រដ្ឋបាលរបស់លោកប្រធានាធិបតី ដូណាល់ ត្រាំ បិទកម្មវិធី៨៣ភាគរយ និងលុបចោលកិច្ចសន្យាចំនួន៥២០០នៅទីភ្នាក់ងារសហរដ្ឋអាម៉េរិក

វ៉ាស៊ីនតោន៖ លោក ម៉ាកូ រូប៊ីអូ រដ្ឋមន្ត្រីការបរទេសសហរដ្ឋអាម៉េរិកបាននិយាយថា រដ្ឋបាលរបស់លោកប្រធានាធិបតី ដូណាល់ ត្រាំ បិទកម្មវិធី៨៣ភាគរយ និងលុបចោលកិច្ចសន្យាចំនួន៥២០០នៅទីភ្នាក់ងារសហរដ្ឋអាម៉េរិក សម្រាប់ការអភិវឌ្ឍអន្តរជាតិ ឬហៅកាត់ជាភាសាអង់គ្លេសថា USAID ខណៈក្រសួងការបរទេសបានបញ្ចប់ការត្រួតពិនិត្យលើទីភ្នាក់ងារចែកចាយជំនួយទៅក្រៅប្រទេស។

លោក រូប៊ីអូ បញ្ជាក់នៅក្នុងការបង្ហោះនៅលើគណនីផ្ទាល់ខ្លួនរបស់គាត់ក្នុងបណ្តាញសង្គម X កាលពីថ្ងៃចន្ទទី១០ ខែមីនាថា៖«ការលុបចោលនេះ គឺជាផ្លូវការបន្ទាប់ពីការត្រួតពិនិត្យរយៈពេលប្រាំមួយសប្តាហ៍របស់ក្រសួងការបរទេស»។

លោក រូប៊ីអូ បន្តថា៖«កិច្ចសន្យាដែលបានចំណាយលុយរាប់សិបពាន់លានដុល្លារ ក្នុងកម្មវិធីដែលមិនបម្រើ ហើយករណីខ្លះថែមទាំងប៉ះពាល់ដល់ផលប្រយោជន៍ស្នូលរបស់ជាតិ ត្រូវលុបចោល»។

ប្រមុខការទូតរូបនេះបន្ថែមថា នៅក្នុងការពិគ្រោះយោបល់ជាមួយសភា យើងរក្សាទុក១៨ភាគរយនៃកម្មវិធីដែលនៅសល់(ប្រហែល១ពាន់កម្មវិធី) ឥឡូវនេះ ត្រូវបានគ្រប់គ្រងឱ្យកាន់តែមានប្រសិទ្ធភាពនៅក្រោមក្រសួងការបរទេស។

លោកបន្ថែមថា៖«សូមអរគុណដល់នាយកដ្ឋានប្រសិទ្ធភាពរដ្ឋាភិបាល (DOGE) និងបុគ្គលិកឧស្សាហ៍ព្យាយាមរបស់យើង ដែលបានធ្វើការជាច្រើនម៉ោង ដើម្បីសម្រេចបាននូវកំណែទម្រង់មុនកាលកំណត់ និងជាប្រវត្តិសាស្ត្រនេះ»។ ការអរគុណទៅកាន់នាយកដ្ឋានប្រសិទ្ធភាពរបស់រដ្ឋាភិបាល ធ្វើឡើងបន្ទាប់ពីមានរបាយការណ៍អំពីការប៉ះទង្គិចរវាងលោក រូប៊ីអូ និងលោក អេឡុន ម៉ាសក៍ ក្នុងកិច្ចប្រជុំគណៈរដ្ឋមន្ត្រីកាលពីសប្តាហ៍មុន ខណៈនាយកដ្ឋានប្រសិទ្ធភាពរដ្ឋាភិបាល ដឹកនាំដោយមហាសេដ្ឋី អេឡុន ម៉ាសក៍។

នៅថ្ងៃដំបូងដែលលោកចូលកាន់តំណែង លោកប្រធានាធិបតី ដូណាល់ ត្រាំ មកពីគណបក្សសាធារណរដ្ឋ បានបញ្ជាឱ្យផ្អាករយៈពេល៩០ថ្ងៃលើការទូទាត់ជំនួយបរទេសទាំងអស់។ ក្រុមជំនួយបានជួបភាពចលាចល ហើយបុគ្គលិករាប់ពាន់នាក់ត្រូវបានដាក់ឱ្យឈប់សម្រាក ឬបណ្តេញចេញ។

លោក ត្រាំ បានប្រគល់ដាវអាជ្ញាសឹកឱ្យទីប្រឹក្សាជិតស្និទ្ធរបស់ខ្លួន ជាមួយនឹងការរុះរើទីភ្នាក់ងារ USAID។ ទន្ទឹមនឹងនេះ អង្គការជំនួយបរទេសរបស់សហរដ្ឋអាម៉េរិក បានប្តឹងរដ្ឋបាលលោក ត្រាំ ជុំវិញការបង្កកមូលនិធិរបស់ខ្លួន ហើយថា..ពួកគេជំពាក់ប្រាក់ច្រើនជាង៦៧១លានដុល្លារសម្រាប់ការងារកន្លងមក។ តុលាការសហព័ន្ធបានបញ្ជាឱ្យបង់ប្រាក់តាមកាលកំណត់នៅថ្ងៃចន្ទ៕