មេដឹកនាំអឺរ៉ុប កំពុងរៀបចំផែនការធ្វើទស្សនកិច្ចទៅកាន់ប្រទេសវៀតណាមនៅប៉ុន្មានខែខាងមុខ ដើម្បីពង្រឹងទំនាក់ទំនងជាមួយប្រទេសអាស៊ីអាគ្នេយ៍មួយនេះ
ហាណូយ៖ មេដឹកនាំអឺរ៉ុបកំពុងរៀបចំផែនការធ្វើទស្សនកិច្ចទៅកាន់ប្រទេសវៀតណាមនៅប៉ុន្មានខែខាងមុខ ដើម្បីពង្រឹងទំនាក់ទំនងជាមួយប្រទេសអាស៊ីអាគ្នេយ៍មួយនេះ ចំពេលមានភាពតានតឹងជាមួយរដ្ឋធានីវ៉ាស៊ីនតោន ដែលអាចផលប៉ះពាល់ដល់ការនាំចេញរបស់ពួកគេទៅកាន់សហរដ្ឋអាម៉េរិក។
ទន្ទឹមនឹងភាពមិនច្បាស់លាស់នៃគោលនយោបាយរបស់លោក ត្រាំ បណ្តាប្រទេសនៅអឺរ៉ុបកំពុងបង្កើនទំនាក់ទំនងជាមួយវៀតណាម ខណៈប្រធានគណៈកម្មការអឺរ៉ុប លោកស្រី អួរស៊ូឡា វ៉ុនឌែរ ឡេយែន និងប្រធានាធិបតីបារាំង លោក អេម៉ានូអែល ម៉ាក្រុង គ្រោងធ្វើទស្សនកិច្ចទៅកាន់ប្រទេសវៀតណាមនៅខែខាងមុន។ នេះបើតាមមន្ត្រី និងអ្នកការទូតអឺរ៉ុប។
ជាក់ស្តែង លោកស្រី វ៉ុនឌែរ ឡេយែន បានប្រាប់មន្ត្រីកំពូលមកពីប្លុកអាស៊ីអាគ្នេយ៍អាស៊ានថា៖«ជំនោរនៃពន្ធគយ និងការត្រួតពិនិត្យការនាំចេញកំពុងកើនឡើង យើងចង់បង្កើតឱកាសថ្មីៗដើម្បីធ្វើពាណិជ្ជកម្ម និងវិនិយោគជាមួយដៃគូដែលគួរឱ្យទុកចិត្ត»។
ជាមួយគ្នានេះ មន្ត្រីជាន់ខ្ពស់សហភាពអឺរ៉ុបបានអះអាងថា លោក ម៉ាក្រុង នឹងធ្វើដំណើរទៅកាន់ប្រទេសវៀតណាមនៅចុងខែឧសភា ក្នុងគោលបំណងជំរុញទំនាក់ទំនងជាមួយអតីតប្រទេសក្រោមអាណានិគមមួយនេះ បន្ទាប់ពីរដ្ឋធានីប៉ារីសបានដំឡើងកម្រិតទំនាក់ទំនងការទូតជាមួយវៀតណាមកាលពីឆ្នាំមុន។
គួរជម្រាបថា សហភាពអឺរ៉ុបបាននាំចូលទំនិញមានតម្លៃ៥២ពាន់លានដុល្លារពីវៀតណាមកាលពីឆ្នាំមុន ពោលគឺតិចជាងពាក់កណ្តាលនៃការនាំចូលរបស់សហរដ្ឋអាម៉េរិក ខណៈអឺរ៉ុបនៅតែជាទីផ្សារនាំចេញធំបំផុតទី៣របស់វៀតណាម ដោយសារកិច្ចព្រមព្រៀងពាណិជ្ជកម្មសេរីដែលមានស្រាប់ផងដែរ។ ស្តីពីគោលនយោបាយអភិវឌ្ឍន៍ អឺរ៉ុបកំពុងត្រៀមខ្លួនរួចរាល់ ដោយមិនពឹងលើសហរដ្ឋអាម៉េរិក បន្ទាប់ពីលោក ត្រាំ បង្កកជំនួយបរទេស និងដាក់គំនាបពន្ធលើដៃគូពាណិជ្ជកម្មនានា។
គេនៅចាំបានថា អតីតប្រធានាធិបតីអាម៉េរិក លោក ចូ បៃឌិន បានជំរុញយ៉ាងខ្លាំងក្នុងការស្អំចិត្តអតីតសត្រូវ[វៀតណាម] ដោយចាត់ទុករដ្ឋធានីហាណូយជាដៃគូដ៏សំខាន់ក្នុងយុទ្ធសាស្ត្រទប់ទល់នឹងឥទ្ធិពលចិន។ យ៉ាងណា រដ្ឋបាលត្រាំ ធ្វើឱ្យទំនាក់ទំនងទ្វេភាគីចុះខ្សោយ ជុំវិញការដាក់គំរាមកំហែងពន្ធលើរដ្ឋធានីហាណូយ៕
