សម្ដេចធិបតី៖ ការអប់រំ ត្រូវបានចាត់ទុកជាកត្តាកំណត់ដ៏សំខាន់ នៃសុខុមាលភាពសេដ្ឋកិច្ច និងជំរុញកំណើនសេដ្ឋកិច្ច
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដី នៃព្រះរាជាណាចក្រកម្ពុជា បានគូសបញ្ជាក់ថា ការអប់រំ ត្រូវបានចាត់ទុកជាកត្តាកំណត់ដ៏សំខាន់ នៃសុខុមាលភាពសេដ្ឋកិច្ច និងជំរុញកំណើនសេដ្ឋកិច្ច ជាក់ស្តែងមានឥទ្ធិពលវិជ្ជមាន លើកំណើនសេដ្ឋកិច្ច តាមរយៈយន្តការចំនួន៣។
ក្នុងឱកាសអញ្ជើញសម្ពោធអគារអន្តេវាសិកដ្ឋានតេជោសន្តិភាព និង សមិទ្ធផលនានា នៅវត្តស្វាយពពែ នាព្រឹកថ្ងៃទី៩ ខែឧសភា ឆ្នាំ២០២៥នេះ សម្ដេចធិបតី ហ៊ុន ម៉ាណែត បានឱ្យដឹងថា ការអប់រំ ត្រូវបានចាត់ទុកថា ជាកត្តាកំណត់ដ៏សំខាន់ នៃសុខុមាលភាពសេដ្ឋកិច្ច និងជំរុញកំណើតសេដ្ឋកិច្ច។
សម្តេចធិបតីបន្ដថា ជាក់ស្ដែងការអប់រំ មានឥទ្ធិពលវិជ្ជាមានលើកំណើតសេដ្ឋកិច្ច តាមរយៈយុទ្ធការ ចំនួន៣ រួមមាន៖ ទី១- គឺការអប់រំបង្កើតមូលធនមនុស្ស នៅក្នុងកម្លាំងពលកម្មសរុបជាតិ ដែលជាកត្តាចាំបាច់សម្រាប់បង្កើតលទ្ធភាពពលកម្ម និងជំរុញកំណើតឆ្ពោះទៅកម្រិតថ្មីមួយទៀត។ ទី២- ការអប់រំ បង្កើនសមត្ថភាព ក្នុងការធ្វើនវានុវត្តន៍ក្នុងសេដ្ឋកិច្ច ព្រមទាំងបង្កើនចំណេះដឹង សម្រាប់ចាប់យកបច្ចេកវិទ្យាថ្មីៗ និងការវិវត្តន៍ផលិតផលថ្មី ដើម្បីជួយលើកកម្ពស់កំណើតសេដ្ឋកិច្ច និងទី៣- ការអប់រំជួយសម្រួលដល់ការផ្ទេរបច្ចេកវិទ្យា និងចំណេះដឹងថ្មីៗទៀត ដែលកត្តាទាំងនេះ ជួយបង្កើនផលិតភាពការជំរុញសេដ្ឋកិច្ច។
សម្តេចធិបតីនាយករដ្ឋមន្ត្រីបន្ថែមថា ការអភិវឌ្ឍធនធានមនុស្ស ប្រកបដោយសមត្ថភាពខ្ពស់ គឺពិតធ្វើឱ្យប្រទេសជាតិយើងធានាបាន នូវការប្រកួតប្រជែង ប្រកបដោយជោគជ័យ នៅក្នុងបរិការណ៍ទាំងអស់។ នេះគឺជាកត្តាកំណត់ នៃសមត្ថភាព របស់ប្រទេសជាតិមួយ នៅក្នុងការធានាប្រកួតប្រជែង ធនធានមនុស្ស មិនថា ក្នុងលក្ខណៈគ្រួសារ លក្ខណៈសង្គមជាតិ តែងតែផ្ដល់ការយកចិត្តទុកដាក់៕
