គ្រោះរញ្ជួយដីដ៏ខ្លាំងសម្បើមបានវាយប្រហារភាគកណ្តាលប្រទេសមីយ៉ាន់ម៉ា ខណៈសំណង់អគារជាច្រើនបានបាក់ដួលរលំទីក្រុងម៉ាន់ដាឡេជាទីក្រុងធំទី២របស់ប្រទេសនេះ
ណៃពិដោ៖ គ្រោះរញ្ជួយដីដ៏ខ្លាំងសម្បើមបានវាយប្រហារភាគកណ្តាលប្រទេសមីយ៉ាន់ម៉ា នៅរសៀលថ្ងៃសុក្រទី២៨ ខែមីនានេះ ខណៈសំណង់អគារជាច្រើនបានបាក់ដួលរលំ ជាពិសេសនៅក្នុងទីក្រុងម៉ាន់ដាឡេជាទីក្រុងធំទី២របស់ប្រទេសនេះ។ ទន្ទឹមនឹងនោះ ប្រទេសថៃកំពុងរងគ្រោះខ្លាំងមិនចាញ់ភូមាផងដែរ ខណៈដែលវៀតណាមកំពុងភ័យបុកពោះ។
គ្រោះរញ្ជួយដីមានកម្រិត៧,៧រ៉ិចទ័រ និងមានជម្រៅ១០គីឡូម៉ែត្រ បាននាំឱ្យប្រទេសកំពុងមានវិបត្តិស្រាប់នេះរងទុក្ខបន្ថែមទៀត។ ជាក់ស្តែង ចំណុចកណ្តាលនៃការរញ្ជួយដីនេះមានចម្ងាយប្រហែល១៧,២គីឡូម៉ែត្រពីទីក្រុងម៉ាន់ដាឡេ ដែលមានប្រជាជនប្រហែល១,៥លាននាក់។ សំណង់អាគារបានបាក់រលំ និងកម្ទេចកម្ទីថ្មបានរាយរប៉ាត់រប៉ាយពាសពេញផ្លូវក្នុងទីក្រុង។ សូម្បីតែស្ពានដ៏ចំណាស់សម័យអាណានិគម ដែលលាតសន្ធឹងលើទន្លេឆ្លងទន្លេអ៊ីរ៉ាវ៉ាឌី តភ្ជាប់តំបន់ម៉ាន់ដាឡេ និងស៊ើហ្គាំង ក៏ត្រូវបានបាក់រលំខ្ទិចខ្ទីដោយគ្រោះរញ្ជួយដីនេះផងដែរ។
មន្ត្រីនាយកដ្ឋានសេវាពន្លត់អគ្គិភ័យមីយ៉ាន់ម៉ាបានប្រាប់រ៉យទ័រថា៖ «យើងបានចាប់ផ្តើមប្រតិបត្តិការស្វែងរកជុំវិញទីក្រុងយ៉ាំងហ្កោន ដើម្បីពិនិត្យរកអ្នកស្លាប់ និងការខូចខាត។ រហូតមកដល់ពេលនេះ យើងមិនទាន់មានព័ត៌មាននៅឡើយទេ»។
គួរជម្រាបថា ប្រជាជនបាននាំគ្នាបានរត់ជាន់ជើងគ្នាចាកចោលផ្ទះសម្បែង ខណៈសំណង់អគារជាច្រើនជាន់បានដួលរលំនៅចំពោះមុខពួកគេស្រស់ៗតែម្ដង។ សាក្សីបានអះអាងថា មនុស្សជាច្រើនបានជាប់នៅខាងក្នុងនៃគំនរថ្មអាគារថ្មបាក់បែក ក្រោយអាគារធំៗទាំងនោះបានបាក់រលំសង្កត់ពីលើ។
ក្រៅពីនេះ សំណង់អគារនានាក៏បានបាក់រលំ និងញ័ររញ្ជួយផងដែរក្នុងរាជធានីបាងកក ប្រទេសថៃ ដែលមានចម្ងាយប្រហែល១០០០គីឡូម៉ែត្រ ខណៈមនុស្សជាច្រើនរត់រកទីតាំងសុវត្ថិភាព ស្របពេលអគារកំពុងសាងសង់មួយមានកម្មករប្រមាណ៥០នាក់បានស្រុតរលំស្រស់ៗ ដោយមានតែ៧នាក់ប៉ុណ្ណោះបានរត់ចេញរួចខ្លួន។ យ៉ាងណា មនុស្សចំនួន៤៣នាក់កំពុងជាប់នៅក្នុងសាកសពអគារ។ គួរជម្រាបថា ប្រជាជននៅទូទាំងរដ្ឋធានីហាណូយកំពុងភ័យស្លន់ស្លោ ដោយសារសំណង់អាគារនានាក្នុងប្រទេសវៀតណាមបានញ័ររញ្ជួយ ខណៈមនុស្សម្នារធ្វើការទាំងអារម្មណ៍មិននៅក្នុងខ្លួន។
គួរបញ្ជាក់ថា គ្រោះរញ្ជួយដីដ៏សាហាវនេះ បានវាយប្រហារខ្លាំងជាងគេលើប្រទេសមីយ៉ាន់ម៉ា និងថៃ ខណៈវៀតណាមរងឥទ្ធិពលតិចជាងគេ។
