សម្តេចធិបតី៖ ការអភិវឌ្ឍនៅខេត្តរតនគិរី គឺអភិវឌ្ឍន៍រុញផលឱ្យទទួលបានទាំងអស់គ្នា មិនមែនបោះបង់នរណា ឬលុបចោលជនជាតិដើមភាគតិចនោះឡើយ

ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានមានប្រសាសន៍ថា ការអភិវឌ្ឍនៅខេត្តរតនគិរី គឺអភិវឌ្ឍន៍រុញផលឱ្យទទួលបានទាំងអស់គ្នា មិនមែនបោះបង់នរណា ឬលុបចោលជនជាតិដើមភាគតិចនោះឡើយ។

សម្ដេចធិបតីបានលើកឡើងបែបនេះក្នុងឱកាសអញ្ជើញជាអធិបតីភាពសម្ពោធអគារសិក្សា អគារទីចាត់ការ អគារសយនដ្ឋាន និងអគារ ពិសោធន៍ និងសមិទ្ធផលនានា នៅខេត្តរតនគិរី នាថ្ងៃទី៧ ខែមិថុនា ឆ្នាំ២០២៥នេះ។

សម្ដេចធិបតីបន្តថា ខេត្តរតនគិរី គឺជាខេត្តមួយឆ្ងាយជាងគេ ពីរាជធានីភ្នំពេញ បើធៀបជាមួយខេត្តដទៃ។ ទោះស្ថិតនៅឆ្ងាយ តែរតនគិរី មានការអភិវឌ្ឍ និងរីកចម្រើន បើធៀបនឹងអតីតកាល បន្ទាប់ពីប្រទេសបញ្ចប់សង្គ្រាម និងរក្សាបានសុខសន្តិភាពពេញលេញជិត ៣០ឆ្នាំមកនេះ។

សម្តេចធិបតី បានថ្លែងថា ដើម្បីបានឃើញនូវការរីកចម្រើនរបស់រតនគិរី របស់ក្រុងបានលុង ត្រូវយកបានបានលុងពេលនេះ ធៀបទៅនឹងបានលុងកាលពីអតីតកាល។

សម្តេចធិបតី បានរំលឹកឡើងវិញ ពីគោលបំណងនៃការបង្កើតកិច្ចសហប្រតិបត្តិការ CLV។ CLV គឺជាកិច្ចសហប្រតិបត្តិការមួយ បង្កើតឡើង ដើម្បីជំរុញការអភិវឌ្ឍខេត្តភាគឦសាន ហើយមិនបានធ្វើឱ្យបាត់បង់ដីនោះឡើយ ក្នុងរយៈពេលប្រមាណ២០ឆ្នាំកន្លងមកនេះ៕