ឯកឧត្តម ចាន់ ដារ៉ុង ការចុះត្រួតពិនិត្យ និងវាយតម្លៃដំណាក់កាលទី១ លើការងារថែទាំផ្លូវជាលក្ខណៈប្រចាំចំនួន ១០ខ្សែ ស្ថិតនៅខេត្តកំពង់ឆ្នាំង

កំពង់ឆ្នាំង៖ នាព្រឹកថ្ងៃសុក្រ ៩កើត ខែអាសាឍ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី៤ ខែកក្កដា ឆ្នាំ២០២៥ ឯកឧត្តមបណ្ឌិត ចាន់ ដារ៉ុង រដ្ឋលេខាធិការ និងជាសមាជិកគណៈកម្មាធិការលទ្ធកម្ម តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានដឹកនាំគណៈកម្មការអន្តរក្រសួង រួមមាន ក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ អមដំណើរដោយថ្នាក់ដឹកនាំ មន្រ្តីជំនាញរបស់នាយកដ្ឋានផ្លូវលំជនបទ និងមន្រ្តីជំនាញរបស់មន្ទីរអភិវឌ្ឍន៍ជនបទ ខេត្តកំពង់ឆ្នាំង ក្នុងការចុះត្រួតពិនិត្យ និងវាយតម្លៃដំណាក់កាលទី១ លើការងារថែទាំផ្លូវជាលក្ខណៈប្រចាំចំនួន ១០ខ្សែ ស្ថិតនៅខេត្តកំពង់ឆ្នាំង។

ក្នុងនោះ ឯកឧត្តមបណ្ឌិត ចាន់ ដារ៉ុង បានចុះត្រួតពិនិត្យ និងវាយតម្លៃផ្លូវក្រាលកៅស៊ូ DBST ចំនួន ១០ខ្សែ ប្រវែងសរុប ១២,០ ៤៥គីឡូម៉ែត្រ ទទឹងខ្នងលើ ៥ម៉ែត្រ ៥,៥ម៉ែត្រ និង៦ម៉ែត្រ ស្ថិតក្នុងឃុំព្រៃមូល ឃុំជើងគ្រាវ ឃុំបន្ទាយព្រាល ឃុំក្រាំងលាវ ឃុំតាំងក្រសាំង ឃុំស្រែថ្មី ឃុំពង្រ ឃុំអន្សាចំបក់ ឃុំក្រាំងស្គារ ឃុំប្រស្នឹប ឃុំផ្សារ ឃុំមេលំ និងឃុំពពេល ស្រុករលាប្អៀរ ស្រុកទឹកផុស ស្រុកបរិបូរណ៍។

ដោយឡែក ឯកឧត្តមបណ្ឌិត ក៏បានបន្តពិនិត្យ និងវាយតម្លៃបន្ថែមទៀតទៅលើស្លាកសញ្ញាចរាចរចំនួន ៥២៦ស្លាក លើផ្លូវចំនួន ៥ខ្សែ ស្ថិតក្នុងឃុំឃុំពង្រ ឃុំបន្ទាយព្រាល ឃុំក្រាំងស្គារ ឃុំក្រាំងលាវ ឃុំតាំងក្រសាំង និងឃុំប្រស្នឹប ស្រុកទឹកផុស ស្រុករលាប្អៀរ ។

ក្រោយពីបានការត្រួតពិនិត្យ នឹងវាយតម្លៃរួចមក គណៈកម្មការអន្តរក្រសួង បានសម្រេចឯកភាពទទួលយកនូវការថែទាំផ្លូវជាលក្ខណៈប្រចាំខាងលើ ដោយបញ្ចប់ការថែទាំដំណាក់កាលទី១ ជាស្ថាបពរ។