សម្ដេចធិបតី ហ៊ុន ម៉ាណែត ប្រកាសដំឡើងកុងត្រា ដល់គ្រូកិច្ចសន្យា រយៈពេល ២ឆ្នាំ ដើម្បីរក្សានិរន្តរភាពប្រាក់បៀវត្សគ្រូបង្រៀន
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានផ្ដល់អនុសាសន៍ដល់ក្រសួងអប់រំ ឱ្យផ្ដល់កិច្ចសន្យាដល់គ្រូកិច្ចសន្យា ដោយដំឡើងពីរយៈពេល១ឆ្នាំ ទៅដល់រយៈពេលពីរឆ្នាំ ដើម្បីរក្សានិរន្តរភាពប្រាក់បៀវត្សគ្រូបង្រៀន ។
ក្នុងឱកាសអញ្ជើញជាអធិបតី “បិទសន្និបាតបូកសរុបលទ្ធផលការងារអប់រំ យុវជន និងកីឡា ឆ្នាំសិក្សា ២០២៣-២០២៤ និងទិសដៅឆ្នាំ ២០២៤-២០២៥” នាថ្ងៃទី២៦ ខែកុម្ភៈនេះ សម្ដេចធិបតី បានដាក់ចេញបទបញ្ជាដល់ក្រសួងអប់រំ និងក្រសួងមុខងារសាធារណៈ គិតគូរឡើងវិញចំពោះរយៈពេលនៃការបង្រៀនរបស់គ្រូបង្រៀនស្ម័គ្រចិត្ត ដើម្បីផ្ដល់ឱកាសដល់គ្រូបង្រៀនស្ម័គ្រចិត្តនៅមូលដ្ឋានឱ្យបានចូលគ្រូក្របខណ្ឌ ដោយពិនិត្យមើលផ្ទាល់ទៅលើគុណវុធរបស់គ្រូបង្រៀន ដោយមិនត្រូវទុករយៈពេលបង្រៀនស្ម័គ្រចិត្តយូរឆ្នាំពេកនោះទេ។
សម្ដេចធិបតី បានអំពាវនាវដល់ពលរដ្ឋកុំយល់ច្រឡំនៅពេលដែលផ្ដល់ប្រាក់ខែបន្ថែមដល់គ្រូបង្រៀនដែលចូលនិវត្តន៍ ពីព្រោះនេះគឺជាការខិតខំរបស់គ្រូដែលចូលនិវត្តន៍ហើយបានបន្តមកខិតខំជួយបង្រៀនសិស្សទោះបីជាចូលនិវត្តន៍ក៏ដោយ។
សម្ដេចធិបតី ក៏បានថ្លែងកោតសរសើរដល់គ្រូបង្រៀនដែលស្ម័គ្រចិត្តបង្រៀនបន្ថែមម៉ោងដល់សិស្សនៅតាមសាលារៀន ខណៈការបង្រៀនបន្ថែមម៉ោងនេះរាជរដ្ឋាភិបាលបានលើកទឹកចិត្ត និងកំពុងផ្ដល់ការគាំទ្របន្ថែមទៀត ដើម្បីធ្វើយ៉ាងណាផ្ដល់ការអប់រំឱ្យបានច្រើនដល់សិស្សនៅតាមមូលដ្ឋាន ៕
