លោកត្រាំ គ្រោងនឹងផ្តល់ទិដ្ឋាការមាស ឬបណ្ណមាស និងសញ្ជាតិអាមេរិក ដល់នរណាដែលចំណាយលុយ៥លានដុល្លារ ដើម្បីត្រួសត្រាយផ្លូវសម្រាប់អ្នកមាន និងជោគជ័យ

វ៉ាស៊ីនតោន៖ លោកប្រធានាធិបតីសហរដ្ឋអាម៉េរិក ដូណាល់ ត្រាំ និយាយកាលពីថ្ងៃអង្គារទី២៥កុម្ភៈថា លោកគ្រោងនឹងផ្តល់ទិដ្ឋាការមាស ឬបណ្ណមាស និងសញ្ជាតិអាម៉េរិក ដល់នរណាដែលចំណាយលុយ៥លានដុល្លារ ដើម្បីត្រួសត្រាយផ្លូវសម្រាប់អ្នកមាន និងជោគជ័យចូលប្រទេសមហាអំណាចនេះដោយស្របច្បាប់។

លោក ត្រាំ បាននិយាយថា៖«អ្នកទាំងនោះ គឺជាអ្នកមាន ជាបុគ្គលជោគជ័យ ជាអ្នកចំណាយប្រាក់ច្រើន និងបង់ពន្ធច្រើន និងផ្តល់ការងារដល់មនុស្សជាច្រើន ហើយយើងគិតថា វានឹងទទួលបានជោគជ័យយ៉ាងខ្លាំង»។ រដ្ឋមន្ត្រីពាណិជ្ជកម្ម លោក ហាវើដ លូតនិច (Howard Lutnick) បានប្រកាសថា ទិដ្ឋាការមាសរបស់លោក ត្រាំ នឹងជំនួសទិដ្ឋាការ EB-5 ក្នុងរយៈពេលពីរសប្តាហ៍ខាងមុខ។

គួរជម្រាបជូនថា ទិដ្ឋាការ EB-5s ត្រូវបានបង្កើតឡើងក្នុងឆ្នាំ១៩៩០ សម្រាប់វិនិយោគិនបរទេសដែលចំណាយប្រហែល១លានដុល្លារលើក្រុមហ៊ុនមានបុគ្គលិកយ៉ាងហោចណាស់១០នាក់។

ទិដ្ឋាការរបស់អ្នកវិនិយោគ គឺជារឿងធម្មតានៅទូទាំងពិភពលោក ដែលមានប្រទេសជាង១០០ ផ្តល់ទិដ្ឋាការមាសដល់បុគ្គលដែលមានទ្រព្យសម្បត្តិ រួមទាំងសហរដ្ឋអាម៉េរិក ចក្រភពអង់គ្លេស អេស្ប៉ាញ ក្រិក ម៉ាល់តា អូស្ត្រាលី កាណាដា និងអ៊ីតាលី។ ទិដ្ឋាការមាស នឹងក្លាយជាមធ្យោបាយសម្រាប់ទទួលបានសញ្ជាតិសម្រាប់អ្នកមានទ្រព្យធន ឬអ្នកមានទេពកោសល្យខ្ពស់ចូលទៅក្នុងសហរដ្ឋអាម៉េរិក៕