អ្នកនាំពាក្យព្រឹទ្ធសភា៖ គោលនយោបាយការទូតសម្តេចតេជោ មិនបានគិតថាប្រទេសអ្នកមាន ប្រទេសអ្នកក្រ ប្រទេសតូច ឬធំនោះទេ សំខាន់គឺទំនាក់ទំនងច្រើនកាលណាល្អកាលហ្នឹង
ភ្នំពេញ៖ ឯកឧត្តម ជា ធីរិទ្ធ អ្នកនាំពាក្យព្រឹទ្ធសភា បានបញ្ជាក់ថា គោលនយោបាយការទូតសម្តេចតេជោ ហ៊ុន សែន ប្រធានព្រឹទ្ធសភាកម្ពុជា មិនបានគិតថាប្រទេសអ្នកមាន ប្រទេសអ្នកក្រ ប្រទេសតូច ឬធំនោះទេ សំខាន់គឺទំនាក់ទំនងច្រើនកាលណាល្អកាលហ្នឹង។
ឯកឧត្តម ជា ធីរិទ្ធ បានបញ្ជាក់បែបនេះនៅក្នុងសន្និសីទសារព័ត៌មាន ស្តីពីលទ្ធផលនៃដំណើរទស្សនកិច្ចរបស់សម្តេចតេជោ ហ៊ុន សែន នៅប្រទេសឥណ្ឌូនេស៊ី និងទីម័រឡេស្តេ នារសៀលថ្ងៃទី៩ ខែឧសភា ឆ្នាំ២០២៥នេះ។
ឯកឧត្តម ជា ធីរិទ្ធ លើកឡើងថា ទាំងប្រធានាធិបតីទីម័រឡេស្តេ ទាំងនាយករដ្ឋមន្រ្តី និងមន្រ្តីជាន់ខ្ពស់ជាច្រើនទៀតរបស់ទីម័រ បានបង្ហាញភាពស្ងប់ស្ងែងចំពោះសម្តេចតេជោ ហ៊ុន សែន បិតាស្ថាបនិកសន្តិភាពកម្ពុជា ដែលបានហ៊ានលះបង់និង យកជីវិតទៅដោះដូរនូវសន្តិភាពជូនប្រទេសកម្ពុជា។
ឯកឧត្តម អ្នកនាំពាក្យព្រឹទ្ធសភាបញ្ជាក់ថា គោលនយោបាយការទូតសម្តេចតេជោ មិនបានគិតថាប្រទេសអ្នកមាន ប្រទេសអ្នកក្រ ប្រទេសតូច ឬធំនោះទេ សំខាន់គឺទំនាក់ទំនងច្រើនកាលណាល្អកាលហ្នឹង ហើយមួយវិញទៀតទីម័រក៏ជាសមាជិក និងមានសំឡេងនៅក្នុងអង្គការសហប្រជាជាតិផងដែរ ដូច្នេះសំឡេងនេះនឹងមានការគាំទ្រគ្នាទៅវិញទៅមកសម្រាប់តុអង្គការសហប្រជាជាតិ៕
