គ្រឹះស្ថានអប់រំរបស់ថៃ គ្រោងរៀបចំបញ្ជូនសិស្ស និស្សិត លោកគ្រូ-អ្នកគ្រូ និងបុគ្គលិកអប់រំថៃមកទស្សនាកម្ពុជា ជាប្រចាំឆ្នាំ

ភ្នំពេញ៖ នាព្រឹកថ្ងៃទី៣០ ខែមេសា ឆ្នាំ២០២៥ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានអនុញ្ញាតជូន លោក ធួន ស៊ីណាន ប្រធានសមាគទេសចរណ៍អាស៊ីប៉ាស៊ីហ្វិកកម្ពុជា និងលោកគ្រូ-អ្នកគ្រូ តំណាងគ្រឹះស្ថានអប់រំរបស់ប្រទេសថៃ អញ្ជើញចូលជួបសម្តែងការគួរសម និងពិភាក្សាការងារស្តីពីដំណើរទស្សនកិច្ចសិក្សា (FAM Trip) របស់តំណាងគ្រឹះស្ថានអប់រំរបស់ប្រទេសថៃ មកកម្ពុជា ដើម្បីពិនិត្យស្ថានភាព និងគម្រោងរៀបចំបញ្ជូនសិស្ស និស្សិត លោកគ្រូ-អ្នកគ្រូ និងបុគ្គលិកអប់រំថៃមកទស្សនាកម្ពុជាជាប្រចាំឆ្នាំ ក្រោមគំនិតផ្តួចផ្តើមនៃកម្មវិធីលើកទឹកចិត្ត (Motivational Program) របស់ក្រសួងអប់រំថៃ ក្នុងគោលបំណងលើកទឹកចិត្តឱ្យគ្រឹះស្ថានអប់រំទាំងរដ្ឋ និងផ្នែកឯកជនរបស់ប្រទេសថៃ ភ្ជាប់កម្មសិក្សារបស់សិស្ស និស្សិត គ្រូបង្រៀន និងបុគ្គលិកអប់រំទៅក្នុងបណ្តាប្រទេសអាស៊ាន។

ជាលទ្ធផលនៃជំនួបនេះ ឯកឧត្តមរដ្ឋមន្ត្រី បានបង្ហាញនូវជំហរគាំទ្រ និងស្វាគមន៍គម្រោងរៀបចំបញ្ជូនសិស្ស និស្សិត លោកគ្រូ-អ្នកគ្រូ មកទស្សនាកម្ពុជាជារៀងរាល់ឆ្នាំ និងបានថ្លែងអំណរគុណដល់គណៈប្រតិភូ ដែលបានទុកចិត្តជ្រើសរើសកម្ពុជា ជាគោលដៅទស្សនកិច្ចកម្សាន្តប្រចាំឆ្នាំ និងសង្ឃឹមថា ដំណើរទស្សនកិច្ចរបស់គណៈប្រតិភូ ប្រកបដោយភាពរលូន និងជោគជ័យ ឈានដល់ការចុះកិច្ចសន្យានាដំណាច់ឆ្នាំ២០២៥នេះ ៕