រដ្ឋមន្ត្រីពាណិជ្ជកម្មអាម៉េរិក សម្ដែងសុទិដ្ឋិនិយមចំពោះកិច្ចព្រមព្រៀងពាណិជ្ជកម្មជាមួយប្រទេសឥណ្ឌា ដើម្បីចៀសវាងការយកពន្ធរបស់លោក ដូណាល់ ត្រាំ
វ៉ាស៊ីនតោន៖ លោក ហូវាដ លូតនិក រដ្ឋមន្ត្រីក្រសួងពាណិជ្ជកម្មអាម៉េរិក កាលពីថ្ងៃទី២ខែមិថុនា បានសម្ដែងសុទិដ្ឋិនិយមចំពោះកិច្ចព្រមព្រៀងពាណិជ្ជកម្មឆាប់ៗនេះជាមួយប្រទេសឥណ្ឌា ដើម្បីចៀសវាងការយកពន្ធរបស់លោកប្រធានាធិបតី ដូណាល់ ត្រាំ។
លោក លូតនិក បានប្រាប់វេទិកាភាពជាដៃគូយុទ្ធសាស្ត្រអាម៉េរិក និងឥណ្ឌាថា៖«សហរដ្ឋអាម៉េរិក និងឥណ្ឌានឹងឈានដល់កិច្ចព្រមព្រៀងក្នុងពេលឆាប់ៗខាងមុខនេះ»។
លោក ត្រាំ បានពន្យារពេលដាក់ពន្ធកាលពីថ្ងៃទី៩ខែកក្កដាសម្រាប់ប្រទេសនានា។ លោក លូតនិក បាននិយាយថា លោកគឺជាអ្នកគាំទ្រដ៏ធំរបស់ឥណ្ឌា ប៉ុន្តែបានបង្ហាញពីការព្រួយបារម្ភជាយូរមកហើយអំពីគំនាបពន្ធគយរបស់ប្រទេសនេះ។
លោក លូតនិក ជឿជាក់ថា ការទម្លាក់ពន្ធ អាចកែលម្អពាណិជ្ជកម្មនិងកិច្ចសហប្រតិបត្តិការរវាងប្រទេសទាំង២។ លោកបានលើក ឡើងពីបញ្ហាជាមួយរដ្ឋាភិបាលឥណ្ឌាដូចជា ការទិញឧបករណ៍យោធាពីរុស្ស៊ីដែលធ្វើ ឱ្យ ប៉ះពាល់ដល់អាម៉េរិក។ យ៉ាងណាលោក លូតនិកអះអាងថាលោក ត្រាំ ជឿជាក់ថា រដ្ឋាភិបាលឥណ្ឌាកំពុងដោះស្រាយបញ្ហាទាំងនេះដោយផ្ទាល់៕
