កូរ៉េខាងត្បូង ចោទប្រកាន់អ្នកបើកបរយន្តហោះពីរនាក់ ពីបទធ្វេសប្រហែស ចំពោះការទម្លាក់គ្រាប់បែកដោយចៃដន្យលើភូមិមួយ អំឡុងពេលសមយុទ្ធហ្វឹកហ្វឺន

សេអ៊ូល៖ ក្រុមអ្នកស៊ើបអង្កេតយោធាកូរ៉េខាងត្បូង បានចោទប្រកាន់អ្នកបើកបរយន្តហោះពីរនាក់ ពីបទធ្វេសប្រហែសព្រហ្មទណ្ឌ ចំពោះការទម្លាក់គ្រាប់បែកដោយចៃដន្យលើភូមិមួយកាលពីសប្តាហ៍មុន ក្នុងអំឡុងពេលសមយុទ្ធហ្វឹកហ្វឺនដែលបានធ្វើឱ្យមនុស្សយ៉ាងហោចណាស់២៩នាក់បានរងរបួស និងបណ្តាលឱ្យខូចខាតទ្រព្យសម្បត្តិជាច្រើន។

បញ្ជាការស៊ើបអង្កេតឧក្រិដ្ឋកម្មរបស់ក្រសួង បានប្រកាសនៅក្នុងសេចក្តីថ្លែងការណ៍មួយថា អ្នកស៊ើបអង្កេតក្រសួងការពារជាតិបានបញ្ជាក់ថា កំហុសរបស់អ្នកបើកយន្តហោះនៅពេលពួកគេបានបញ្ចូលកូអរដោណេទៅក្នុងប្រព័ន្ធយន្តហោះ គឺជាកត្តាផ្ទាល់នៅពីក្រោយនៃការទម្លាក់គ្រាប់បែកដោយចៃដន្យ។ បញ្ជាការបន្តថា អ្នកបើកយន្តហោះត្រូវបានចោទប្រកាន់ពីបទធ្វេសប្រហែសព្រហ្មទណ្ឌ បង្កគ្រោះថ្នាក់ដល់រាងកាយ ដោយបន្ថែមការស៊ើបអង្កេតលើឧប្បត្តិហេតុកំពុងបន្ត។ គ្រាប់បែកចំនួន៨គ្រាប់ត្រូវបានទម្លាក់ចេញពីយន្តហោះចម្បាំងពីរគ្រឿង ហើយបានធ្លាក់លើភូមិមួយក្នុងទីក្រុង Pocheon ក្បែរព្រំដែនជាមួយប្រទេសកូរ៉េខាងជើង។ តំបន់ជាច្រើននៅក្នុងក្រុង Pocheon និងតំបន់ជិតខាង មានកន្លែងហ្វឹកហាត់ប្រើប្រាស់ដោយយោធាកូរ៉េខាងត្បូង និងសហរដ្ឋអាម៉េរិក។

អ្នកស្រុកជាច្រើនបានត្អូញត្អែរអំពីហានិភ័យសុវត្ថិភាពដែលអាចកើតមាន និងការរំខានពីអង្គភាពយោធា ដែលកំពុងត្រូវបានចល័តនៅក្នុងតំបន់នេះ។ មន្ត្រីក្រសួងនិយាយថា អ្នកបើកយន្តហោះទាំងពីរនាក់ត្រូវបានដកចេញពីកាតព្វកិច្ចហោះហើរ ហើយការត្រួតពិនិត្យឡើងវិញនៃវិញ្ញាបនប័ត្របេសកកម្មហោះហើររបស់ពួកគេ ក៏ត្រូវបានកំណត់ឡើងវិញ។ នាយសេនាធិការកងទ័ពអាកាស បានសុំទោសចំពោះឧបទ្ទវហេតុនេះ ហើយសន្យាថា នឹងពិនិត្យឡើងវិញនូវនីតិវិធីបេសកកម្មដើម្បីការពារឧប្បត្តិហេតុស្រដៀងគ្នានេះ។ ប្រទេសផ្តាច់ការកូរ៉េខាងជើង ដែលតែងតែបរិហារសមយុទ្ធយោធាដោយយោធាកូរ៉េខាងត្បូង និងសហរដ្ឋអាម៉េរិក បានលើកឡើងថា ឧបទ្ទវហេតុនេះបង្ហាញពីហានិភ័យនៃសមយុទ្ធ ដែលបង្កឱ្យមានជម្លោះប្រដាប់អាវុធ ដោយលើកឡើងពីលទ្ធភាពដែលគ្រាប់បែកអាចទម្លាក់នៅភាគខាងជើងនៃព្រំដែន៕