យោធាអ៊ីស្រាអែល បានបើកការបាញ់ព្រមានឥតសំចៃដៃ កំលុងពេលអ្នកការទូតបរទេសជាច្រើនរូប បានទៅទស្សនកិច្ចតំបន់វេសប៊ែង West Bank
បរទេស៖ យោធាអ៊ីស្រាអែល បានបើកការបាញ់ព្រមានឥតសំចៃដៃកាលពីថ្ងៃពុធទី២១ឧសភា កំលុងពេលអ្នកការទូតបរទេសជាច្រើនរូប បានទៅទស្សនកិច្ចតំបន់វេសប៊ែង West Bank ខណៈអាជ្ញាធរប៉ាឡេស្ទីនចោទប្រកាន់កងទ័ពអ៊ីស្រាអែលថា មានចេតនាបាញ់ប្រហារលើគណៈប្រតិភូដែលកំពុងបំពេញទស្សនកិច្ច។
រូបភាពវីដេអូនៃការបាញ់ប្រហារនៅទីក្រុងជេនីន (Jenin) នៃតំបន់វេសប៊ែង បង្ហាញពីគណៈប្រតិភូ និងអ្នកកាសែតរត់បាតជើងសព្រាត ដើម្បីគេចចេញពីការវាយប្រហារដោយយោធាអ៊ីស្រាអែល។ យ៉ាងណា គ្មានអ្នករបួសត្រូវបានគេរាយការណ៍នៅក្នុងឧបទ្ទវហេតុនេះទេ ប៉ុន្តែការវាយប្រហារមួយនេះ បានទាក់ទាញនូវការថ្កោលទោសពីជុំវិញពិភពលោក។
តាមពិតទៅ គណៈប្រតិភូទាំងនោះ បានទៅតំបន់មួយចំណិតនេះ ដើម្បីត្រួតពិនិត្យការបំផ្លិចបំផ្លាញបណ្ដាលមកពីប្រតិបត្តិការយោធាជាច្រើនខែរបស់អ៊ីស្រាអែល។ នេះបើតាមអ្នកការទូតអឺរ៉ុបម្នាក់។ ប្រធានគោលនយោបាយការបរទេសរបស់សហភាពអឺរ៉ុប លោកស្រី កាចា កាលឡាស់ (Kaja Kallas) បានជំរុញឱ្យអ៊ីស្រាអែលយកចិត្តទុកដាក់ ចំពោះអ្នកទទួលខុសត្រូវចំពោះការបាញ់ប្រហារនៅជិតទីក្រុងជេនីន ដែលជាទីតាំងរបស់ក្រុមប្រដាប់អាវុធប៉ាឡេស្ទីន។
យ៉ាងណា យោធាអ៊ីស្រាអែលបានអះអាងថា៖«ការបាញ់ព្រមាននេះ គឺដើម្បីកុំឱ្យពួកគេទៅណាឆ្ងាយពីតំបន់ ដែលពួកគេមិនត្រូវបានអនុញ្ញាត»។ ក្រោយការបាញ់ព្រមាននៅតំបន់វេសប៊ែង បែលហ្ស៊ិកបានទាមទារឱ្យអ៊ីស្រាអែលពន្យល់ហេតុផលឱ្យបានជាក់លាក់ ខណៈអេស្ប៉ាញកំពុងលម្អិតអំពីផលប៉ះពាល់ផ្សេងទៀត ដើម្បីរួមគ្នាសម្រុះសម្រួលការឆ្លើយតប ចំពោះអ្វីដែលបានកើតឡើង។ ជាងនេះទៅទៀត រដ្ឋមន្ត្រីការបរទេសអ៊ីតាលី លោក អាន់តូនីញ៉ូ តាចានី (Antonio Tajani) បានកោះហៅឯកអគ្គរដ្ឋទូតអ៊ីស្រាអែលប្រចាំនៅរដ្ឋធានីរ៉ូមមកសួរនាំ។ ចំណែក បារាំង ក៏នឹងកោះហៅឯកអគ្គរដ្ឋទូតអ៊ីស្រាអែលមកជជែកពិភាក្សាគ្នា ខណៈ អាល្លឺម៉ង់ នឹងលើកឡើងអំពីការបាញ់ប្រហារនេះដែរ។ ជាងនេះទៅទៀត អេហ្ស៊ីប បានចាត់ទុកឧបទ្ទវហេតុនេះរំលោភលើបទដ្ឋានការទូតទាំងអស់។
បន្ថែមលើនេះ តួកគី បានទាមទារឱ្យមានការស៊ើបអង្កេតជាបន្ទាន់ លើការបាញ់ប្រហារក្នុងអំឡុងពេលដំណើរទស្សនកិច្ចរបស់អ្នកការទូតបរទេសទៅកាន់តំបន់វេសប៊ែង ដោយយោធាអ៊ីស្រាអែល។ មិននៅស្ងៀមឡើយ សម្តេចប៉ាបថ្មី ក៏បានអំពាវនាវឱ្យអ៊ីស្រាអែលអនុញ្ញាតឱ្យមានជំនួយមនុស្សធម៌នៅហ្កាហ្សាផងដែរ៕
