សម្តេចធិបតី៖ ការធ្វើទំនើបកម្មប្រព័ន្ធទូទាត់សងប្រាក់ បានរួមចំណែកសម្រួលដល់ការធ្វើប្រតិបត្តិការរបស់សហគ្រាសធុនមីក្រូ, តូច និង មធ្យម

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា មានប្រសាសន៍ថា ការធ្វើទំនើបកម្មប្រព័ន្ធទូទាត់សងប្រាក់ បានរួមចំណែកសម្រួលដល់ការធ្វើប្រតិបត្តិការរបស់សហគ្រាសធុនមីក្រូ, តូច និង មធ្យម តាមរយៈការដាក់ឱ្យប្រើប្រាស់ប្រព័ន្ធបាគង និង ស្តង់ដាខេអេចឃ្យូអរ(KHQR) ដែលគាំទ្រ និង ជំរុញការរីកចម្រើននៃអាជីវកម្មខ្នាតតូច និង អនឡាញ។

ក្នុងឱកាសអញ្ជើញជាអធិបតីសំណេះសំណាល និងពិសាភោជនាហារសាមគ្គី មហាគ្រួសារសហគ្រាសធុនតូច មធ្យម និង សិប្បកម្មកម្ពុជា ក្នុងឱកាសអបអរទិវាជាតិសហគ្រាសធុនមីក្រូ តូច និងមធ្យម នាល្ងាចថ្ងៃទី២៧ ខែមិថុនា ឆ្នាំ២០២៥ សម្ដេចធិបតីលើកឡើងថា ជាមួយគ្នានេះ គ្រឹះស្ថានធនាគារ និង ហិរញ្ញវត្ថុបានបើកគណនី និង ផ្តល់ជា QR Code ប្រមាណជាង ១,៥លាននាក់ សម្រាប់បុគ្គលស្វ័យនិយោជន៍។

សម្តេចធិបតីបានថ្លែងថា ធនាគារជាតិនៃកម្ពុជា ក៏បានលើកទឹកចិត្តឱ្យគ្រឹះស្ថានធនាគារ និង ហិរញ្ញវត្ថុ សម្រួលដល់ការបើកគណនីសន្សំ និង ផ្តល់សេវាហិរញ្ញវត្ថុជូនសហគ្រាសធុនមីក្រូ, តូច និង មធ្យម និង បុគ្គលស្វ័យនិយោជន៍សម្រាប់ប្រតិបត្តិការអាជីវកម្មផងដែរ៕