ថៃប្រកាសបិទបញ្ចប់ប្រតិបត្តិការរុករក នៅទីតាំងនៃអគារដែលបាក់រលំ ក្នុងអំឡុងការរញ្ជួយដីកាលពីថ្ងៃទី២៨ ខែមីនា
បាងកក៖ ថៃបានប្រកាសបិទបញ្ចប់ប្រតិបត្តិការរុករកនៅទីតាំងនៃអគារកម្ពស់៣០ជាន់នៅរាជធានីបាងកក ដែលបានបាក់រលំក្នុងអំឡុងការរញ្ជួយដីកាលពីថ្ងៃទី២៨ ខែមីនា និងបានសម្លាប់កម្មករសំណង់ជាច្រើននាក់។ នេះបើយោងតាមអភិបាលរាជធានីបាងកក លោក ជ័យជាតិ សិទិ្ធភ័ណ្ឌ បានឲ្យដឹងនៅថ្ងៃអង្គារទី១៣ ខែឧសភា។
លោក ជ័យជាតិ បានប្រាប់អ្នកយកព័ត៌មានថា៖«ខ្ញុំចង់អរគុណអ្នកទាំងអស់ដែលបានជួយ។ នេះជាឧប្បត្តិហេតុផ្លាស់ប្តូរជីវិតសម្រាប់មនុស្សជាច្រើន និងជាមេរៀន»។ អគារការិយាល័យសវនកម្មរដ្ឋកម្ពស់៣០ជាន់ គឺជាអគារតែមួយគត់នៅក្នុងរាជធានីបាងកក ដួលរលំពីការរញ្ជួយដែលបណ្ដាលមកពីការរញ្ជួយដីកម្រិត៧,៧រិចទ័រ វាយប្រហារភាគកណ្តាលប្រទេសមីយ៉ាន់ម៉ា។ ការស៊ើបអង្កេតកំពុងដំណើរការទៅលើមូលហេតុដែលអគារនេះបាករលំយ៉ាងងាយស្រួល ខណៈដែលអគារផ្សេងទៀតឈរយ៉ាងរឹងមាំ។
អាជ្ញាធរបានរកឃើញសាកសពចំនួន៨៩នាក់ពីគំនរបាក់បែក ហើយមនុស្ស៧នាក់ទៀតកំពុងបាត់ខ្លួនពីឧបទ្ទវហេតុដ៏អាក្រក់បំផុតមួយនៅក្នុងប្រទេសថៃ ដោយបានសម្លាប់មនុស្សចំនួន៩៦នាក់។ នៅប្រទេសមីយ៉ាន់ម៉ា មនុស្សជាង៣៧០០នាក់បានបាត់បង់ជីវិត។ ប្រតិបត្តិការស្វែងរករយៈពេលប្រាំមួយសប្តាហ៍នៅក្នុងរាជធានីបាងកកមានការចូលរួមពីបុគ្គលិករាប់រយនាក់ រួមទាំងក្រុមជួយសង្គ្រោះអន្តរជាតិ សត្វឆ្កែស្វែងរក និងឧបករណ៍ធុនធ្ងន់ត្រូវបានដាក់ពង្រាយ។ បេសកកម្មត្រូវបានរារាំងយ៉ាងខ្លាំងដោយមាត្រដ្ឋាន និងទម្ងន់នៃកម្ទេចកម្ទី។
រហូតមកដល់ពេលនេះ អាជ្ញាធរបានកំណត់អត្តសញ្ញាណអ្នកស្លាប់ចំនួន៨៦នាក់ ខណៈការធ្វើកោសល្យវិច័យកំពុងត្រូវបានធ្វើឡើងលើបំណែកសាកសពមនុស្សចំនួន១០០ ក្នុងចំណោម៣១៣បំណែក ដែលបានរកឃើញពីកន្លែងនោះ។ នេះបើយោងតាមប៉ូលិស។ ការស៊ើបអង្កេតកំពុងផ្តោតលើអ្នកដែលពាក់ព័ន្ធក្នុងការសាងសង់អគារនេះ ដែលបានចាប់ផ្តើមនៅឆ្នាំ២០២០។ អង្គការឃ្លាំមើលអំពើពុករលួយថៃ កំពុងស៊ើបអង្កេតចំពោះភាពមិនប្រក្រតី ដែលបានរកឃើញនៅក្នុងការសាងសង់អគារខ្ពស់នេះ មុនពេលវាដួលរលំ ខណៈដែលមន្ត្រីឧស្សាហកម្មបានបញ្ជាក់ថា ការធ្វើតេស្តដំបូងនៃសម្ភារៈនៅកន្លែងនោះបង្ហាញពីវត្តមាននៃដែកថែបដែលមិនមានស្ដង់ដារ៕
