ចិន ប្រកាសថាខ្លួនប្រឆាំងចំពោះប្រទេសផ្សេងទៀតដែលធ្វើកិច្ចព្រមព្រៀងពាណិជ្ជកម្មជាមួយអាម៉េរិក
ប៉េកាំង៖ មហាយក្សចិននៅថ្ងៃចន្ទទី២១ ខែមេសា បានប្រកាសថាខ្លួនប្រឆាំងយ៉ាងមុតមាំចំពោះប្រទេសផ្សេងទៀតដែលធ្វើកិច្ចព្រមព្រៀងពាណិជ្ជកម្មជាមួយសហរដ្ឋអាម៉េរិកហើយដែលប៉ះពាល់ដល់ផលប្រយោជន៍របស់ខ្លួន។ មហាអំណាចសេដ្ឋកិច្ចលំដាប់ទី២ លើសាកលលោកនេះបានព្រមានមិនឱបដៃឈរមើលឡើយ ដោយខ្លួននឹងចាត់វិធានការប្រឆាំងតបត។
រដ្ឋធានីប៉េកាំងបានព្រមានប្រទេសនានានៅថ្ងៃចន្ទកុំឱ្យស្វែងរកកិច្ចព្រមព្រៀងជាមួយសហរដ្ឋអាម៉េរិក ដែលប៉ះពាល់ដល់ផលប្រយោជន៍របស់ខ្លួន។
អ្នកនាំពាក្យក្រសួងពាណិជ្ជកម្មរបស់ប្រទេសកុម្មុយនីស្ដចិន បានលើកឡើងនៅក្នុងសេចក្តីថ្លែងការណ៍មួយថា ប្រទេសចិនគោរពគ្រប់ភាគីទាំងអស់ក្នុងការដោះស្រាយភាពខុសគ្នាខាងសេដ្ឋកិច្ច និងពាណិជ្ជកម្មជាមួយសហរដ្ឋអាម៉េរិក តាមរយៈការពិគ្រោះដោយស្មើភាពគ្នា ប៉ុន្តែខ្លួននឹងប្រឆាំងយ៉ាងម៉ឺងម៉ាត់ចំពោះភាគីណាមួយដែលធ្វើកិច្ចព្រមព្រៀងប៉ះពាល់ដល់ផលប្រយោជន៍របស់ចិន។
អ្នកនាំពាក្យរូបនេះ បានបន្តថា ចិននឹងចាត់វិធានការតបតវិញក្នុងលក្ខណៈម៉ឺងម៉ាត់ ប្រសិនបើប្រទេសណាមួយស្វែងរកកិច្ចព្រមព្រៀងបែបនេះ។
ខណៈពេលដែលប្រទេសដទៃទៀតនៃពិភពលោកប្រឈមនឹងការយកពន្ធ១០ ភាគរយ ចិនប្រឈមនឹងការយកពន្ធរហូតដល់១៤៥ ភាគរយលើផលិតផលជាច្រើន។ រដ្ឋធានីប៉េកាំងបានឆ្លើយតបជាមួយនឹងពន្ធចំនួន១២៥ ភាគរយលើទំនិញរបស់សហរដ្ឋអាម៉េរិក។
ប្រទេសមួយចំនួនឥឡូវនេះកំពុងចូលរួមក្នុងការចរចាជាមួយសហរដ្ឋអាម៉េរិកដើម្បីបន្ធូរបន្ថយពន្ធ ក្រោមស្រមោលនៃសង្រ្គាមពាណិជ្ជកម្មរបស់រដ្ឋធានីវ៉ាស៊ីនតោនប្រឆាំងនឹងគូប្រជែងសេដ្ឋកិច្ចកំពូលរបស់ខ្លួនគឺប្រទេសចិន។
កិច្ចពិភាក្សាទ្វេភាគីជាច្រើនស្តីពីពន្ធគយបានកើតឡើងចាប់តាំងពីពេលនោះមក ដោយប្រទេសជប៉ុនបានពិចារណាលើការបង្កើនការនាំចូលសណ្តែកសៀង និងអង្ករជាផ្នែកនៃកិច្ចពិភាក្សារបស់ខ្លួនជាមួយសហរដ្ឋអាម៉េរិក ខណៈដែលឥណ្ឌូណេស៊ីកំពុងរៀបចំផែនការបង្កើនការនាំចូលអាហារ និងទំនិញរបស់សហរដ្ឋអាម៉េរិក និងកាត់បន្ថយការបញ្ជាទិញពីប្រទេសដទៃទៀត។
គួរបញ្ជាក់ថា ប្រធានាធិបតីចិន លោក ស៊ី ជីនពីង បានបំពេញទស្សនកិច្ចនៅប្រទេសអាស៊ីអាគ្នេយ៍ចំនួនបី កាលពីសប្តាហ៍មុន ដើម្បីពង្រឹងទំនាក់ទំនងក្នុងតំបន់ដោយអំពាវនាវឱ្យដៃគូពាណិជ្ជកម្មប្រឆាំងនឹងការគំរាមកំហែងដោយឯកតោភាគី។ លោក ស៊ី បានលើកឡើងនៅក្នុងអត្ថបទមួយដែលត្រូវបានផ្សព្វផ្សាយនៅក្នុងប្រព័ន្ធផ្សព្វផ្សាយវៀតណាម ដោយមិនបាននិយាយអំពីសហរដ្ឋអាម៉េរិកថា មិនមានអ្នកឈ្នះនៅក្នុងសង្គ្រាមពាណិជ្ជកម្ម និងសង្គ្រាមពន្ធនោះទេ។
