អាមេរិកអាចរួមចំណែកជាមួយអុីស្រាអែលក្នុងការបាញ់ប្រហារលើអុីរ៉ង់ ខណៈពលរដ្ឋរាប់ពាន់នាក់ភៀសខ្លួនចេញពីតេហេរ៉ង់

(បរទេស)÷ ថ្ងៃពុធ ទី១៨ ខែមិថុនា ឆ្នាំ២០២៥ ពលរដ្ឋអុីរ៉ង់រាប់ពាន់នាក់កំពុងភៀសខ្លួនចេញពីរដ្ឋធានីតេហេរ៉ង់ បន្ទាប់ពីប្រធានាធិបតីអាមេរិក លោក Donald Trump បានអំពាវនាវឲ្យប្រជាជនចាកចេញពីទីក្រុង។ នៅពេលដូចគ្នា ប្រភពព័ត៌មានមួយបានបញ្ជាក់ថា លោក Trump កំពុងពិចារណាជម្រើស ដែលអាចរួមដៃជាមួយអុីស្រាអែលក្នុងការបាញ់ប្រហារលើគោលដៅនុយក្លេអ៊ែររបស់អុីរ៉ង់។

អុីស្រាអែលបានអំពាវនាវឲ្យប្រជាជននៅភាគអាគ្នេយ៍របស់តេហេរ៉ង់ចាកចេញ ដើម្បីបើកផ្លូវឲ្យអាកាសយានយោធាធ្វើការបាញ់ប្រហារលើគោលដៅយោធារបស់អុីរ៉ង់។ ព័ត៌មានក្នុងស្រុកអុីរ៉ង់បានរាយការណ៍ថា មានចរាចរណ៍កក្រើកលើផ្លូវទៅខេត្តភាគខាងជើង។

នៅក្នុងអុីស្រាអែល បានឮសម្លេងផ្ទុះជាច្រើននៅលើក្រុងតែលអាវ បន្ទាប់ពីអុីរ៉ង់បាញ់គ្រាប់មីស៊ីលចំនួន ២ ប្រឡាយទៅកាន់ប្រទេសនេះ។ នៅអុីរ៉ង់ មានការបាញ់ប្រហារនៅជិតសកលវិទ្យាល័យដែលជាប់ពាក់ពន្ធ័នឹងយោធា Revolutionary Guards និងគ្រឹះស្ថានផលិតមីស៊ីលនៅខាងកើតទីក្រុងតេហេរ៉ង់។ អ៊ីស្រាអែលបានប្រើយន្ដហោះយោធា ៥០គ្រឿងបាញ់ប្រហារលើគោលដៅប្រហែល ២០កន្លែង។

យោងតាមព័ត៌មានផ្លូវការរបស់អុីរ៉ង់ មានមនុស្សស្លាប់ចំនួន ២២៤នាក់ ភាគច្រើនជាពលរដ្ឋស៊ីវិល ខណៈអុីស្រាអែលរាយការណ៍ស្លាប់ ២៤នាក់។ អុីរ៉ង់បានបាញ់មីស៊ីលប្រហែល ៤០០គ្រាប់ ចាប់តាំងពីថ្ងៃសុក្រ ដោយមានប្រហែល ៤០គ្រាប់ប៉ះដល់គោលដៅ។

អុីស្រាអែលក៏បានចាប់ផ្តើមដឹកជូនពលរដ្ឋរបស់ខ្លួនដែលស្ទាក់ស្ទើរនៅបរទេសត្រឡប់មកវិញ តាមរយៈយន្តហោះក្នុងសកម្មភាពសង្គ្រោះបឋម។

ស្ថានការណ៍បច្ចុប្បន្នមានការលេចឃើញនៃភាពតានតឹងខ្លាំង និងអាចនាំឲ្យកើតសង្គ្រាមទំហំធំ។

អត្ថបទពីកញ្ញា ហេង គីមជូ