ទីភ្នាក់ងារជនភៀសខ្លួនរបស់អង្គការសហប្រជាជាតិបានអះអាងថា សេវាគាំទ្រសំខាន់ៗសម្រាប់ជនភៀសខ្លួនរ៉ូហ៊ីងយ៉ានៅក្នុងប្រទេសបង់ក្លាដែសមានហានិភ័យនៃការដួលរលំ ល្កឹកណាមានប្រាក់ទ្រទ្រង់បន្ថែម

ហ្សឺណែវ៖ ទីភ្នាក់ងារជនភៀសខ្លួនរបស់អង្គការសហប្រជាជាតិបានអះអាងកាលពីថ្ងៃសុក្រទី១១កក្កដាថា សេវាគាំទ្រសំខាន់ៗសម្រាប់ជនភៀសខ្លួនរ៉ូហ៊ីងយ៉ានៅក្នុងប្រទេសបង់ក្លាដែសមានហានិភ័យនៃការដួលរលំ ល្កឹកណាមានប្រាក់ទ្រទ្រង់បន្ថែម ខណៈថវិការ៉ៃអង្គាសចំនួន២៥៥លានដុល្លារ គាំទ្រពួកគេបានត្រឹមតែ៣៥ភាគរយប៉ុណ្ណោះ។

ជនភៀសខ្លួនរ៉ូហ៊ីងយ៉ាជាង១លាននាក់ ត្រូវបានប្រមូលផ្តុំទៅក្នុងងជំរំនៅភាគអាគ្នេយ៍នៃប្រទេសបង់ក្លាដែស ជាកន្លែងតាំងទីលំនៅជនភៀសខ្លួនដ៏ធំបំផុតរបស់ពិភពលោក ដោយភាគច្រើននៃពួកគេបានភៀសខ្លួនចេញពីការបង្រ្កាបដ៏ឃោរឃៅដោយរបបយោធាមីយ៉ាន់ម៉ាក្នុងឆ្នាំ២០១៧។

អ្នកនាំពាក្យឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន លោក បាបារ បាឡុច (Babar Baloch) បានប្រាប់អ្នកយកព័ត៌មាននៅទីក្រុងហ្សឺណែវថា៖«មានគម្លាតដ៏ធំមួយទាក់ទងនឹងអ្វីដែលយើងត្រូវការ និងធនធានដែលយើងមាន។ គម្លាតថវិកាទាំងនេះ ក៏នឹងប៉ះពាល់ដល់ការរស់នៅប្រចាំថ្ងៃរបស់ជនភៀសខ្លួនរ៉ូហ៊ីងយ៉ា ដោយសារពួកគេពឹងផ្អែកលើជំនួយមនុស្សធម៌ជាមូលដ្ឋានប្រចាំថ្ងៃ សម្រាប់អាហារ សុខភាព និងការអប់រំ។ ជាមួយនឹងវិបត្តិមូលនិធិសកលធ្ងន់ធ្ងរ តម្រូវការសំខាន់របស់ជនភៀសខ្លួនដែលទើបមកដល់ថ្មី និងអ្នកដែលមានវត្តមានរួចហើយនឹងមិនត្រូវបានបំពេញ ហើយសេវាកម្មសំខាន់ៗសម្រាប់ជនភៀសខ្លួនរ៉ូហ៊ីងយ៉ាទាំងមូលមានហានិភ័យនៃការដួលរលំ លុះត្រាតែមានមូលនិធិបន្ថែមត្រូវបានធានា។ »។

តាមពិតទៅ វិបត្តិមនុស្សធម៌ត្រូវបានកើនឡើងដោយការកាត់បន្ថយការផ្ដល់មូលនិធិពីម្ចាស់ជំនួយធំៗ ដែលដឹកនាំដោយសហរដ្ឋអាម៉េរិក ក្រោមរដ្ឋបាលដូណាល់ ត្រាំ និងបណ្តាប្រទេសលោកខាងលិចផ្សេងទៀត ខណៈពួកគេផ្តល់អាទិភាពការចំណាយលើវិស័យការពារជាតិដែលបណ្ដាលមកពីការភ័យខ្លាចកាន់តែខ្លាំងឡើងនៃឥទ្ធិពលរុស្ស៊ី និងចិន។ យ៉ាងហោចណាស់មានជនភៀសខ្លួនរ៉ូហ៊ីងយ៉ា១៥ម៉ឺននាក់បានទៅដល់ទីក្រុង Cox’s Bazar ក្នុងប្រទេសបង់ក្លាដែសក្នុងរយៈពេល១៨ខែចុងក្រោយនេះបើយោងតាម UNHCR។

អំពើហិង្សា និងការធ្វើទុក្ខបុកម្នេញលើជនជាតិរ៉ូហ៊ីងយ៉ា ដែលជាជនជាតិភាគតិចមូស្លីមភាគច្រើននៅក្នុងងរដ្ឋរ៉ាឃីន ភាគខាងលិចនៃប្រទេសមីយ៉ាន់ម៉ា បានបន្តបង្ខំមនុស្សរាប់ពាន់នាក់ឱ្យស្វែងរកការការពារឆ្លងកាត់ព្រំដែនក្នុងប្រទេសបង់ក្លាដែស។

គួរបញ្ជាក់ថា ចលនាជនភៀសខ្លួនរ៉ូហ៊ីងយ៉ា ចូលទៅក្នុងប្រទេសបង់ក្លាដែសនេះ គឺជាចលនាភៀសខ្លួនដ៏ធំបំផុតពីមីយ៉ាន់ម៉ា ចូលទៅក្នុងប្រទេសបង់ក្លាដែស ចាប់តាំងពីឆ្នាំ២០១៧ នៅពេលដែលជនភៀសខ្លួនរ៉ូហ៊ីងយ៉ាប្រហែល៧៥ម៉ឺននាក់បានភៀសខ្លួនចេញពីអំពើហិង្សាដ៏សាហាវនៅក្នុងរដ្ឋរ៉ាឃីន។ នេះបើតាមការបញ្ជាក់ពីអ្នកនាំពាក្យឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន៕