វិទ្យាស្ថានពហុបច្ចេកទេសខេត្តបន្ទាយមានជ័យ ផ្ដល់អាហារូបករណ៍២២០កន្លែង និងប្រាក់ឧបត្ថម្ភប្រចាំខែដល់យុវជនមកពីគ្រួសារក្រីក្រ និងគ្រួសារងាយរងហានិភ័យ

បន្ទាយមានជ័យ៖ នាពេលថ្មីៗនេះ វិទ្យាស្ថានពហុបច្ចេកទេសខេត្តបន្ទាយមានជ័យបានប្រកាសផ្ដល់ជូនអាហារូបករណ៍ឥតបង់ថ្លៃ ១០០% ចំនួន២២០កន្លែង លើមុខជំនាញចំនួន១១មុខ ដល់ក្រុមយុវជនមកពីគ្រួសារក្រីក្រ និងគ្រួសារងាយរងហានិភ័យក្នុងខេត្តបន្ទាយមានជ័យ ព្រមទាំងមានប្រាក់ឧបត្ថម្ភប្រចាំខែថែមទៀតផង។

ការផ្ដល់ជូនអាហារូបករណ៍នេះ គឺជាការអនុវត្តកម្មវិធីគោលនយោបាយបណ្ដុះបណ្ដាលបច្ចេកទេស និងវិជ្ជាជីវៈ (TVET) ១.៥លាននាក់ របស់រាជរដ្ឋាភិបាលនីតិកាលទី៧ នៃរដ្ឋសភា ក្រោមអាណត្តិដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ក្នុងទិសដៅលើកកម្ពស់ស្ថានភាពជីវិតយុវជនមកពីគ្រួសារក្រីក្រ និងគ្រួសារងាយរងហានិភ័យ តាមរយៈផ្ដល់ឱ្យពួកគេនូវជំនាញជាក់លាក់មួយ និងមានលទ្ធភាពទទួលបានចំណូលសមរម្យ។

មុខជំនាញទាំង១១មុខ ដែលវិទ្យាស្ថានពហុបច្ចេកទេសខេត្តបន្ទាយមានជ័យដាក់បញ្ចូលក្នុងកម្មវិធីបណ្ដុះបណ្ដាលថ្មីរបស់ខ្លួននេះ រួមមាន៖ (១).ជំនាញការ៉ូ ចំនួន២០នាក់ (២).ជំនាញដំឡើងបណ្ដាញបំពង់ទឹក ចំនួន២០នាក់ (៣).ជំនាញឡើងបណ្ដាញអគ្គិសនីក្នុងអគារ ចំនួន២០នាក់ (៤).ជំនាញថែទាំនិងជួសជុលរថយន្ត ចំនួន២០នាក់ (៥).ជំនាញថែទាំនិងជួសជុលម៉ាស៊ីនត្រជាក់រថយន្ត ចំនួន២០នាក់ (៦).ជំនាញជួសជុលទោចក្រយានយន្ត ចំនួន២០នាក់ (៧).ជំនាញរចនាក្រាហ្វីកដោយកុំព្យូទ័រ ចំនួន២០នាក់ (៨).ជំនាញថែទាំនិងជួសជុលកុំព្យូទ័រ ចំនួន២០នាក់ (៩).ជំនាញកិច្ចការរដ្ឋបាល ចំនួន២០នាក់ (១០).ជំនាញផ្ដល់សេវាកម្ម និងបរិក្ខារត្រជាក់ក្នុងគេហដ្ឋាន ចំនួន២០នាក់ និង(១១).ធុរកិច្ចភេសជ្ជៈ ចំនួន២០នាក់។

វិទ្យាស្ថានពហុបច្ចេកទេសខេត្តបន្ទាយមានជ័យនៅតែបន្តទទួលពាក្យចូលសិក្សា ចាប់ពីថ្ងៃជូនដំណឹងរហូតដល់ថ្ងៃទី៣១ ខែឧសភា និងចូលរៀននៅថ្ងៃទី១ ខែមិថុនា ឆ្នាំ២០២៥ ខាងមុខ។ សម្រាប់យុវជនគោលដៅទាំងពីរក្រុមខាងលើចាប់អារម្មណ៍ក្នុងការដាក់ពាក្យ សូមទាក់ទងមកកាន់វិទ្យាស្ថានពហុបច្ចេកទេសខេត្តបន្ទាយមានជ័យ ដែលមានទីតាំងនៅភូមិគាប សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ ឬអាចទាក់ទងតាមរយៈលេខទូរស័ព្ទ ០៩៥ ៩៣៤ ៤៤៧ / ០៩៣ ៨៣៦ ៨៨៣ / ០៩៨ ៥៨៧ ១០៣ / ០៩៦ ៩៦៩ ៦៧៧៥។

គួរបញ្ជាក់ថា ក្រៅពីក្រុមយុវជនគោលដៅមកពីគ្រួសារក្រីក្រ និងគ្រួសារងាយរងហានិភ័យ វគ្គបណ្ដុះបណ្ដាលពិសេសនេះក៏បើកចំហសម្រាប់យុវជន និងប្រជាពលរដ្ឋទូទៅ រួមទាំងកម្មករ-កម្មការនីផងដែរ ដែលអាចដាក់ពាក្យចូលសិក្សាជំនាញបច្ចេកទេសវិជ្ជាជីវៈនេះបានដោយឥតបង់ថ្លៃដូចគ្នា គ្រាន់តែមិនទទួលបានប្រាក់ឧបត្ថម្ភប្រចាំខែពីរាជរដ្ឋាភិបាល៕