សម្ដេចធិបតី នឹងអញ្ជើញសម្ពោធរោងចក្រទី២០០ នៅតំបន់សេដ្ឋកិច្ចមួយនៅខេត្តព្រះសីហនុ នាពេលដ៏ខ្លីខាងមុខនេះ
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដី នៃព្រះរាជាណាចក្រកម្ពុជា បានបញ្ជាក់ថា នាពេលដ៏ខ្លីខាងមុខនេះ សម្តេចនឹងអញ្ជើញសម្ពោធរោងចក្រទី២០០ នៅតំបន់សេដ្ឋកិច្ចមួយនៅខេត្តព្រះសីហនុ។
ក្នុងឳកាសអញ្ជើញសំណេះសំណាលជាមួយមន្ត្រីរាជការ បុគ្គលិក កម្មករនិយោជិត ដែលកំពុងបម្រើការងារ នៅកំពង់ផែស្វយ័តក្រុងព្រះសីហនុ នាព្រឹកថ្ងៃទី០១ ខែឧសភា ឆ្នាំ២០២៥នេះ សម្ដេចមហាបវរធិបតី ហ៊ុន ម៉ាណែត បានចូលរួមអបអរសាទរចំពោះកម្មករ និយោជិត និង និយោជក នៅទូទាំងប្រទេស ក្នុងឱកាសទិវាពលកម្មអន្ដរជាតិ ១ ឧសភា ឆ្នាំ ២០២៥។
សម្តេចធិបតីនាយករដ្ឋមន្រ្ដីបានបន្ថែមថា ជារៀងរាល់ឆ្នាំ, បងប្អូនមន្ត្រីរាជការ, បុគ្គលិក, កម្មករនិយោជិតនៃកំពង់ផែស្វយ័ត ក្រុងព្រះសីហនុ តែងតែបានជួបជុំគ្នា ដើម្បីអបអរសាទរទិវាពលកម្មអន្តរជាតិនេះ ហើយការប្រារព្ធពិធីអបអរនៅទីនេះ គឺពិតជាមានអត្ថន័យយ៉ាងជ្រាលជ្រៅ ហើយក៏ជាឱកាសដ៏ល្អ សម្រាប់ការមកចូលរួមជួបជុំរីករាយផងដែរ៕
