លោក ត្រាំ៖ សម្ព័ន្ធភាពអាមេរិក-ជប៉ុន មិនយុត្តិធម៌ទាល់តែសោះ ដោយជប៉ុនមិនតម្រូវឱ្យការពារអាមេរិកដោយយោធា ប៉ុន្តែអាមេរិកបែរជាតម្រូវឱ្យការពារជប៉ុនទៅវិញ
វ៉ាស៊ីនតោន៖ ប្រធានាធិបតីអាម៉េរិក ដូណាល់ ត្រាំ លើកឡើងថា សម្ព័ន្ធភាពអាម៉េរិក-ជប៉ុន មិនយុត្តិធម៌ទាល់តែសោះ ដោយជប៉ុនមិនតម្រូវឱ្យការពារសហរដ្ឋអាម៉េរិកដោយយោធា ប៉ុន្តែសហរដ្ឋអាម៉េរិកបែរជាតម្រូវឱ្យការពារជប៉ុនទៅវិញ។
លោក ត្រាំ បាននិយាយកាលពីថ្ងៃព្រហស្បតិ៍ទី៦មីនាថា៖«យើងមានទំនាក់ទំនងដ៏អស្ចារ្យជាមួយប្រទេសជប៉ុន។ ប៉ុន្តែយើងមានកិច្ចព្រមព្រៀងគួរឱ្យចាប់អារម្មណ៍ជាមួយប្រទេសជប៉ុន ដែលយើងត្រូវការពារពួកគេ ប៉ុន្តែពួកគេមិនចាំបាច់ការពារយើងទេ»។ លោកបន្តថា៖«ហើយតាមរយៈកិច្ចព្រមព្រៀងនេះ ពួកគេទទួលបានផលប្រយោជន៍សេដ្ឋកិច្ច។ ខ្ញុំចង់សួរថា តើនរណាជាអ្នកបង្កើតកិច្ចព្រមព្រៀងទាំងនេះ?»។
ការអត្ថាធិប្បាយរបស់លោក ត្រាំ លេចឡើងនៅពេលរដ្ឋមន្ត្រីពាណិជ្ជកម្មរបស់ប្រទេសជប៉ុន កំពុងរៀបចំដំណើរទៅកាន់រដ្ឋធានីវ៉ាស៊ីនតោន ដើម្បីជជែកពិភាក្សាអំពីពន្ធគយ។ ជាការឆ្លើយតប អ្នកនាំពាក្យរដ្ឋាភិបាលជប៉ុន លោក យ៉ូស៊ីម៉ាសា ហាយ៉ាស៊ី លើកឡើងនៅថ្ងៃសុក្រថា ជប៉ុនជឿជាក់លើរដ្ឋធានីវ៉ាស៊ីនតោនក្នុងការរក្សាកាតព្វកិច្ចរបស់ខ្លួន ចំពោះសន្ធិសញ្ញាសន្តិសុខរបស់ប្រទេសទាំងពីរ។ យោធាអាម៉េរិកប្រមាណ៥៤០០០នាក់ កំពុងឈរជើងនៅក្នុងប្រទេសជប៉ុន ភាគច្រើននៅតំបន់អូគីណាវ៉ា ភាគខាងកើតកោះតៃវ៉ាន់។
ជាមួយគ្នា រដ្ឋមន្ត្រីសេដ្ឋកិច្ច ពាណិជ្ជកម្ម និងឧស្សាហកម្មរបស់ជប៉ុន លោក យូជី មូតូ (Yoji Muto) បានប្រាប់អ្នកសារព័ត៌មានថា លោកសង្ឃឹមថា ដំណើរទស្សនកិច្ចនៅសហរដ្ឋអាម៉េរិករបស់លោក នឹងឈ្នះ-ឈ្នះ សម្រាប់ផលប្រយោជន៍ជាតិរបស់ជប៉ុន និងសហរដ្ឋអាម៉េរិក។ លោកបន្តថា ដំណើរទស្សនកិច្ចនេះ កំពុងត្រូវបានសម្របសម្រួល ហើយមិនបានបញ្ជាក់ពីកាលបរិច្ឆេទពីថ្ងៃទី៩ ដល់ថ្ងៃទី១៣ ខែមីនា ដែលផ្តល់ដោយប្រព័ន្ធផ្សព្វផ្សាយជប៉ុន ឬរបាយការណ៍ដែលថា លោកនឹងជំរុញមន្ត្រីអាម៉េរិកឱ្យលើកលែងប្រទេសជប៉ុនពីការយកពន្ធនោះទេ។
ទន្ទឹមនឹងនោះ នាយករដ្ឋមន្ត្រីជប៉ុន លោក ស៊ីហ្គេរូ អ៊ីស៊ីបា (Shigeru Ishiba) បានប្រាប់សភាកាលពីថ្ងៃពុធថា ការរួមចំណែករបស់ប្រទេសជប៉ុនចំពោះសេដ្ឋកិច្ចអាម៉េរិក គឺមានសារសំខាន់៕
