Apple – Meta នឹងត្រូវប្រឈមមុខ ការផាកពិន័យពីអឺរ៉ុប ជុំវិញការចោទប្រកាន់ថាបានបំពានច្បាប់ទីផ្សារឌីជីថល

បរទេស៖ ក្រុមហ៊ុនបច្ចេកវិទ្យាយក្ស Apple និង​ Meta ត្រូវបានគេរាយការណ៍មកថា នឹងត្រូវប្រឈមមុខនឹងការផាកពិន័យពីសហភាពអឺរ៉ុប ជុំវិញការចោទប្រកាន់ថាបានបំពានច្បាប់ទីផ្សារឌីជីថល (DMA) ក្នុងគោលបំណងចង់ពង្រឹងអំណាចរបស់ពួកគេឡើងវិញ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី១១ ខែមីនា ឆ្នាំ២០២៥។​

ក្រុមហ៊ុនលំដាប់ខ្នាតយក្សទាំងពីរនេះ បានស្ថិតក្រោមការត្រួតពិនិត្យដោយគណៈកម្មការអឺរ៉ុបចាប់តាំងពីឆ្នាំមុនមកម្លេះ ទាក់ទងនឹងការបំពានច្បាប់ទីផ្សារឌីជីថល ហើយអាចឈានដល់ការផាកពិន័យរហូតដល់ ១០% នៃប្រាក់ចំណូលប្រចាំឆ្នាំជាសកលរបស់ពួកគេ។​ ច្បាប់ទីផ្សារឌីជីថល (DMA)​ បានចូលជាធរមានក្នុងខែឧសភា ឆ្នាំ២០២៣ មានគោលបំណងគ្រប់គ្រងថាមពលរបស់ក្រុមហ៊ុនឌីជីថលធំៗ និងធានាឱ្យមានការប្រកួតប្រជែងដោយយុត្តិធម៌នៅក្នុងទីផ្សារឌីជីថល។

ប្រភពមិនបង្ហាញឈ្មោះបានឱ្យដឹងថា ការសម្រេចចុងក្រោយលើទំហំនៃការផាកពិន័យនៅមិនទាន់ត្រូវបានគេធ្វើឡើងនៅឡើយទេ ហើយស្ថានភាពអាចមានការផ្លាស់ប្តូរ។ តែយ៉ាងណា ការសម្រេចចិត្តត្រូវបានគេរំពឹងទុកថានឹងធ្វើឡើងក្នុងខែនេះតែម្តងស្រប​តាម​អ្វី​ដែលមន្ត្រីសហភាព​អឺរ៉ុប លោកស្រី Teresa Ribera បាន​ប្រាប់ Reuters កាល​ពី​ខែ​កុម្ភៈ ហើយទំហំនៃការផាកពិន័យនេះទំនងក្នុងចំនួនតិចតួចប៉ុណ្ណោះ ការធ្វើបែបនេះអាចជាការគំរាមក្រុមហ៊ុន Apple, Meta និងក្រុមហ៊ុនផ្សេងទៀតដែលចង់ទាមទារអំណាចគ្រប់គ្រងលើទីផ្សាររបស់ពួកគេ។
គួរជម្រាបថា ក្រុមហ៊ុន Apple និង Meta នៅមិនទាន់មានការឆ្លើយតបណាមួយទាក់ទិននឹងរបាយការណ៍ចុះផ្សាយចុងក្រោយនេះទេ។

ប៉ុន្តែបើយោងតាមរបាយការណ៍អនុលោមភាពដែលបានចេញផ្សាយកាលពីសប្តាហ៍មុន Meta បាននិយាយថា ទោះបីជាមានការខិតខំប្រឹងប្រែងរួមគ្នារបស់ខ្លួនក្នុងការអនុលោមតាមបទប្បញ្ញត្តិរបស់សហភាពអឺរ៉ុបក៏ដោយ ក្រុមហ៊ុននៅតែបន្តទទួលបានការទាមទារពីនិយតករដែលលើសពីអ្វីដែលត្រូវបានសរសេរនៅក្នុងច្បាប់៕