កូរ៉ខាងត្បូង៖ ចំនួនអ្នករបួសកើនឡើងដល់ ២៩នាក់ហើយ បន្ទាប់ពីយន្តហោះចម្បាំងកូរ៉េខាងត្បូង ទម្លាក់គ្រាប់បែកខុសបច្ចេកទេស ទៅលើតំបន់ជនស៊ីវិលមួយ
សេអ៊ូល៖ ក្រសួងការពារជាតិកូរ៉ខាងត្បូង បានអះអាងថា ចំនួនអ្នករងរបួសបានកើនឡើងដល់២៩នាក់ហើយ ក្នុងនោះ១៥នាក់ជាជនស៊ីវិល និង១៤នាក់ជាទាហាន បន្ទាប់ពីយន្តហោះចម្បាំងរបស់កូរ៉េខាងត្បូង ទម្លាក់គ្រាប់បែកខុសបច្ចេកទេសទៅលើតំបន់ជនស៊ីវិលមួយ កាលពីថ្ងៃព្រហស្បតិ៍ទី៦ ខែមីនា។
អ្នកនាំពាក្យក្រសួងការពារជាតិ លោក ជឿន ហាយុ (Jeon Ha-kyu) ប្រាប់អ្នកយកព័ត៌មាននៅថ្ងៃសុក្រទី៧ ខែមីនានេះថា ចំនួនអ្នករងរបួសសរុបចុងក្រោយមានចំនួន ២៩នាក់ ដោយពួកគេមានអាការប៉ះពាល់ត្រចៀកដោយសារតែសំឡេងផ្ទុះខ្លាំងពេក។ អ្នករងរបួស៩នាក់កំពុងសម្រាកព្យាបាលនៅមន្ទីរពេទ្យ ក្នុងនោះមាន២នាក់របួសធ្ងន់។ នេះបើតាមអ្នកនាំពាក្យ។ ជាមួយគ្នា ក្រសួងការបរទេសថៃបញ្ជាក់ថា ក្នុងចំណោមអ្នករងរបួសទាំង២៩នាក់ ក៏មានជនជាតិថៃ៤នាក់ផងដែរ។
យន្តហោះចម្បាំងកូរ៉េខាងត្បូងពីរគ្រឿង បានទម្លាក់គ្រាប់បែកពីអាកាសចំនួន៨គ្រាប់ដោយខុសបច្ចេកទេសទៅលើភូមិឋានជនស៊ីវិលមួយកាលពីថ្ងៃព្រហស្បតិ៍ទី៦ ខែមីនា ខណៈផ្ទះ និងសំណង់អគារជាច្រើនខ្នងត្រូវបានបំផ្លិចបំផ្លាញ។ យោធាលើកឡើងថា គ្រាប់បែកMk៨២ ទម្ងន់២២៥គីឡូក្រាមចំនួន៨គ្រាប់បានធ្លាក់ពីយន្តហោះពីរគ្រឿង ដោយសារតែអ្នកបើកយន្តហោះចូលទៅក្នុងទិសដៅមិនត្រឹមត្រូវ។
ក្រោយជួបហេតុការណ៍នេះ អាជ្ញាធរបានផ្អាកលំហាត់សឹកបាញ់គ្រាប់ពិត ប៉ុន្តែយោធាធានាថាឧបទ្ទវហេតុនេះនឹងមិនប៉ះពាល់ដល់លំហាត់សឹកយោធារួមគ្នាដ៏ធំរបស់កូរ៉េខាងត្បូង-សហរដ្ឋអាម៉េរិកនៅថ្ងៃចន្ទសប្តាហ៍ក្រោយនោះទេ។ គួរជម្រាបថា សកម្មជន និងអ្នកស្រុករាប់សិបនាក់ បានប្រមូលផ្តុំគ្នានៅថ្ងៃសុក្រទី៧ ខែមីនានេះ ដើម្បីទាមទារឱ្យបញ្ឈប់ការធ្វើលំហាត់សឹកយោធាដែលគំរាមកំហែងដល់អាយុជីវិត និងសន្តិភាពរបស់ប្រជាជនដែលរស់នៅក្នុងតំបន់នោះ៕
