់សេវានានារបស់ក្រសួងតាមរយៈប្រព័ន្ធអនឡាញ។ , ទី៤៖ ត្រូវថែរក្សាបឹងទន្លេសាបសម្រាប់មនុស្សតជំនាន់។, ទី៥៖ ដោះស្រាយបញ្ហាទិញដី និងផ្ទះក្នុងបុរីសម្រាប់ប្រជាពលរដ្ឋ។, ទី៦៖ ត្រូវអនុវត្តគោលការណ៍រស់នៅរបស់ប្រជាពលរដ្ឋក្នុងតំបន់បេតិកភណ្ឌ ដែលយុទ្ធសាស្ត្រទាំងនេះជាបំណងប្រាថ្នាដ៏ពិសិដ្ឋរបស់ប្រមុខរាជរដ្ឋាភិបាលកម្ពុជាដែលចង់ឲ្យប្រជាពលរដ្ឋគ្រប់រូបមានទ្រនំសុភមង្គល មានលំនៅឋានរស់នៅ សមរម្យ មានម្ហូបអាហារហូបចុកគ្រប់គ្រាន់ មានការងារធ្វើមានប្រាក់ចំណូលសមរម្យ ទទួលបានការសិក្សាអប់រំគ្រប់ៗគ្នា និងរស់នៅប្រកបដោយភាពសុខដុមរមនា។

សូមបញ្ជាក់ថា នៅព្រឹកថ្ងៃដដែលឧបនាយករដ្ឋមន្រ្តី សាយ សំអាល់ រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ ក៏បានអញ្ជើញកាត់ខ្សែបូសម្ពោធដាក់ឲ្យប្រើប្រាស់ជាផ្លូវការនូវអគារមន្ទីររៀបចំដែនដី នគរូបនីយកម្ម និងសំណង់ខេត្តរតនគិរីផងដែរ។ អគាររដ្ឋបាល នៃមន្ទីររៀបចំដែនដីខេត្តរតនគិរី ត្រូវបានជួសជុលកែលម្អអពីឆ្នាំ២០២០ ដល់ឆ្នាំ២០២៥ រយៈពេល៦ឆ្នាំ។ អគារនេះមានកម្ពស់ ២ជាន់ ដែលមានទំហំ ១៧,៥ ម៉ែត្រ គុណនឹង ២៤ ម៉ែត្រ, កម្ពស់សរុប ១៣,៩ ម៉ែត្រ ចែកចេញ ជាជាន់ផ្ទាល់ដីមាន៤បន្ទប់ និងជាន់ទី១ មានធ្វើការ២បន្ទប់ និងសាលប្រជុំ១៕