បរទេស៖ កាលពីថ្ងៃព្រហស្បតិ៍ទី១៥ឧសភា ប្រធានាធិបតីអាម៉េរិក លោក ដូណាល់ ត្រាំ បានលើកឡើងថា លោកបានជំរុញឱ្យក្រុមហ៊ុន Apple ផលិត ផលិតផលរបស់ខ្លួន នៅលើទឹកដីសហរដ្ឋអាម៉េរិក ជំនួសឱ្យប្រទេសឥណ្ឌា ខណៈក្រុមហ៊ុនបច្ចេកវិទ្យាយក្សរបស់សហរដ្ឋអាម៉េរិកមួយនេះ នឹងផ្លាស់ប្ដូរការផលិតបន្ទាប់ពីពន្ធកប់ពពករបស់អាម៉េរិកលើប្រទេសចិន។
លោក ត្រាំ បាននិយាយដោយសំដៅទៅនាយកប្រតិបត្តិរបស់ Apple ក្នុងអំឡុងពេលធ្វើដំណើរទស្សនកិច្ចជាច្រើនថ្ងៃនៅបណ្តាប្រទេសឈូងសមុទ្ទថា៖«ខ្ញុំមានបញ្ហាតិចតួចជាមួយលោក ធីម ឃុក។ ខ្ញុំបាននិយាយថា ធីម យើងបានប្រព្រឹត្តចំពោះអ្នកពិតជាល្អណាស់»។ បន្ថែមពីនោះ លោកប្រធានាធិបតីបាននិយាយថា លោកបានប្រាប់លោក ឃុក ថា៖«យើងមិនចាប់អារម្មណ៍នឹងការសាងសង់របស់អ្នកនៅក្នុងប្រទេសឥណ្ឌាទេ យើងចង់ឱ្យអ្នកសាងសង់នៅទីនេះ ហើយនឹងបង្កើនផលិតកម្មរបស់អ្នកនៅក្នុងសហរដ្ឋអាម៉េរិក»។
កាលពីថ្ងៃចន្ទ សហរដ្ឋអាម៉េរិក និងចិន បានប្រកាសកិច្ចព្រមព្រៀងមួយដើម្បីផ្អាកពន្ធគយរយៈពេល៩០ថ្ងៃ ដោយបន្ថយកម្តៅសង្គ្រាមពាណិជ្ជកម្មដែលបានធ្វើឱ្យទីផ្សារហិរញ្ញវត្ថុមានការភ័យខ្លាច និងបង្កើនការភ័យខ្លាចនៃការធ្លាក់ចុះសេដ្ឋកិច្ចពិភពលោក។ មុនពេលកិច្ចព្រមព្រៀងរវាងរដ្ឋធានីប៉េកាំង និងវ៉ាស៊ីនតោន សម្រេចបាន លោក ឃុក បាននិយាយថា ក្រុមហ៊ុន Apple មិនអាចប៉ាន់ស្មានបានច្បាស់លាស់ពីផលប៉ះពាល់នៃពន្ធគយឡើយ។ នៅពេលបង្ហាញប្រាក់ចំណេញត្រីមាសទី១ របស់ក្រុមហ៊ុនបច្ចេកវិទ្យានៅដើមខែឧសភា លោក ឃុក បាននិយាយថា លោករំពឹងថាទូរសព្ទ iPhone ភាគច្រើនដែលលក់នៅសហរដ្ឋអាម៉េរិកនឹងត្រូវផលិតនៅប្រទេសឥណ្ឌា។
នាយកប្រតិបត្តិរបស់ Apple រូបនេះ បានព្រមានពីផលប៉ះពាល់មិនច្បាស់លាស់នៃពន្ធ១៤៥ភាគរយរបស់សហរដ្ឋអាម៉េរិកលើផលិតផលមកពីប្រទេសចិន ដែលជាមជ្ឈមណ្ឌលផលិតកម្មដ៏យូររបស់ក្រុមហ៊ុន បើទោះបីជាមានការដកជាបណ្តោះអាសន្នសម្រាប់ទំនិញបច្ចេកវិទ្យាកម្រិតខ្ពស់ដូចជាស្មាតហ្វូន និងកុំព្យូទ័រក៏ដោយ។ ទោះបីជាស្មាតហ្វូនដែលបានបញ្ចប់ត្រូវបានលើកលែងពីពន្ធរបស់ត្រាំ សម្រាប់ពេលនេះ មិនមែនសមាសធាតុទាំងអស់ក្នុងឧបករណ៍របស់ក្រុមហ៊ុន Apple ត្រូវបានលើកលែងនោះទេ។ ក្រុមហ៊ុន Apple រំពឹងថា ពន្ធរបស់សហរដ្ឋអាម៉េរិកនឹងមានតម្លៃ៩០០លានដុល្លារអាម៉េរិក នៅក្នុងត្រីមាសបច្ចុប្បន្ន ទោះបីជាផលប៉ះពាល់របស់វាមានកម្រិតនៅដើមឆ្នាំនេះក៏ដោយ។ នេះបើយោងតាមលោក ឃុក។
ឥណ្ឌា ដែលរងការវាយប្រហារពីពន្ធគយរបស់សហរដ្ឋអាម៉េរិកផងនោះ បានគំរាមកំហែងកាលពីថ្ងៃអង្គារ ដើម្បីចាត់វិធានការសងសឹកជាការឆ្លើយតបទៅនឹងការដំឡើងពន្ធលើដែក និងអាលុយមីញ៉ូម។ រដ្ឋមន្ត្រីការបរទេសឥណ្ឌា លោក ស៊ូប្រាហាំយ៉ាំ ចៃសានកា (ភាសាហិណ្ឌី៖ បាននិយាយកាលពីថ្ងៃព្រហស្បតិ៍ថា ការចរចាពាណិជ្ជកម្មរវាងឥណ្ឌា និងសហរដ្ឋអាម៉េរិក កំពុងដំណើរការ ហើយកិច្ចព្រមព្រៀងណាមួយគួរតែផ្តល់ផលប្រយោជន៍ទៅវិញទៅមក។
គួររំឭកថា ក្រុមហ៊ុន Apple បានប្រកាសកាលពីខែកុម្ភៈថា ខ្លួននឹងវិនិយោគជាង៥០០ពាន់លានដុល្លារនៅសហរដ្ឋអាម៉េរិក ក្នុងរយៈពេល៤ឆ្នាំខាងមុខ ហើយបានសន្យាថា នឹងជួលមនុស្សចំនួន២០០០០នាក់នៅក្នុងប្រទេសមហាអំណាចមួយនេះ៕
