ប្រធានាធិបតីរុស្ស៊ី លោក ពូ ទីន ចាត់ទុកសម្ដេចតេជោ គឺជាតួអង្គសំខាន់នៃការរួមចំណែកក្នុងទំនាក់ទំនងរវាងកម្ពុជា និងរុស្ស៊ី

ភ្នំពេញ៖ ឯកឧត្តម Igor Krasnov អគ្គរដ្ឋអាជ្ញា នៃសហព័ន្ធរុស្សី បានរំលឹកប្រសាសន៍របស់ ប្រធានាធិបតីរុស្ស៊ី ពូ ទីន ចំពោះសម្ដេចតេជោ ដោយឯកឧត្តមបានបញ្ជាក់ថា លោកប្រធានាធិបតី ពូ ទីន ចាត់ទុកសម្ដេចតេជោ គឺជាតួអង្គសំខាន់នៃការរួមចំណែកក្នុងទំនាក់ទំនងរវាងកម្ពុជា និងរុស្ស៊ី ។

ឯកឧត្តម Igor Krasnov អគ្គរដ្ឋអាជ្ញា នៃសហព័ន្ធរុស្សី បានរំលឹកបែបនេះនៅក្នុងជំនួបជាមួយ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា នៅព្រឹកថ្ងៃអង្គារ ថ្ងៃទី២៧ ខែឧសភា ឆ្នាំ២០២៥នេះ

យោងតាម ឯកឧត្តម ជា ធីរិទ្ធ អ្នកនាំពាក្យព្រឹទ្ធសភា បានឲ្យដឹងនៅក្រោយជំនួបថា នៅក្នុងជំនួបនោះ សម្ដេចតេជោ បានវាយតម្លៃខ្ពស់ចំពោះទស្សនកិច្ចនាពេលនេះ ដោយបានគូសបញ្ជាក់ពីទំនាក់ទំនងដ៏រឹងមាំរវាងប្រទេសទាំងពីរ ទាំងស្ថាប័ននីតិបញ្ញត្តិ នីតិប្រតិបត្តិ និងតុលាការ ។

សម្ដេចសង្ឃឹមថា ទស្សនកិច្ចនេះ នឹងជួយត្រួសត្រាយផ្លូវក្នុងការពង្រីកទំនាក់ទំនងទ្វេភាគីក្នុងការអនុវត្តច្បាប់ និងវិស័យយុត្តិធម៌បន្ថែមទៀត និយាយជារួម គឺទំនាក់ទំនងទ្វេភាគីរវាងកម្ពុជា និងរុស្ស៊ី ។

សម្ដេចតេជោ ក៏បានសម្ដែងការអបអរសាទរចំពោះឯកឧត្តម និងរដ្ឋាភិបាលនៃសហព័ន្ធរុស្ស៊ី ដែលបានរៀបចំព្រឹត្តិការណ៍ជាប្រវត្តិសាស្ត្រកាលពីថ្ងៃទី៩ ខែឧសភា ឆ្នាំ២០២៥ កន្លងទៅ ដើម្បីរំលឹកខួបលើកទី៨០ នៃជ័យជំនះរបស់សហភាពសូវៀត លើកក្រុម ណាស៊ី ក្នុងសង្គ្រាមលោកលើកទី២ ។

ឆ្លៀតក្នុងឱកាសនោះ ឯកឧត្តម Igor Krasnov បានសំដែងនូវក្តីរីករាយ និងអរគុណចំពោះសម្ដេចតេជោ ដែលបានអនុញ្ញាតឲ្យ ឯកឧត្តម បានជួបសម្ដែងការគួរសម ហើយឯកឧត្តម ក៏បាននាំមកនូវការសួរសុខទុក្ខពីសំណាក់ ឯកឧត្តមប្រធានាធិបតី ពូទីន ផ្ដាំផ្ញើសួរសុខទុក្ខជូនចំពោះសម្ដេចតេជោផងដែរ ។

ឯកឧត្តមបានឆ្លៀតជម្រាបជូន សម្ដេចតេជោ អំពីដំណើរទស្សនកិច្ចរបស់ ឯកឧត្តមនៅកម្ពុជា ដោយឯកឧត្តមបានជួបជាមួយថ្នាក់ដឹកនាំកម្ពុជាមួយចំនួន ជាពិសេសជួបជាមួយ ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ ដែលបានជជែក និងចុះហត្ថលេខាលើកិច្ចព្រមព្រៀងសំខាន់ៗជាមួយគ្នា ទាក់ទងទៅនឹងវិស័យច្បាប់ និងការបណ្ដុះបណ្ដាល។

ក្នុងនោះឯកឧត្តម បានបញ្ជាក់អំពីការគ្រោងរៀបចំវគ្គបណ្ដុះបណ្ដាលដល់មន្ត្រីកម្ពុជា ក្នុងវិស័យយុត្តិធម៌ ពាក់ព័ន្ធទៅនឹងវិស័យច្បាប់ទាំងនៅក្នុងប្រទេសកម្ពុជា ទាំងនៅក្នុងប្រទេសរុស្ស៊ី រួមទាំងកិច្ចសហប្រតិបត្តការក្នុងវិស័យអប់រំផងដែរ ដែលភាគីទាំងពីរ គ្រោងនឹងធ្វើជាមួយគ្នា៕