ក្បាលដីចំនួន៣,៥៩៤ ត្រូវបានបិទផ្សាយជាសាធារណៈនូវឯកសារនៃការវិនិច្ឆ័យជូនប្រជាពលរដ្ឋមកពិនិត្យផ្ទៀងផ្ទាត់ ចំនួន៣ភូមិ ក្នុងឃុំតាលន់ និងឃុំត្រើយស្លា ស្រុកស្អាង

ភ្នំពេញ៖ ការចុះបញ្ជីដីមានលក្ខណៈជាប្រព័ន្ធគឺ ដើម្បីទទួលបានប័ណ្ណកម្មសិទ្ធិដីធ្លី ដែលជាឯកសាររដ្ឋបាលបញ្ជាក់ពីសិទ្ធិជាម្ចាស់លើក្បាលដីនីមួយៗ។ ប្រជាពលរដ្ឋដែលទទួលបានប័ណ្ណកម្មសិទ្ធិ គឺជាម្ចាស់ដីធ្លីពេញលក្ខណៈ ហើយត្រូវបានការពារដោយច្បាប់។ ទន្ទឹមនេះបងប្អូនជាម្ចាស់ដីមានសិទ្ធិប្រើប្រាស់អាស្រ័យផល និងចាត់ចែងដីរបស់ខ្លួនផ្តាច់មុខ និងទូលំទូលាយ កុំឱ្យតែយកដីនោះទៅប្រើប្រាស់ក្នុងបទណាមួយដែលច្បាប់បានហាមឃាត់តែប៉ុណ្ណោះ នេះហើយដែលជាអត្ថន័យនៃតម្លៃប័ណ្ណកម្មសិទ្ធិដីធ្លី នេះជាការថ្លែងរបស់ឯកឧត្តម ហាក់ សុខមករា អភិបាលរងខេត្តកណ្តាល ក្នុងពិធីបិទផ្សាយជាសាធារណៈនូវឯកសារនៃការវិនិច្ឆ័យ ចំនួន ០៣ភូមិគឺព្រែកតាឯក ភូមិទួលស្ពឺ ឃុំតាលន់ និងភូមិថ្កុល ឃុំត្រើយស្លា ស្រុកស្អាង ខេត្តកណ្តាល នាព្រឹកថ្ងៃទី២៧ ខែកុម្ភៈ ឆ្នាំ២០២៥។

ឯកឧត្តមអភិបាលរងខេត្ត បានបន្ថែមថា ការបិទផ្សាយសាធារណៈនូវឯកសារនៃការវិនិច្ឆ័យចុះបញ្ជីដីធ្លីមានលក្ខណៈជាប្រព័ន្ធសម្រាប់ទាំង៣ភូមិនេះជាឱកាសល្អសម្រាប់ប្រជាពលរដ្ឋ ដែលអាចកែប្រែនូវរាល់កំហុសឆ្គងលើទិន្ន័យកម្មសិទ្ធិដីរបស់ខ្លួន ដើម្បីឈានទៅរកការសម្រេចចេញជាប័ណ្ណកម្មសិទ្ធិដីធ្លីស្របច្បាប់ ដល់ប្រជាពលរដ្ឋ ដែលបញ្ជាក់ពីការកាន់កាប់ដីធ្លីរបស់ខ្លួនមានភាពត្រឹមត្រូវ និងទទួលការការពារដោយច្បាប់ មានទំនុកចិត្ត ដោយមិនមានការព្រួយបារម្ភពីការរំលោភបំពានពីអ្នកណាម្នាក់ឡើយ។

ឯកឧត្តមបានសង្កត់ធ្ងន់ថា នេះជាគោលនយោបាយរបស់រាជរដ្ឋាភិបាលកម្ពុជា ក្នុងគោលបំណងធ្វើយ៉ាងបញ្ជប់ទាំងស្រុងនូវរាល់បញ្ហាវិបត្តិដីធ្លីរ៉ាំរៃ ដែលតែងតែកើតឡើងចំពោះប្រជាពលរដ្ឋ និងធ្វើឡើងក្នុងគោលបំណងការពារផលប្រយោជន៍ប្រជាពលរដ្ឋ ព្រោះក្រោយពេលទទួលបានប័ណ្ណកម្មសិទ្ធិដីធ្លីហើយ ប្រជាពលរដ្ឋអាចយកប័ណ្ណបញ្ជាក់ពីកម្មសិទ្ធិស្របច្បាប់នេះ ទៅប្រើប្រាស់តាមតម្រូវការរបស់ខ្លួន។

បើតាមការបញ្ជាក់របស់លោក ព្រំ ឆាត អនុប្រធានមន្ទីររៀបចំដែនដីនគរូបនីយកម្មសំណង់ និងសុរិយោដីខេត្ត បានអោយដឹងថា៖ ការបិទផ្សាយជាសាធារណៈនូវឯកសារនៃការវិនិច្ឆ័យចុះបញ្ជីដីធ្លីមានលក្ខណៈជាប្រព័ន្ធចំនួន ០៣ភូមិគឺភូមិព្រែកតាឯក ភូមិទួលស្ពឺ ឃុំតាលន់ និងភូមិថ្កុល ឃុំត្រើយស្លា ស្រុកស្អាង មានចំនួន ៣,៥៩៤ក្បាលដី ហើយការបិទផ្សាយនេះមានរយៈពេល ១៥ថ្ងៃ គិតចាប់ពី ថ្ងៃទី២៧ ខែកុម្ភៈ រហូតដល់ថ្ងៃទី១៣ ខែមីនា ឆ្នាំ២០២៥ ដោយមិនគិតថ្ងៃបុណ្យ ឬថ្ងៃឈប់សម្រាកឡើយ ៕