ហ្សាកាតា៖ លោក លី ឈៀង នាយករដ្ឋមន្ត្រីចិន បាននិយាយកាលពីថ្ងៃទី២៤ឧសភាថា ប្រទេសចិន និងឥណ្ឌូណេស៊ី នឹងលើកកម្ពស់ពហុភាគីនិយមពិតប្រាកដ ខណៈលោកបានទៅដល់រដ្ឋធានីហ្សាការតា ក្នុងដំណើរទស្សនកិច្ចរយៈពេលពីរថ្ងៃទៅកាន់ប្រទេសសេដ្ឋកិច្ចដ៏ធំបំផុតរបស់អាស៊ីអាគ្នេយ៍មួយនេះ។
ប្រធានាធិបតីឥណ្ឌូណេស៊ី លោក ប្រាបូវ៉ូ ស៊ូប៊ីយ៉ានតូ (Prabowo Subianto) មានប្រសាសន៍ថា ទំនាក់ទំនងរវាងរដ្ឋធានីប៉េកាំង និងហ្សាការតា ជាគន្លឹះសម្រាប់ស្ថិរភាពក្នុងតំបន់។ ឥណ្ឌូណេស៊ីចាត់ទុកប្រទេសចិន ជាដៃគូដ៏សំខាន់ក្នុងការអភិវឌ្ឍឧស្សាហកម្ម និងបច្ចេកវិទ្យា។
លោកក៏បានកោតសរសើរចំពោះតួនាទីរបស់ប្រទេសចិន ក្នុងការការពារផលប្រយោជន៍នៃប្រទេសកំពុងអភិវឌ្ឍ និងជំហររបស់ខ្លួនប្រឆាំងនឹងមនោគមចក្រពត្តិនិយម និងអាណានិគមនិយម។ លោក ប្រាបូវ៉ូ និងលោក លី នឹងបើកកិច្ចប្រជុំមួយនៅថ្ងៃអាទិត្យនេះ ដើម្បីពិភាក្សាពីរបៀបពង្រឹងទំនាក់ទំនងឥណ្ឌូណេស៊ី-ចិន នេះបើតាមរដ្ឋមន្ត្រីវិនិយោគឥណ្ឌូណេស៊ី លោកស្រី រ៉ូសាន រ៉ូសាលេនី (Rosan Roeslani)។
សារព័ត៌មានស៊ីនហួររាយការណ៍ថា បន្ទាប់ពីដំណើរទស្សនកិច្ចទៅកាន់រដ្ឋធានីហ្សាការតា លោក លី នឹងធ្វើដំណើរទៅកាន់ប្រទេសម៉ាឡេស៊ី ដើម្បីចូលរួមកិច្ចប្រជុំកំពូលអាស៊ាន-GCC-ចិន។
គួរបញ្ជាក់ថា ប្រទេសចិន បានបង្កើនការចូលរួមជាមួយបណ្តាប្រទេសនៅក្នុងតំបន់ ចាប់តាំងពីប្រធានាធិបតីអាម៉េរិក ដូណាល់ ត្រាំ ប្រកាសដំឡើងពន្ធនាំចូលយ៉ាងខ្លាំងលើដៃគូពាណិជ្ជកម្មពិភពលោករបស់ខ្លួន កាលពីដើមឆ្នាំនេះ។ យ៉ាងណា ការយកពន្ធមួយចំនួនត្រូវបានពន្យារពេល ចាប់តាំងពីពេលនោះមក ខណៈប្រទេសចិន និងសហរដ្ឋអាម៉េរិក បានព្រមព្រៀងគ្នាក្នុងខែនេះ ដើម្បីផ្អាកការយកពន្ធមួយចំនួនរបស់ពួកគេ។ រដ្ឋធានីហ្សាការតា ជាដៃគូពាណិជ្ជកម្មធំបំផុតរបស់ប្រទេសចិន បានស្នើលក្ខខណ្ឌជាច្រើនដល់សហរដ្ឋអាម៉េរិក ក្នុងការចរចាដើម្បីបន្ទន់ពន្ធប្រឆាំងនឹងប្រទេសឥណ្ឌូណេស៊ី៕
