រដ្ឋបាលប្រធានាធិបតីអាមេរិក ប្រកាសផ្តល់ជំនួយហិរញ្ញវត្ថុថ្មីចំនួន៧៣លានដុល្លារដល់ជនភៀសខ្លួនរ៉ូហ៊ីងយ៉ា

វ៉ាស៊ីនតោន៖ រដ្ឋបាលលោកប្រធានាធិបតី ដូណាល់ ត្រាំ បានប្រកាសនៅថ្ងៃព្រហស្បតិ៍ទី២៧មីនាថា ខ្លួននឹងផ្តល់ជំនួយហិរញ្ញវត្ថុថ្មីចំនួន៧៣លានដុល្លារដល់ជនភៀសខ្លួនរ៉ូហ៊ីងយ៉ា តាមរយៈកម្មវិធីស្បៀងអាហារពិភពលោករបស់អង្គការសហប្រជាជាតិ ចំពេលមានការព្រួយបារម្ភថា ការកាត់បន្ថយជំនួយអាចធ្វើឱ្យវិបត្តិកាន់តែធ្ងន់ធ្ងរដល់ប្រជាជនគ្មានរដ្ឋដ៏ធំបំផុតរបស់ពិភពលោកមួយនេះ។

អ្នកនាំពាក្យក្រសួងការបរទេសសហរដ្ឋអាម៉េរិក លោកស្រី ថាំមី ប្រ៊ូស (Tammy Bruce) បានបញ្ជាក់នៅក្នុងសារបង្ហោះនៅលើបណ្តាញសង្គម X ថា៖ «ការគាំទ្រផ្នែកអាហារ និងអាហារូបត្ថម្ភតាមរយៈកម្មវិធីស្បៀងអាហារពិភពលោករបស់អង្គការសហប្រជាជាតិ នឹងផ្តល់ជំនួយផ្នែកអាហារ និងអាហារូបត្ថម្ភដែលត្រូវការជាចាំបាច់សម្រាប់មនុស្សជាងមួយលាននាក់»។

ការប្រកាសនេះកើតឡើងនៅពេលដែលប្រធានាធិបតីអាម៉េរិក លោក ដូណាល់ ត្រាំ និងរដ្ឋបាលរបស់លោកកាត់បន្ថយយ៉ាងខ្លាំង ចំពោះជំនួយបរទេសដែលជាផ្នែកមួយនៃរគោលនយោបាយ «America First» របស់លោក និងកិច្ចខិតខំប្រឹងប្រែងយ៉ាងទូលំទូលាយ ដើម្បីកាត់បន្ថយការចំណាយរបស់សហព័ន្ធ ក៏ដូចជារុះរើផ្នែកខ្លះនៃរដ្ឋាភិបាលសហរដ្ឋអាម៉េរិក។ រដ្ឋធានីវ៉ាស៊ីនតោន គឺជាអ្នកផ្តល់ជំនួយធំបំផុតដល់ជនភៀសខ្លួនរ៉ូហ៊ីងយ៉ា ដែលបានរួមចំណែកជិត២,៤ពាន់លានដុល្លារចាប់តាំងពីឆ្នាំ២០១៧។ នេះបើយោងតាមក្រសួងការបរទេសអាម៉េរិក។ ប៉ុន្តែការបង្កកមូលនិធិនាពេលថ្មីៗនេះ បន្ទាប់ពីលោក ត្រាំ ចូលកាន់តំណែងក្នុងខែមករា បានបង្ខំឱ្យមន្ទីរពេទ្យយ៉ាងតិចចំនួន៥ កាត់បន្ថយសេវាកម្ម។

ទីភ្នាក់ងារអង្គការសហប្រជាជាតិចំនួនពីរបានព្រមានថា ឱនភាពថវិកានឹងទប់ស្កាត់ការផ្ដល់អាហារូបត្ថម្ភសម្រាប់ជនជាតិរ៉ូហ៊ីងយ៉ានៅក្នុងប្រទេសបង់ក្លាដែស ដែលបានភៀសខ្លួនចេញពីអំពើហិង្សានៅប្រទេសមីយ៉ាន់ម៉ា ក្នុងរយៈពេលប្រាំបីឆ្នាំកន្លងមកនេះ។ ជនភៀសខ្លួនមានការព្រួយបារម្ភថា ការកាត់បន្ថយនឹងធ្វើឱ្យភាពអត់ឃ្លានកាន់តែអាក្រក់ កាត់បន្ថយការថែទាំសុខភាពធ្ងន់ធ្ងរ និងជំរុញឱ្យមានឧក្រិដ្ឋកម្មកាន់តែច្រើន។ អង្គការសហប្រជាជាតិ និងដៃគូជាង១០០ កំពុងស្វែងរកថវិកាប្រមាណជិត១ពាន់លានដុល្លារ ដើម្បីផ្តល់ជំនួយសង្គ្រោះអាយុជីវិតនៅឆ្នាំនេះ សម្រាប់ជនភៀសខ្លួនរ៉ូហ៊ីងយ៉ាប្រមាណ១,៥លាននាក់ ដែលកំពុងរស់នៅក្នុងប្រទេសបង់ក្លាដែស។