មន្ត្រីជាន់ខ្ពស់ក្រសួងពាណិជ្ជកម្មកូរ៉េខាងត្បូង ថា សហរដ្ឋអាមេរិក បានទាមទារឱ្យកូរ៉េខាងត្បូង ចូលរួមកិច្ចខិតខំប្រឹងប្រែង ដើម្បីទប់ស្កាត់ចិន នៅក្នុងកិច្ចចរចាពាណិជ្ជកម្ម
សេអ៊ូល៖ បើយោងតាមការចេញផ្សាយដោយទីភ្នាក់ងារសារព័ត៌មាន AFP មន្ត្រីជាន់ខ្ពស់មកពីក្រសួងពាណិជ្ជកម្មកូរ៉េខាងត្បូង បាននិយាយនៅថ្ងៃសុក្រ ទី១១ ខែកក្កដា នេះថា សហរដ្ឋអាមេរិក បានទាមទារឱ្យកូរ៉េខាងត្បូង ចូលរួមកិច្ចខិតខំប្រឹងប្រែង ដើម្បីទប់ស្កាត់ចិន នៅក្នុងកិច្ចចរចាពាណិជ្ជកម្ម ខណៈប្រទេសទាំងពីរ បាននិងកំពុងពិភាក្សាអំពីកិច្ចសហប្រតិបត្តិការ ក្នុងការសាងសង់នាវា។
លោក Chang Sung-gil ប្រធានគោលនយោបាយពាណិជ្ជកម្ម បញ្ជាក់ថា «ទីក្រុងវ៉ាស៉ីនតោន កំពុងស្នើទីក្រុងសេអ៊ូល ឱ្យចូលរួមវិធានការទប់ស្កាត់ចិន ជាផ្នែកនៃបុរេលក្ខខណ្ឌ សម្រាប់កិច្ចសហប្រតិបត្តិការទ្វេភាគី លើការសាងសង់នាវា។ អាមេរិកមានអារម្មណ៍ថា វិបត្តិគឺកើតចេញពីការកើនឡើងនូវវត្តមានចិន ក្នុងវិស័យផលិតនាវា»។
តាមលោក Chang សហរដ្ឋ អាមេរិក ក៏ បានបង្ហាញចេតនា ការ កាត់ បន្ថយ ឬ លុប ចោល ពន្ធ លើ ឧស្សាហកម្ម ជាក់លាក់ ដូចជា រថយន្ត និង ដែកថែបជាដើម។ សហរដ្ឋអាមេរិក ក៏កំពុងស្នើឱ្យទីក្រុងសេអ៊ូល ជំរុញការវិនិយោគ ទិញផលិតផលថាមពល និងកសិកម្មរបស់សហរដ្ឋអាមេរិក ជាថ្នូរនឹងការចរចាលើពន្ធគយ ២៥ភាគរយផងដែរ ប៉ុន្តែលោក Chang បានបន្ថែមថា មានភាពរស៉ើបផ្នែកនយោបាយជាច្រើននៅកូរ៉េខាងត្បូង ពេលនិយាយដល់ការពង្រីកការនាំចូលផលិតផលកសិកម្ម៕
